បរទេស ៖ សហស្ថាបនិកវេបសាយចែករំលែកព័ត៌មានដ៏ល្បីល្បាញរបស់ពិភពលោក Wikipedia លោក Jimmy Wales ត្រូវបានចាត់ទុកថាគឺជាបុគ្គលដ៏ជោគជ័យម្នាក់នៅក្នុងភាពជាអ្នកជំនួញ និងអាជីវកម្មរបស់ខ្លួន។

ក្រៅតែពីមានមុខងារជាប្រធានក្រុមប្រឹក្សាភិបាលរបស់ Wikipedia ហើយនោះ បុរសវ័យ៥៦ឆ្នាំ ជនជាតិអាមេរិកកាត់អង់គ្លេសរូបនេះក៏មានតួនាទីជាសហស្ថាបនិកនៃវេបសាយស្វែងរកចំណូលរបស់ Wikipedia ដែលមានឈ្មោះថា Fandom ដែលពីដើមមានឈ្មោះថា Wikia ផង និងក៏ជាអ្នកគ្រប់គ្រងគម្រោងអនឡាញជោគជ័យជាច្រើនទៀតដូចជា Bomis, Nupedia, WikiTribune និង WT Social ផងដែរ។

ឆ្លងកាត់ការសិក្សាជាមួយនឹងជំនាញជាច្រើនរួមទាំងហិរញ្ញវត្ថុ និងបច្ចេកវិទ្យាព័ត៌មានវិទ្យាផងនោះ លោក Wales បានឆ្លងកាត់នូវការបរាជ័យជាច្រើនរួចមកហើយមុនពេលសម្រេចបានជោគជ័យដូចសព្វថ្ងៃ។

លោកធ្លាប់បានផ្តល់នូវដំបូន្មាន និងការចូលរួមធ្វើការចែករំលែកបទពិសោធជាច្រើនមកហើយជាមួយនឹងក្រុមសហគ្រិនជាច្រើន ប៉ុន្តែក្នុងនោះចំពោះសហគ្រិនវ័យក្មេង ឬសហគ្រិនថ្មីថ្មោងដែលទើបប្រឡូកចូលវិស័យអាជីវកម្ម លោកបានរៀបរាប់ពន្យល់ណែនាំឲ្យពួកគេគួរត្រៀមខ្លួនជាមួយនឹងចំណុចសំខាន់ៗចំនួន៤មុនពេលអាចឈានទៅដល់ផ្លូវដ៏ល្អប្រសើរក្នុងអាជីវកម្មបាន ៖

១- បរាជ័យញឹកញាប់ ៖ លោក Wales បាននិយាយថា អ្នកត្រូវតែរៀនទំលាប់ខ្លួនឲ្យបានជាមួយនឹងភាពបរាជ័យច្រើនលើកច្រើនសា ហើយនឹងបន្តព្យាយាមសាកល្បងមធ្យោបាយផ្សេងៗបន្ថែមទៀត។ គ្មានអ្វីដែលអាចសម្រេចបាន១០០ភាគរយពេលចាប់ផ្តើមដំបូងនោះទេ ប៉ុន្តែប្រសិនបើអាចនោះជារឿងដ៏ល្អបំផុតសម្រាប់អ្នក។ លោកថា បរាជ័យគឺជាពេលវេលាដ៏ល្អបំផុតក្នុងការកសាងខ្លួនឯងឲ្យកាន់តែរឹងម៉ាំលើគ្រប់ការងារសូម្បីតែការកាត់បន្ថយហនិភ័យ។

២- គ្មានអ្នកណាម្នាក់ខ្វល់ពីអ្វីដែលអ្នកកំពុងធ្វើនោះឡើយ ៖ ពិភពខាងក្រៅ និងសង្គមតែងតែធ្វើឲ្យសហគ្រិនភ័យខ្លាច ពីព្រោះកាលពីដំបូងខ្ញុំក៏ទទួលបាននូវភាពភ័យខ្លាច ព្រួយបារម្ភជាច្រើនដូចគ្នាដែរ។ តាមពិតជាក់ស្តែងគ្មានអ្នកណាម្នាក់ខ្វល់ពីអ្នកនោះទេ ឬសូម្បីតែចាប់អារម្មណ៍លើអ្វីដែលអ្នកកំពុងធ្វើ និងកាន់តែមិនខ្វល់ពេលដែលអ្នកបរាជ័យ។

៣- ផ្លាស់ប្តូរផ្នត់គំនិតជោគជ័យស្របតាមអ្វីដែលជាអ្នកខ្លួនឯង ៖ សហគ្រិនជោគជ័យជាច្រើនគឺជាគំរូដែលគួរឲ្យចង់ធ្វើតាម និងកោតសរសើរចំពោះសមត្ថភាព និងការព្យាយាមរបស់ពួកគេ ប៉ុន្តែអ្នកត្រូវចាំថា ពួកគេមានជីវិតខុសពីជីវិតរបស់អ្នក។ មជ្ឈដ្ឋានរស់នៅរបស់ពួកគេខុសពីមជ្ឈដ្ឋានរស់នៅរបស់អ្នក ហើយថែមទាំងសមត្ថភាពចំណេះដឹង និងបទពិសោធផងដែរ។ ដូច្នេះត្រូវការកំណត់ភាពជោគជ័យដោយខ្លួនឯងលើផ្លូវជារបស់ខ្លួនមិនមែនជាផ្លូវរបស់អ្នកដទៃធ្លាប់ធ្វើនោះទេ។

៤- កុំភ្លេចនូវមហិច្ចតាដំបូងដែលអ្នកចង់ក្លាយជាសហគ្រិន ៖ ខ្ញុំតែងតែនិយាយថា ខ្ញុំជាមនុស្សមានសំណាងដែលទទួលបានជោគជ័យជាបន្តបន្ទាប់ ប៉ុន្តែប្រសិនបើខ្ញុំមិនក្លាយជាសហគ្រិននោះទេ ពេលនេះខ្ញុំនឹងមានឈ្មោះត្រឹមជាបុគ្គលិកដែលគ្មានសមត្ថភាពម្នាក់ ពីព្រោះថាអ្វីដែលខ្ញុំចង់ចាកចេញពីភាពជានយោជិកនោះគឺជាឯករាជ្យ និងសេរីភាពនៃការងារតាមអ្វីដែលខ្ញុំចាប់អារម្មណ៍ប៉ុណ្ណោះដោយមិនខ្វល់ពីអ្វីផ្សេងឡើយ៕