សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាព្រឹកថ្ងៃទី៥ ខែសីហា ឆ្នាំ២០២៤នេះ គឺជាថ្ងៃបើកការដ្ឋានសាងសង់គម្រោងព្រែកជីកហ្វូណនតេជោផ្លូវការ ជាប្រវត្តិសាស្ត្ររបស់កម្ពុជា ក្រោមអធិបតីភាពដ៏ខ្ពស់ខ្ពស់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
ថ្លែងនៅក្នុងឱកាសពិធីបើកការដ្ឋានសាងសង់ព្រែកជីកហ្វូណនតេជោ សម្ដេចធិបតី ហ៊ុន ម៉ាណែត បានមានប្រសាសន៍ថា រាជរដ្ឋាភិបាលកម្ពុជាតែងយកចិត្តទុកដាក់យ៉ាងសំខាន់ក្នុងការកសាង និងសាងសង់នូបណ្តាញហេដ្ឋារចនាសម្ព័ននានាស្ទើរទូទាំងប្រទេស ដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ជាពិសេសវវិស័យដឹកជញ្ជូន ជំរុញកំណើនសេដ្ឋកិច្ចជាតិ ហើយអ្វីដែលកាន់តែអស្ចារ្យ គឺគម្រោងដែលលេចរូបរាងនៅថ្ងៃនេះ ព្រែកជីកហ្វូណនតេជោ ដែលបង្ហាញពីការប្ដេជ្ញាចិត្ត ក្នុងនាមជាប្រជាជាតិតែមួយ។
សម្ដេចក៏បានបន្តមានប្រសាសន៍ទៀតថា ៖ «តាមរយៈគម្រោងព្រែកជីករបស់យើងនាពេលនេះ ក៏ជួយលើកកម្ពស់ស្វ័យភាព សេដ្ឋកិច្ចជាតិកម្ពុជា តាមរយៈការពង្រឹងឯករាជ្យភាព ឯករាជ្យជាតិ និងភាពម្ចាស់ការលើការដឹកជញ្ជូនតាមផ្លូវទឹក។»
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជាក៏បានថ្លែងក្នុងឱកាសនេះផងដែរថា គម្រោងព្រែកជីកហ្វូណនតេជោនឹងផ្ដល់អត្ថប្រយោជន៍ជាច្រើនដល់ប្រទេសកម្ពុជា ជាពិសេសវិស័យដឹកជញ្ជូន វិស័យអចលនទ្រព្យ និងការវិនិយោគផ្សេងៗ ខណៈដែលគម្រោងមួយនេះ គ្រោងនឹងចំណាយទឹកប្រាក់រហូតដល់ប្រមាណ ១,៧ ពាន់លានដុល្លារអាមេរិក ដោយត្រូវប្រើពេលវេលា៤ឆ្នាំ ដើម្បីសាងសង់បញ្ចប់គម្រោង។
ឯកឧត្តមឧបនាយករដ្ឋមន្ត្រីបានឱ្យដឹងទៀតថា កម្ពុជាពិតជាអាចទទួលនូវអត្ថប្រយោជន៍ជាច្រើនមហាសាលពីគម្រោងនេះ រួមមានដូចជា៖ កាត់បន្ថយរយៈពេល ចម្ងាយ និងតម្លៃនៃការដឹកជញ្ជូននាពេលបច្ចុប្បន្ន ការបង្កើតតំបន់ពាណិជ្ជកម្ម និងមជ្ឈមណ្ឌលភស្តភារកម្ម ការអភិវឌ្ឍផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ និងការចិញ្ចឹមសត្វជាដើម។
គួរបញ្ជាក់ថា គម្រោងព្រែកជីកហ្វូណនតេជោ នឹងក្លាយជាព្រែកដ៏សំខាន់សម្រាប់ជួយរំដោះទឹកជំនន់។ នៅរដូវប្រាំង ប្រជាជនដែលរស់នៅតាមដងព្រែកក៏នៅតែអាចមានទឹកសម្រាប់ប្រើប្រាស់ក្នុងវិស័យកសិកម្ម។ ផ្លូវទឹកថ្មីទៅកាន់សមុទ្រនេះ មានប្រវែង ១៨០គីឡូម៉ែត្រ គិតចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រ ខេត្តកែប ដោយឆ្លងកាត់ខេត្ត ៤ រួមមាន៖ ខេត្តកណ្តាល តាកែវ កំពត និងខេត្តកែប ដែលមានប្រជាជនសរុបប្រមាណ ១,៦លាននាក់ រស់នៅអមសងខាងផ្លូវទឹកនេះ។
ផ្លូវទឹកនេះ មានទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែកខាងក្រោម ប្រមាណ៨០ម៉ែត្រ និងជម្រៅទឹកប្រមាណ ៥,៤ម៉ែត្រ ( ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ ) មានគន្លងនាវាចរណ៍ចំនួន ២គន្លង អាច ចេញ-ចូល និងចៀសគ្នាបានដោយសុវត្ថិភាព៕ រូបភាព ៖ លាង ភារុណ
Account
Security
Favourite Content