បរទេស ៖ ក្រោយការទន្ទឹងរង់ចាំអស់រយៈពេលជាច្រើនឆ្នាំ ទីបំផុតអតិថិជនដែលចាប់អារម្មណ៍ជាមួយនឹងយន្តហោះចម្បាំងបំបាំងកាយដ៏ទំនើបបំផុតរបស់ចិន J-35 នឹងអាចចាប់ផ្តើមចរចាបញ្ជាទិញពីរដ្ឋាភិបាលក្រុងប៉េកាំងបានហើយ។ យ៉ាងណាក៏ដោយ បើទោះបីជាការប្រកាសជាផ្លូវការពីដំណើរការលក់នៅមិនទាន់ត្រូវបានធ្វើឡើងក៏ដោយ ប៉ុន្តែបើយោងតាមការចេញផ្សាយរបស់ Interesting Engineering បានអះអាងថា J-35 ត្រូវបានរដ្ឋាភិបាលក្រុងប៉េកាំងដាក់បញ្ចូលជាយន្តហោះចម្បាំងជំនាន់ទី៥ទៅក្នុងសង្វាក់ផលិតទ្រង់ទ្រាយធំរបស់ខ្លួន។

ប្រភពដដែលនេះបានសរសេរទៀតថា រូបភាព និងវីដេអូជាច្រើនដែលបង្ហាញពី J-35 ស្ថិតនៅក្នុងគំរូពណ៌បៃតង (Sporting Green) ដែលអ្នកវិភាគអះអាងថា ជាពណ៌យន្តហោះថ្មីៗដែលកំពុងស្ថិតនៅក្នុងដំណាក់ការផលិត និងធ្វើតេស្តហោះហើរ។

យន្តហោះចម្បាំងទាំងនោះនៅមិនទាន់ធ្វើការលាបពណ៌សម្រេចចុងក្រោយនោះទេ ពីព្រោះថាវានឹងត្រូវផ្លាស់ប្តូរការរចនាមួយចំនួនទៀតទៅតាមការចង់បានរបស់ក្រុមអ្នកផលិត ឬអតិថិជន។ ការរៀបចំបែបនេះ វានឹងធ្វើឲ្យមានការចំណាយថវិកាតិច និងចំណេញពេលវេលាក្នុងការកែប្រែណាមួយ។ ដូច្នេះ ហេតុផលដែលយន្តហោះចម្បាំង J-35 ជាច្រើន ស្ថិតនៅក្នុងគំរូពណ៌ Sporting Green គឺកំពុងសំងំផលិតយន្តហោះបន្តបន្ទាប់បន្ថែមទៀត ពោលគឺមិនស្ថិតនៅក្នុងគំរូតែមួយ(one-off prototypes)ដែលផលិតសម្រាប់តែកងកម្លាំងយោធាចិននោះទេ។

Interesting Engineering បានសន្និដ្ឋានទៀតថា ដំណើរការផលិតបែបនេះ គឺមិនមែនជាការពិសោធ និងធ្វើតេស្តបច្ចេកវិទ្យាទៀតឡើយ ប៉ុន្តែវាគឺជាដំណើរការនៃការផលិតទ្រង់ទ្រាយធំសម្រាប់លក់។

គួរឲ្យដឹងដែរថា J-35 គឺជាយន្តហោះចម្បាំងដែលស្ថិតនៅក្រោមការផលិត និងអភិវឌ្ឍដោយក្រុមហ៊ុនរដ្ឋ Shenyang Aircraft Corporation (SAC)​ ដែលជាក្រុមហ៊ុនបុត្រសម្ព័ន្ធរដ្ឋ Aviation Industry Corporation of China (AVIC)។ កន្លងមកក្រុមហ៊ុននេះធ្លាប់បានប្តេជ្ញាចិត្តហើយថា នឹងបង្កើនផលិតកម្មផលិត J-35 របស់ខ្លួនឲ្យបានទ្វេដងនៅក្នុងរយៈពេល ៣ទៅ៥ឆ្នាំខាងមុខ។

SAC ធ្លាប់បានទទួលគម្រោងវិនិយោគប្រមាណជា ១,២ពាន់លានដុល្លារពីរដ្ឋាភិបាលក្រុងប៉េកាំងសម្រាប់ការអភិវឌ្ឍយន្តហោះចម្បាំងម៉ូដេលនេះ ហើយមានរោងចក្រសម្រាប់តែការផលិត J-35 ប៉ុណ្ណោះដែលមានផ្ទៃក្រឡារហូតដល់ទៅ ៤,២គីឡូម៉ែត្រការ៉េ។ អ្វីដែលគួរឲ្យចាប់អារម្មណ៍ពី J-35 គឺមិនត្រឹមតែសម្រាប់កងកម្លាំងយោធាអាកាសរបស់ចិននោះទេ ប៉ុន្តែវាក៏មានមុខងារអាចប្រតិបត្តិការបានជាមួយនឹងកងទ័ពជើងទឹកផងដែរ។ J-35 រចនាឡើងដើម្បីអាចប្រតិបត្តិការជាមួយនឹងនាវាផ្ទុកយន្តហោះចម្បាំងទាំងឡាយបាន ជាពិសេសបច្ចុប្បន្នគឺកំពុងធ្វើការជាមួយនឹងនាវាផ្ទុកយន្តហោះចម្បាំងរបស់ចិន Fujian រួចទៅហើយ ខណៈដែលតម្លៃនៃការលក់ចេញអាចក្នុងចន្លោះពី ៤០ ទៅ ៧០លានដុល្លារ ក្នុងមួយគ្រឿង៕