បរទេស៖ យោងទៅតាមប្រភពព័ត៌មានពីរ៉យទ័រ បានរាយការណ៍ថា កិច្ចប្រជុំកំពូលមេដឹកនាំក្រុមប្រទេស G7 អាចនឹងមានការពិភាក្សាលើបញ្ហាប្រឈមពីចិន និង រុស្ស៊ី ខណៈដែលកិច្ចប្រជុំកំពូលនេះនឹងធ្វើឡើងនៅថ្ងៃសុក្រសប្តាហ៍នេះ ទីក្រុងហ៊ីរ៉ូស៊ីម៉ា ប្រទេសជប៉ុន មានរយៈពេល៣ថ្ងៃ ដែលជាការជួបជុំរវាងប្រទេសលទ្ធិប្រជាធិបតេយ្យជឿនលឿនរបស់ពិភពលោក ដើម្បីដោះស្រាយបញ្ហាប្រឈមមួយចំនួន ខណៈដែលពួកគេមានបំណងរៀបចំការរួបរួមប្រឆាំងនឹងបញ្ហាប្រឈមពីទីក្រុងប៉េកាំង និងទីក្រុងម៉ូស្គូផងដែរ។

ស្របពេលនេះដែរ មានប្រភពជាច្រើនកត់សម្គាល់ឃើញថាមានការបែងចែកនៅក្នុង G7 ជាពិសេសលើប្រទេសចិន ដោយប្រទេសនានាកំពុងដោះស្រាយពីរបៀបដើម្បីប្រឆាំងទៅនឹងអ្វីដែលពួកគេមើលឃើញថាជាការគំរាមកំហែងរបស់ចិនចំពោះខ្សែសង្វាក់ផ្គត់ផ្គង់ពិភពលោក និងសេដ្ឋកិច្ច។​ មិនត្រឹមតែប៉ុណ្ណោះ រុស្ស៊ី និង ចិននឹងគ្មានវត្តមាននៅក្នុងកិច្ចប្រជុំកំពូលនេះទេ។ លើសពីនេះ មេដឹកនាំទាំងនេះនឹងពិភាក្សាអំពីការព្រួយបារម្ភលើ “ការបង្ខិតបង្ខំផ្នែកសេដ្ឋកិច្ច’’ ដោយប្រទេសចិនលើប្រទេសផ្សេងទៀត ដែលវាមានការប៉ះពាល់កដល់ទំនាក់ទំនងរបស់ពួកគេនៅបរទេស។ ការពិភាក្សានេះក៏ជាផ្នែកនៃសេចក្តីថ្លែងការណ៍រួមរបស់ពួកគេ ដោយត្រូវបានកំណត់ថានឹងរួមបញ្ចូលចំណុចជាក់លាក់ណាមួយចំពោះចិន។ “ការបង្ខិតបង្ខំផ្នែកសេដ្ឋកិច្ច’’ សំដៅលើ ការគំរាមគំហែង ឬ ការកំណត់តម្លៃសេដ្ឋកិច្ចលើប្រទេសណាមួយដោយប្រទេសមួយទៀតក្នុងគោលបំណងទាញយកប្រយោជន៍ពីគោលនយោបាយ។

