សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ចិន បានប្រកាសថា នឹងធានាសន្តិសុខផ្នែកថាមពលដល់កោះតៃវ៉ាន់ ប្រសិនបើកោះមួយនេះយល់ព្រមបង្រួបបង្រួមជាតិជាមួយនឹងខ្លួន និងស្ថិតនៅក្រោមការគ្រប់គ្រងរបស់ទីក្រុងប៉េកាំង នេះបើយោងតាមសេចក្ដីរាយការណ៍ពី CNA ។
កាលពីថ្ងៃពុធ សប្ដាហ៍នេះ លោក Chen Binhua អ្នកនាំពាក្យការិយាល័យកិច្ចការតៃវ៉ាន់នៃក្រុមប្រឹក្សាកិច្ចការរដ្ឋចិនបានលើកឡើងថា ការបង្រួបបង្រួមជាតិដោយសន្តិភាពនឹងនាំមកនូវការធានាសន្តិសុខថាមពល និងធនធានសម្រាប់កោះតៃវ៉ាន់។ ក្នុងន័យនេះ ចិន មានឆន្ទៈក្នុងការផ្តល់ឱ្យជនរួមជាតិតៃវ៉ាន់នូវថាមពល និងធនធានដែលមានស្ថិរភាព និងគួរឱ្យទុកចិត្ត ហើយពួកគេអាចមានជីវភាពរស់នៅកាន់តែប្រសើរឡើង។ យ៉ាងណាមិញ រដ្ឋាភិបាលកោះតៃវ៉ាន់មិនមានការឆ្លើយតបភ្លាមៗចំពោះការអត្ថាធិប្បាយនេះទេ ដែលមានន័យថា ពួកគេបដិសេធចំពោះការទាមទារអធិបតេយ្យភាពរបស់ទីក្រុងប៉េកាំង។
សូមជម្រាបថា ជាច្រើនឆ្នាំមកហើយ ចិនតែងតែផ្តល់សិទ្ធិស្វ័យភាព (ប្រទេសមួយ ប្រព័ន្ធពីរ) ដល់កោះតៃវ៉ាន់ ដែលមានន័យ ប្រសិនបើកោះតៃវ៉ាន់យល់ព្រមស្ថិតនៅក្រោមការគ្រប់គ្រងរបស់ទីក្រុងប៉េកាំង និងទទួលស្គាល់ថាខ្លួនជាទឹកដីរបស់ចិនដីគោក ពួកគេមានសិទ្ធិរក្សាប្រព័ន្ធសេដ្ឋកិច្ច និងរដ្ឋបាលផ្ទាល់ខ្លួន ។ យ៉ាងណាក៏ដោយ ទោះបីជាកោះតៃវ៉ាន់ច្រាលចោលសំណើនេះជាច្រើនដងក្តី ប៉ុន្តែចិនមិនដែលបោះបង់ការប្រើកម្លាំងដើម្បីអាចនាំកោះមួយនេះមកនៅក្រោមការគ្រប់គ្រងរបស់ខ្លួនឡើយ។ កាលពីខែតុលា ឆ្នាំ២០២៥ ចិនបានដាក់សំណើបង្រួបបង្រួមជាតិដល់កោះតៃវ៉ាន់ ដោយសារធានាការគាំទ្រផ្នែកសេដ្ឋកិច្ច ប៉ុន្តែត្រូវបានតៃវ៉ាន់បដិសេដ។
ដោយឡែក រហូតមកដល់បច្ចុប្បន្ននេះ រដ្ឋាភិបាលជុំវិញពិភពលោកកំពុងស្វែងរកការផ្គត់ផ្គង់ថាមពលជំនួសដោយសារសង្រ្គាមមជ្ឈិមបូព៌ា និងការបិទផ្លូវដឹកជញ្ជូនឆ្លងកាត់ច្រកសមុទ្រ Hormuz។ កាលពីថ្ងៃពុធដដែល ប្រធានាធិបតីតៃវ៉ាន់ លោក Lai Ching-te បានថ្លែងក្នុងកិច្ចប្រជុំមួយនៅទីក្រុងតៃប៉ិថា កោះតៃវ៉ាន់ទទួលបានការធានាពីការផ្គត់ផ្គង់ថាមពលទាំងសម្រាប់ខែនេះ និងខែក្រោយ ហើយឧស្ម័នពីអាម៉េរិកនឹងត្រូវបាននាំចូលកាន់តែច្រើនចាប់ពីខែមិថុនា។ លើសពីនេះ កោះតៃវ៉ាន់បានអនុម័តយុទ្ធសាស្រ្តសម្រាប់ការនាំចូលថាមពលដែលមានលក្ខណៈចម្រុះ និងពហុប្រភព។ ជាទូទៅ កោះតៃវ៉ាន់នាំចូលឧស្ម័នធម្មជាតិរាវ (LNG) ពីកាតា ១ ភាគ ៣ នៃចំនួនសរុបរបស់ខ្លួន ប៉ុន្តែឥឡូវនេះ ទទួលបានការធានាពីអាម៉េរិសម្រាប់ការផ្គត់ផ្គង់ជំនួសបានប៉ុន្មានខែខាងមុខទៀត និងមិនមានប្រភពនាំចូលពីចិននោះទេ៕
Account
Security
Favourite Content