បរទេស៖ យោងតាមប្រភពព័ត៌មានពី CNN បានរាយការណ៍ថា ក្រុមហ៊ុនរថយន្តអគ្គិសនីអាម៉េរិក Tesla កំពុងក្លាយជាគោលដៅនៃការដាក់ពន្ធសងសឹករបស់បរទេស ខណៈដែលម្ចាស់ក្រុមហ៊ុន Elon Musk បានខាតបង់ប្រមាណជាង ១០០ពាន់លានដុល្លាររួចទៅហើយនាពេលថ្មីៗនេះ។

កាលពីសប្តាហ៍មុន Tesla បានលើកឡើងថា ពន្ធសងសឹករបស់បរទេសប្រឆាំងនឹងក្រុមហ៊ុនផលិតរបស់អាម៉េរិកប៉ះពាល់ដល់ប្រតិបត្តិការរបស់ខ្លួន ហើយសហរដ្ឋអាម៉េរិកគួរតែពិចារណាដោយប្រុងប្រយ័ត្ននូវការដាក់ចេញគោលនយោបាយពាណិជ្ជកម្ម។ អ្នកតំណាងក្រុមហ៊ុន Tesla បានសរសេរនៅក្នុងលិខិតថ្ងៃទី ១១ ខែមីនា ទៅកាន់តំណាងពាណិជ្ជកម្មអាម៉េរិក Jamieson Greer ថា ក្នុងនាមជាអ្នកផលិត និងអ្នកនាំចេញរបស់សហរដ្ឋអាមេរិក ក្រុមហ៊ុន Tesla លើកទឹកចិត្តឱ្យតំណាងពាណិជ្ជកម្មអាម៉េរិកពិចារណាលើផលប៉ះពាល់រយៈពេលវែងបានមកពីវិធានការជាច្រើន ដែលស្នើឡើងដើម្បីប្រយុទ្ធប្រឆាំងនឹងការអនុវត្តពាណិជ្ជកម្មអយុត្តិធម៌។ ជាមួយគ្នានេះ ស្របពេលដែលក្រុមហ៊ុន Tesla ទទួលស្គាល់ និងគាំទ្រសារៈសំខាន់នៃពាណិជ្ជកម្មដោយស្មើភាព ការវាយតម្លៃដែលធ្វើឡើងដោយតំណាងពាណិជ្ជកម្មអាម៉េរិកដើម្បីកែតម្រូវពាណិជ្ជកម្មអយុត្តិធម៌ ក៏គួរតែគិតគូរដល់ការនាំចេញពីសហរដ្ឋអាមេរិកផងដែរ។

Tesla ក៏បានព្រមានថា វិធានការពន្ធគយរបស់សហរដ្ឋអាម៉េរិកនាពេលកន្លងមក បានបណ្តាលឱ្យមានការប្រតិកម្មភ្លាមៗពីប្រទេសគោលដៅដូចជា ការដំឡើងពន្ធលើរថយន្ត EV ដែលនាំចូលទៅកាន់ប្រទេសទាំងនោះ។ មិនត្រឹមតែប៉ុណ្ណោះ សកម្មភាពពន្ធរបស់អាម៉េរិកនាពេលកន្លងមក បានបង្កើនតម្លៃសម្រាប់ការផលិតយានយន្តសម្រាប់ក្រុមហ៊ុនអាម៉េរិក ហើយការនាំចេញទៅបរទេសក៏បានឡើងថ្លៃផងដែរ។ ដូច្នោះហើយ នៅក្នុងលិខិតនោះបានបន្ថែមថា ការិយាល័យតំណាងពាណិជ្ជកម្មអាម៉េរិកគួរតែពិនិត្យមើលលើយុទ្ធសាស្ត្រ ដើម្បីជៀសវាងការធ្លាក់ចុះបន្ថែមទៀតនាពេលអនាគត។ លើសពីនេះ គោលនយោបាយពាណិជ្ជកម្មគួរតែពិចារណាលើដែនកំណត់នៅក្នុងខ្សែសង្វាក់ផ្គត់ផ្គង់ក្នុងស្រុកទាក់ទងនឹងថាមពលអគ្គិសនី EVs និងថ្ម lithium-ion ជាដើម ដោយសារធាតុ​​មួយ​ចំនួនមិនមានប្រភពនៅក្នុងនៅ​​សហរដ្ឋ​អាម៉េរិកនោះទេ។

កាល​ពី​សប្តាហ៍មុន ​ប្រធានាធិបតីអាម៉េរិក Donald Trump ​បានអះអាង​ថា លោក​នឹង​ទិញ​ឡាន Tesla មួយក្នុង​តម្លៃ​ពេញ ដើម្បីជាការគាំទ្រដល់​ Elon Musk។ យ៉ាងណាមិញ ភាគហ៊ុនរបស់ក្រុមហ៊ុន Tesla បានបន្តធ្លាក់ចុះយ៉ាងខ្លាំងនាពេលថ្មីៗនេះ ខណៈដែលការលក់នៅអឺរ៉ុបរបស់ក្រុមហ៊ុននេះបានធ្លាក់ចុះ ៤៥ ភាគរយកាលពីខែមក។ យ៉ាងណាក៏ដោយ ទោះបីជា Elon Musk មានតួនាទីធំនៅក្នុងរដ្ឋាភិបាលក៏ដោយ ប៉ុន្តែវារឹតតែជាសម្ពាធសម្រាប់មហាសេដ្ឋីមួយនេះ។ គួរឲ្យបញ្ជាក់ដែរថា Elon Musk បានខាតបង់ទ្រព្រសម្បត្តិជាង ៥២​ ពាន់លានដុល្លារត្រឹមរយៈពេលពីរខែនៃដើមឆ្នាំ២០២៥ ហើយបើគិតចាប់តាំងពីខែធ្នូ ឆ្នាំ២០២៤ លោកបានទទួលរងនូវការខាតបង់រហូតដល់ជាង ១០០ ពាន់លានដុល្លារ៕