សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ស្ថានភាពវិបត្តិរបស់ក្រុមហ៊ុនផលិតយន្តហោះដឹកអ្នកដំណើរប៊ូអ៊ីងកំពុងកាន់តែលំបាកក្នុងពេលដែលកេរ្ត៍ឈ្មោះរបស់ខ្លួនជួបបញ្ហាបច្ចេកទេសសុវត្ថិភាពហាក់កំពុងធ្លាក់ចុះខ្លាំងក្រោយហេតុការណ៍អាក្រក់កើតឡើងជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ។
ខណៈពេលដែលក្រុមហ៊ុនផលិតយន្តហោះរបស់សហរដ្ឋអាមេរិកកំពុងតស៊ូដើម្បីជម្នះនឹងវិបត្តិសុវត្ថិភាពលើយន្តហោះរបស់ខ្លួនោះ នៅសប្តាហ៍នេះ ប្រធានផ្នែកពាណិជ្ជកម្មថ្មីរបស់ខ្លួនបានចេញមកថ្លែងអះអាងថា ក្រុមហ៊ុនប៊ូអ៊ីង (Boeing) កំពុងរៀបចំ និងធ្វើឲ្យប្រសើរឡើងវិញនៃសង្វាក់ផលិតកម្មនៅរោងចក្រផលិតយន្តហោះម៉ូដែល 737 MAX។
ក្នុងអំឡុងពេលមានវត្តមាននៅទីក្រុងឡុង មុនព្រឹត្តិការណ៍ Farnborough Airshow នៅសប្តាហ៍នេះ លោកស្រី Stephanie Pope បានធ្វើសេចក្តីថ្លែងការណ៍អំពីដំណោះស្រាយដែលក្រុមហ៊ុន Boeing កំពុងធ្វើការផ្លាស់ប្តូរ គឺធ្វើឡើងជាមួយនឹងរោងចក្រដែលស្ថិតនៅទីក្រុង Seattle ។
នៅក្នុងសុន្ទរកថាលើកដំបូងរបស់លោកស្រីក្រោយពេលបានកាន់តំណែងថ្មីកាលពីដើមឆ្នាំកន្លងទៅនេះ នៅចំពោះមុខប្រព័ន្ធផ្សព្វផ្សាយជាច្រើន លោកស្រី Pope បានបញ្ជាក់ថា ៖ នេះមិនមែនជាការផ្លាស់ប្តូរតូចតាចឡើយ ប៉ុន្តែជាការផ្លាស់ប្តូរដែលគួរឲ្យកត់សំគាល់បំផុតរបស់ក្រុមហ៊ុនពាក់ព័ន្ធទៅនឹងប្រព័ន្ធការពារសុវត្ថិភាព។
គួររំលឹកដែរថា មួយរយៈចុងក្រោយនេះ យន្តហោះ Boeing បានបន្តជាប់គាំងនៅក្នុងវិបត្តិនៃប្រព័ន្ធសុវត្ថិភាព ជាពិសេសនៅក្នុងអំឡុងមួយរយៈចុងក្រោយនេះ បន្ទាប់ពីបន្ទះកាប៊ីននៅលើយន្តហោះ 737 MAX 9 បានធ្លាក់ពីលើអាកាសកាលពីក្នុងខែមករា ដែលហេតុការណ៍នេះបានបង្កឲ្យមានភាពយឺតយ៉ាវក្នុងការផលិតយន្តហោះដែលលក់ដាច់បំផុតរបស់ខ្លួន ក៏ដូចជាការបង្កើនការត្រួតពិនិត្យផ្នែកច្បាប់ និងបទប្បញ្ញត្តិកាន់តែតឹងរឹងឡើង។
កន្លងមកនេះ ក្រសួងយុត្តិធម៌បានធ្វើការផ្សព្វផ្សាយអំពីឯកសារមួយចំនួនផងដែរថា ក្រុមហ៊ុន Boeing បានយល់ព្រមទទួលកំហុសចំពោះការចោទប្រកាន់ពីបទសមគំនិតក្លែងបន្លំផ្នែកព្រហ្មទណ្ឌលើការស៊ើបអង្កេតពាក់ព័ន្ធនឹងការធ្លាក់យន្តហោះ 737 MAX ចំនួនពីរលើកកាលពីមុននោះ ប៉ុន្តែទោះជាយ៉ាងណាក្តី លោកស្រី Pope បានបដិសេធមិនធ្វើអត្ថាធិប្បាយទៅលើបញ្ហានេះលម្អិតនោះទេ។
គួរឲ្យដឹងដែរថា លោកស្រី Pope បានក្លាយជានាយកប្រតិបត្តិទទួលបន្ទុកផ្នែកពាណិជ្ជកម្មរបស់ក្រុមហ៊ុន Boeing ដែលជាផ្នែកមួយនៃការរុះរើការគ្រប់គ្រងដ៏ធំមួយក្នុងប្រវត្តិសាស្ត្រក្រោយពេលដែលនាយកប្រតិបត្តិក្រុមហ៊ុន លោក David Calhoun លាលែងពីដំណែងកាលពីចុងឆ្នាំកន្លងទៅ ហើយគេមើលឃើញថា លោកស្រីក៏នឹងក្លាយទៅជាបេក្ខភាពដ៏មានសក្តានុពលសម្រាប់មុខតំណែងមួយនេះផងដែរ៕
Account
Security
Favourite Content