សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមតួលេខពាណិជ្ជកម្មឆ្នាំ២០២៤ បង្ហាញថា កម្ពុជានាំទំនិញទៅថៃជាង ១.១ពាន់លានដុល្លារ ឯថៃនាំចូលមកកម្ពុជាជាង ៥.២ពាន់លានដុល្លារ គឺថៃនាំចូលមកកម្ពុជាច្រើនជាង ៤.១ពាន់លានដុល្លារ។ ដោយឡែក សម្រាប់រយៈពេល៥ខែដើមឆ្នាំ២០២៥នេះ កម្ពុជានាំចេញទៅថៃជាង២០០លានដុល្លារ ចំណែកឯថៃនាំចូលមកកម្ពុជាជាង ១.៥ពាន់លានដុល្លារ។
លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិន និងជាអ្នកជំនាញសេដ្ឋកិច្ចបានព្រមានថា ការបិទច្រកព្រំដែនកម្ពុជា-ថៃ បើនៅតែអូសបន្លាយយូរទៀតនោះ នឹងធ្វើឱ្យខាតបង់ប្រយោជន៍សេដ្ឋកិច្ចប្រទេសទាំងពីរ ប៉ុន្តែថៃជាអ្នកខាតបង់ច្រើនជាងកម្ពុជា។
លោកបណ្ឌិតបានពន្យល់ថា សម្រាប់ប្រទេសកម្ពុជា នឹងជួបបញ្ហាកង្វះមុខទំនិញប្រើប្រាស់មួយចំនួនដែលប្រឈមនឹងការឡើងថ្លៃ រួមជាមួយនឹងការប្រឈមលើការនាំចេញកសិផលសម្រាប់ពលរដ្ឋរស់នៅជិតព្រំដែន ប៉ុន្តែទោះជាបែបនេះក្ដី ភាគីថៃជាអ្នកខាតធ្ងន់ធ្ងរបើសិនជានៅមានការបិទច្រកយូរបន្តទៀត។ ខាតច្រើននៅត្រង់ថា ថៃនាំទំនិញចូលកម្ពុជាច្រើនសម្បើមខុសគ្នា៤ដង ធៀបនឹងការនាំចេញទំនិញពីកម្ពុជាទៅថៃ។
លោកបណ្ឌិត គី សេរីវឌ្ឍន៍ បានបញ្ជាក់យ៉ាងដូច្នេះថា ៖
«ដូច្នេះ ផលប៉ះពាល់វាមានទៅវិញទៅមក តែបើយើងគិតពីទំហំនៃផលប៉ះពាល់ ជារួមប្រទេសថៃរងផលប៉ះពាល់សេដ្ឋកិច្ចច្រើនជាងប្រទេសកម្ពុជា ដោយទំហំពាណិជ្ជកម្មថៃមកកម្ពុជាមានបរិមាណធំជាងកម្ពុជានាំទៅថៃដល់ទៅជិត៥ដងឯណោះ»។
ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានមានប្រសាសន៍ថា ថ្មីៗនេះភាគីថៃបានបិទច្រករបៀងមួយចំនួនជាឯកតោភាគី ក៏ប៉ុន្តែច្រកអន្តរជាតិនៅបើកឱ្យដឹកជញ្ជូនទំនិញជាធម្មតា គ្រាន់តែបន្ថយពេលវេលាចេញចូលប៉ុណ្ណោះ ដោយអនុវត្តចាប់ពីម៉ោង៩.០០នាទីព្រឹករហូតដល់ម៉ោង៤.០០នាទីល្ងាច ខណៈដែលពេលវេលាធម្មតាពីមុនបើកចាប់ពីម៉ោង៨.០០នាទី ព្រឹករហូតដល់ម៉ោង១០.០០នាទីយប់។
ឯកឧត្តមមានប្រសសន៍បញ្ជាក់ថា ការដឹកជញ្ជូនទំនិញនៅច្រកព្រំដែន មកទល់ពេលនេះមិនមានស្ថានភាពណាមួយគួរកត់សម្គាល់នោះទេ ដោយឡែកការបិទច្រករបៀងជាឯកតោភាគីបានធ្វើឱ្យប៉ះពាល់ខ្លះៗដល់ការប្រកបរបរកស៊ីរបស់ពលរដ្ឋទាំងសងខាងដែលរស់នៅតាមខ្សែរបន្ទាត់ព្រំដែន ប៉ុន្តែបច្ចុប្បន្នពលរដ្ឋទំាងនោះ ក៏បានដឹកទំនិញចេញចូលតាមច្រកអន្តរជាតិផងដែរ។
ឯកឧត្តម ប៉ែន សុវិជាតិ បន្តថា ៖
«ថ្មីៗនេះភាគីថៃគាត់បិទច្រកមួយចំនួនជាច្រករបៀង ប៉ុន្តែច្រកអន្តរជាតិវាគ្រាន់តែបន្ថយម៉ោងធ្វើការទេ តែចំពោះយានយន្តដែលដឹកទំនិញផ្សេងៗ ដែលជាយានយន្តលក្ខណៈពាណិជ្ជកម្មគឺនៅដំណើរការធម្មតា» ។
គួរបញ្ជាក់ថា ព្រំដែនរួមរវាងកម្ពុជា-ថៃ មានប្រវែងជាង៨០០គីឡូម៉ែត្រ មានច្រកទ្វារតំបន់ និងច្រកទ្វារអន្តរជាតិចំនួន២៦ ដែលរត់ចេញពីឈូងសមុទ្រថៃនៅភាគខាងត្បូង ដល់ទន្លេមេគង្គភាគខាងជើងជាប់ព្រំដែនត្រីកោណរវាងកម្ពុជា-ថៃ និងឡាវ៕
វិន ឈុនហ៊ាត
Account
Security
Favourite Content