សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កាលពីថ្ងៃទី១ ខែកក្កដា កន្លងទៅនេះ កម្ពុជាទទួលបានដំណឹងល្អមួយដោយសហរដ្ឋអាម៉េរិកសម្រេចទម្លាក់ពន្ធបដិការពី ៤៩ % មក ១៩% ។ ជាដំណឹងល្អ ព្រោះអាត្រានេះជាអាត្រាដែលទាបមួយក្នុងចំណោមប្រទេសដែលបានចរចាពន្ធនាំចូលទំនិញទៅកាន់សហរដ្ឋអាម៉េរិក។ យ៉ាងណាក៏ដោយ លក្ខខណ្ឌនៃការចរចាដែលកម្ពុជាប្រើប្រាស់ជាមួយអាម៉េរិកនៅពេលនោះគឺបន្ថយលើពន្ធនាំចូលទំនិញសហរដ្ឋអាម៉េរិក មកកម្ពុជារហូតដល់អាត្រា ០% ពោល គឺមិនយកពន្ធលើទំនិញអាម៉េរិកនោះទេ។ យ៉ាងណាក៏ដោយ សម្រាប់អ្នកជំនាញយល់ថា កម្ពុជាមិនអាចបណ្ដែតបណ្ដោយជាមួយនឹងអាត្រាពន្ធនេះដោយមិនធ្វើអ្វីនោះទេ។
លោក Arnaud Darc នាយកប្រតិបត្តិនៃក្រុមហ៊ុន Thalias និងជាអ្នកជំនាញផ្នែកសេដ្ឋកិច្ច ពាណិជ្ជកម្មផងដែរនោះបានឱ្យដឹងថា ស្ថានភាពពេលនេះ កម្ពុជាមិនគួរផ្ដោតទៅលើជោគជ័យនៃការចរចាពន្ធគយពេកនោះទេ ប៉ុន្តែកម្ពុជាត្រូវប្រើប្រាស់ពេលវេលានេះ ដើម្បីពង្រឹងសេដ្ឋកិច្ចមូលដ្ឋាន។
លោកថា អ្វីដែលត្រូវមើលមុនគេនោះគឺថ្លៃអគ្គិសនីដែលនៅមានតម្លៃខ្ពស់នៅឡើយបើធៀបនឹងប្រទេសជិតខាង។ ថ្លៃអគ្គិសនីកម្ពុជាបច្ចុប្បន្ន មានតម្លៃចន្លោះពី ៤០០រៀល ទៅ ៧០០រៀល ក្នុងមួយគីឡូវ៉ាត់ ដែលចំនួននេះគឺស្មើនឹង ៣០% ទៅ ៥០% ខ្ពស់ជាងតម្លៃអគ្គិសនីរបស់ប្រទេសវៀតណាម និងឥណ្ឌូនេស៊ី។
លោកបញ្ជាក់ថា៖
«ប្រសិនបើយើងអាចកាត់បន្ថយថ្លៃអគ្គិសនីនេះត្រឹមតែ ២០% យើងអាចសន្សំបានរហូតដល់កន្លះពាន់លានដុល្លារក្នុងមួយឆ្នាំ ដែលចំនួននេះអាចយកទៅវិនិយោគលើវិស័យផ្សេងបានទៀត។ ចំណុចស្នូលទី២ គឺការកាត់បន្ថយថ្លៃដើមក្នុងវិស័យដឹកជញ្ជូន ដោយហេតុថា ថ្លៃផែ និងទូកុងតឺន័រនៅកម្ពុជា នៅមានតម្លៃខ្ពស់នៅឡើយ»។
អ្នកជំនាញរូបនេះបន្តគូសបញ្ជាក់ទៀតថា៖
«យើងក៏ត្រូវគិតគូរលើកម្លាំងពលកម្មឡើងវិញដែរ ព្រោះថាបច្ចុប្បន្នកម្លាំងពលកម្មកម្ពុជាភាគច្រើនជាស្ត្រី និងធ្វើការក្នុងវិស័យកាត់ដេរ ដូច្នេះ ត្រូវយកចិត្តទុកដាក់លើការបណ្ដុះបណ្ដាលជំនាញបន្ថែមសម្រាប់វិស័យផ្សេងទៀត ដូចជា អេឡិចត្រូនិក ការកែច្នៃអាហារ និងវាយនភណ្ឌជាដើម»។
លោកបានបញ្ជាក់ផងដែរថា កម្ពុជាក៏គួរសម្លឹងមើលការវិនិយោគលើវិស័យផ្សេងៗក្រៅពីវិស័យកាត់ដេរ និងជាពិសេស កាត់បន្ថយការពឹងផ្អែកខ្លាំងពេកទៅលើប្រទេសចិន ដែលអាចនឹងនាំឱ្យខាតប្រយោជន៍ផ្នែកសេដ្ឋកិច្ចជាមួយនឹងសហរដ្ឋអាម៉េរិក។
គួររំលឹកថា កាលពីថ្ងៃទី៣ ខែមេសា ឆ្នាំ២០២៥ ដែលត្រូវនឹងថ្ងៃទី២ ខែមេសា នៅសហរដ្ឋអាម៉េរិក លោក ដូណាល់ ត្រាំ បានសម្រេចកំណត់ពន្ធគយលើទំនិញនាំចូលពីកម្ពុជាប្រមាណ ៤៩%។ បន្ទាប់ពីការកំណត់យកពន្ធក្នុងអត្រា ៤៩%នេះ សម្ដេចនាយករដ្ឋមន្ត្រីកម្ពុជា បានផ្ញើលិខិតទៅលោក Donald J. Trump ដើម្បីស្នើចរចាលើការអនុវត្តពន្ធសម្រាប់ការនាំចេញរបស់កម្ពុជាទៅកាន់សហរដ្ឋអាម៉េរិក។
បន្ទាប់ពីការចរចាពន្ធបដិការវាងកម្ពុជា និងអាម៉េរិក នៅថ្ងៃទី៨ ខែកក្កដា ឆ្នាំ២០២៥ អាម៉េរិក បានសម្រេចទម្លាក់អត្រាពន្ធពី ៤៩% មកនៅ ៣៦% និងសម្រេចទម្លាក់ពី ៣៦% មកនៅត្រឹម ១៩% នៅថ្ងៃទី ១ខែសីហា។ ការណ៍នេះ បាននាំឱ្យកម្ពុជាក្លាយជាប្រទេសដែលទទួលបានការទម្លាក់ពន្ធច្រើនជាងគេលើពិភពលោក៕
Account
Security
Favourite Content