Narushige Michishita សាស្ត្រាចារ្យនៅវិទ្យាស្ថានជាតិគោលនយោបាយ (GRIPS) នៅទីក្រុងតូក្យូបាននិយាយថា របៀបដែល G7 ដោះស្រាយជាមួយនឹងមហាអំណាចប្រកួតប្រជែង គឺជាបញ្ហាសំខាន់សម្រាប់កិច្ចប្រជុំកំពូលមួយនេះ ដោយសារពួកគេត្រូវដោះស្រាយលើសន្តិសុខសេដ្ឋកិច្ច និង បញ្ហាបច្ចេកវិទ្យា។ វាគឺជាផ្នែកមួយនៃការប្រកួតប្រជែងមហាអំណាចដែលកំពុងកើតឡើងរវាងសហរដ្ឋអាមេរិក និងរុស្ស៊ី និងសហរដ្ឋអាមេរិក និងចិន។ មន្ត្រីរដ្ឋបាលជាន់ខ្ពស់របស់សហរដ្ឋអាមេរិក បានលើកឡើងផងដែរថា កិច្ចប្រជុំកំពូលនេះនឹងមានការរួបរួមគ្នារបស់មេដឹកនាំនៅពីក្រោយវិធីសាស្រ្តរួមមួយចំនួនចំពោះចិន ទោះបីជាវាជាបញ្ហាស្មុគស្មាញសម្រាប់កិច្ចប្រជុំនេះក៏ដោយ។ ប្រភពមកពី​រដ្ឋាភិបាល​ជាន់​ខ្ពស់​របស់អាល្លឺម៉ង់​បាន​បង្ហើបឲ្យដឹង​ថា វា​នឹង​មាន​សេចក្តី​ប្រកាស​មួយ​ចំនួន​ទៀត​ដែល​រួម​មាន​បញ្ហា​អ៊ុយក្រែន ភាព​ធន់​នឹង​សេដ្ឋកិច្ច និង​សន្តិសុខ សន្តិសុខ​ស្បៀង​អាហារ និង​ បញ្ហាផ្សេងៗ​ទៀត។ លើសពីនេះ មន្ត្រីរដ្ឋាភិបាលបារាំងម្នាក់បាននិយាយថា វាក៏ជាបញ្ហាភូមិសាស្ត្រនយោបាយមួយផងដែរ ដែលនឹងដោះស្រាយវិបត្តិសន្តិសុខពិភពលោកដ៏ធំមួយ ដោយសារតែភាពតានតឹងរវាងប្រទេសចិន និងសហរដ្ឋអាមេរិកកំពុងកើនឡើង។ មិនត្រឹមតែប៉ុណ្ណោះ មេដឹកនាំមកពីប្រទេសមួយចំនួនទៀតដូចជា ឥណ្ឌា និងវៀតណាម ក៏ស្ថិតក្នុងចំណោមអ្នកដែលអាចនឹងចូលរួមជាអ្នកសង្កេតការណ៍ផងដែរ។ ស្របពេលនេះដែរ G7 កំពុងចាប់អារម្មណ៍លើតំបន់ ‘’’Global South’’ របស់ពិភពលោក (សំដៅលើអាមេរិកឡាទីន អាហ្វ្រិក អាស៊ី និង អូសេអានី) ដើម្បីប្រឆាំងនឹងអំណាចរបស់ចិននៅលើឆាកអន្តរជាតិ។

កាលពីខែមេសាកន្លងទៅនេះ កិច្ចប្រជុំរបស់រដ្ឋមន្ត្រីការបរទេស G7 បានទទួលស្គាល់អំពីតម្រូវការដើម្បីធ្វើការរួមគ្នាជាមួយចិនលើបញ្ហាប្រឈមជាសកល និងបានអំពាវនាវឱ្យទីក្រុងប៉េកាំងដើរតួជាសមាជិកដែលមានការទទួលខុសត្រូវលើឆាកអន្តរជាតិ។ គួរឲ្យបញ្ជាក់ផងដែរថា សមាជិកប្រទេស G7 ដូចជាសហរដ្ឋអាមេរិក ជប៉ុន អាល្លឺម៉ង់ ចក្រភពអង់គ្លេស បារាំង កាណាដា និងអ៊ីតាលី សុទ្ធតែមានទំនាក់ទំនងយ៉ាងជិតស្និទ្ធផ្នែកសេដ្ឋកិច្ចជាមួយចិន ដែលជាសេដ្ឋកិច្ចធំទីពីររបស់ពិភពលោក ហើយក៏ជាមូលដ្ឋានផលិតកម្មសម្រាប់ទីផ្សារសកលលោកដ៏សំខាន់ផងដែរ។ មួយវិញទៀតនោះ ក្រុមប្រទេស G7 មានគម្រោងរឹតបន្តឹងទណ្ឌកម្មលើរុស្ស៊ីដោយសំដៅទៅលើថាមពល និងការនាំចេញដែលជួយដល់ការចាយវាយលើសង្គ្រាមរបស់ទីក្រុងម៉ូស្គូ។ វិធានការថ្មីនេះនឹងកំណត់គោលដៅការគេចវេសពីការដាក់ទណ្ឌកម្មពាក់ព័ន្ធនឹងពួកប្រទេសទី៣ និង ព្យាយាមធ្វើឱ្យខូចដល់ការផលិតថាមពលនាពេលអនាគតរបស់រុស្ស៊ី ដើម្បីទប់ស្កាត់ពាណិជ្ជកម្មដែលគាំទ្រដល់យោធារបស់រុស្ស៊ី។ ដូច្នោះហើយ ការឆ្លើយតបរបស់អឺរ៉ុបចំពោះបញ្ហាប្រឈមពីភាពតានតឹងរវាងមហាអំណាចក៏មានសារៈសំខាន់ផងដែរ ខណៈដែលជប៉ុនដែលផ្តោតសំខាន់ទៅលើសារៈសំខាន់នៃសណ្តាប់ធ្នាប់អន្តរជាតិ និងព្រួយបារម្ភថា សកម្មភាពរបស់រុស្ស៊ីប្រឆាំងនឹងអ៊ុយក្រែនអាចជំរុញសកម្មភាពរបស់ចិនប្រឆាំងនឹងកោះតៃវ៉ាន់៕