ភ្នំពេញ៖  ក្រុមការងារជំរុញការវិនិយោគក្នុងខេត្តព្រះសីហនុ កាលពីថ្ងៃទី២១ ខែកក្កដា ឆ្នាំ២០២៥ បានប្រជុំពិនិត្យវឌ្ឍនភាពនៃការអនុវត្តគម្រោងដែលទទួលបានការលើកទឹកចិត្តពិសេសពីរាជរដ្ឋាភិបាលក្នុងឆ្នាំ២០២៤ និងឆមាសទី១ ឆ្នាំ២០២៥ រួមជាមួយនឹងដំណើរចុះពិនិត្យទីតាំងគម្រោងចំនួន ៦ ដោយផ្តោតសំខាន់លើគម្រោងពាក់ព័ន្ធនឹងអគារជាប់គាំង។

ឯកឧត្តម អ៊ឹម សុខធី ប្រធានលេខាធិការដ្ឋានក្រុមការងារបានឱ្យដឹងថា គិតចាប់ពីឆ្នាំ២០២៤ និង ៦ខែ ដើមឆ្នាំ២០២៥ ក្រុមការងារជំរុញការវិនិយោគបានផ្តល់ការលើកទឹកចិត្តជូនដល់គម្រោងវិនិយោគសរុបចំនួន ៣៣១ គម្រោង និងបានខិតខំប្រឹងប្រែងជាមួយក្រសួងស្ថាប័នក្នុងការអនុវត្តកម្មវិធីពិសេសជំរុញការវិនិយោគដែលបាន និងកំពុងបង្កើនជំនឿទុកចិត្តវិនិយោគ ។

ឯកឧត្តម មានប្រសាសន៍ថា៖ ក្នុងចំណោមគម្រោងទាំង ៣៣១ មានគម្រោងពាក់ព័ន្ធអគារជាប់គាំង ១៥៣ គម្រោង, គម្រោងពុំពាក់ព័ន្ធអគារជាប់គាំង (គម្រោងថ្មី) ១៤២ គម្រោង, គម្រោងពង្រីក ២៤ គម្រោង និងគម្រោងមានស្រាប់ ១២ គម្រោង ដែលមានតម្រូវការសម្រាប់បញ្ចប់ការសាងសង់ និងអនុវត្តគម្រោងប្រមាណ ៤ ៧៥៣ លានដុល្លារអាម៉េរិក ។

ក្រៅពីការសម្រេចផ្តល់ការលើកទឹកចិត្តពិសេសជាគោលការណ៍, ក្រុមការងារបានសម្របសម្រួលចុះបញ្ជីសហគ្រាស, សម្របសម្រួលធ្វើផ្លូវ លូ ផ្តល់លិខិតអនុញ្ញាតសាងសង់ អាជ្ញាបណ្ណទេសចរណ៍ អាជ្ញាបណ្ណអាជីវកម្មអចលនវត្ថុ ដោះស្រាយវិវាទក្រៅប្រព័ន្ធតុលាការ, រៀបចំវេទិកាទាក់ទាញ ដោយសហការជាមួយរដ្ឋបាលខេត្តព្រះសីហនុ, ផ្តល់ការប្រឹក្សាយោបល់ និង ការសម្របសម្រួលដោះស្រាយសំណូមពរផ្សេងៗរបស់វិនិយោគិន និង ធុរជន ទាំងខ្មែរ និង បរទេស ។

ទន្ទឹមនេះ តាមរយៈការចុះពិនិត្យការអនុវត្តគម្រោង ក្រុមហ៊ុនដែលទទួលបានការលើកទឹកចិត្តមានអំណរសាទរ និងពេញចិត្តចំពោះកម្មវិធីពិសេសរបស់រាជរដ្ឋាភិបាល ហើយបានធ្វើការសម្រេចចិត្តវិនិយោគ ក្នុងខេត្តព្រះសីហនុ ។ ជាមួយនេះ ក្នុងទិដ្ឋភាពរួម ការអនុវត្តកម្មវិធីពិសេសនេះដែលជាគំនិតផ្តួចផ្តើមដ៏ប្រពៃរបស់ សម្តេចធិបតីនាយករដ្ឋមន្ត្រី កំពុងផ្តល់ផលជះជាវិជ្ជមាន ដោយប្រែក្លាយអគារជាប់គាំង ទៅជាទ្រព្យដ៏មានតម្លៃ ដែលអាចប្រើប្រាស់បានសម្រាប់សេដ្ឋកិច្ចក្នុងខេត្ត និងប្រែក្លាយបញ្ហាប្រឈមទៅជាកាលានុវត្តភាព ព្រមទាំងជំរុញឱ្យអ្នកពាក់ព័ន្ធពីលើដល់ក្រោម ក្នុងការបំពេញការងារដោយបុរេសកម្ម សកម្ម និងអន្តរសកម្ម ។ បច្ចុប្បន្ន ខេត្តព្រះសីហនុ មានសន្តិសុខ សណ្តាប់ធ្នាប់ និងបរិយាកាសវិនិយោគ​ល្អប្រសើរ ដែលបានទាក់ទាញការវិនិយោគ និង ភ្ញៀវទេសចរក្នុងចំនួនច្រើន និងច្រើនជាតិសាសន៍ សមស្របជាមជ្ឈមណ្ឌលនៃការអភិវឌ្ឍពហុបំណង និងជាប៉ូលសេដ្ឋកិច្ចដ៏សំខាន់របស់កម្ពុជា ។

សូមជម្រាបដែរថា ក្រុមការងារជំរុញការវិនិយោគខេត្តព្រះសីហនុ នៅតែបន្តលើកទឹកចិត្តឱ្យធុរជន និងវិនិយោគិន អញ្ជើញដាក់ពាក្យ ឬស្នើមកក្រុមការងារជំរុញការវិនិយោគក្នុងខេត្តព្រះសីហនុ ដើម្បីទទួលបានការលើកទឹកចិត្ត ការសម្របសម្រួល និងការសម្រួលនីតិវិធីផ្សេង ដើម្បីធ្វើយ៉ាងណាឱ្យការវិនិយោគមានភាពរលូន និងទទួលបានផលចំណេញ៕