បរទេស ៖ អាជ្ញាធរជាតិនៃចក្រភពអង់គ្លេសទទួលបន្ទុកកិច្ចការងារសេវាកម្មប្រកាសក្ស័យធនរបស់ចក្រភពអង់គ្លេស ( Insolvency Service) កាលពីចុងសប្តាហ៍មុនបានប្រកាសជាផ្លូវការអំពីអត្រានៃការបិទទ្វារនៃបណ្តាក្រុមហ៊ុនជាច្រើនទាំងនៅក្នុងប្រទេសអង់គ្លេសថា បានហក់ឡើងដល់ចំណុចខ្ពស់បំផុតមិនធ្លាប់មានក្នុងរយៈពេលជាងមួយឆ្នាំចុងក្រោយនេះ។

យោងតាមទិន្នន័យដែលចេញដោយ Insolvency Service បានបង្ហាញថា សកម្មភាពប្រកាសក្ស័យធននៅក្នុងចក្រភពអង់គ្លេសបានធ្លាក់ចុះដល់ចំនួនអាក្រក់បំផុតកាលពីក្នុងខែមិថុនាដោយសារតែការកើនឡើងអត្រាការប្រាក់នៅតែបន្តធ្វើឲ្យការចាយវាយ និងចំណាយថ្លៃដើមរបស់ពួកគេមានតម្លៃខ្ពស់ខ្លាំងពេកដើម្បីរកចំណូលមកទប់ទល់។

តាមរយៈតួលេខដដែលបានបង្ហាញថា ក្រុមហ៊ុន និងអាជីវកម្មតូចធំប្រមាណជា ២៣៦១បានប្រកាសបិទទ្វារជាផ្លូវការកាលពីខែមិថុនាដែលស្ថិតនៅក្នុងអត្រាកើនឡើងដល់ទៅ១៧ភាគរយធៀបទៅនឹងខែមិថុនាកាលពីឆ្នាំ២០២៣។ អត្រានេះគឺជាតួលេខដ៏ខ្ពស់បំផុតគិតចាប់តាំងតែពីខែឧសភា ឆ្នាំ២០២៣ និងជាអត្រាបិទទ្វារដ៏អាក្រក់បំផុតទី៣គិតចាប់តាំងតែពីឆ្នាំ២០០០។

ក្នុងនោះគេសង្កេតឃើញថា ក្រុមហ៊ុនក្នុងវិស័យសំណង់បានទទួលរងផលប៉ះពាល់ខ្លាំងជាងគេបំផុត ខណៈដែលស្ថានភាពទីផ្សារលំនៅដ្ឋានមានភាពទន់ខ្សោយនៅឡើយដោយប្រមាណជា១៧០០ក្រុមហ៊ុនបានប្រកាសក្ស័យធនគិតចាប់តាំងតែពីខែមករាដល់ខែឧសភា ឆ្នាំ២០២៤នេះ។

ដោយឡែកក្នុងវិស័យឧស្សាហកម្មពាណិជ្ជកម្មវិញ មានទាំងក្រុមហ៊ុនអ្នកលក់រាយ និងក្រុមហ៊ុនអ្នកលក់ដុំ ក៏ដូចជាបណ្តាក្រុមហ៊ុនផ្តល់សេវាកម្មស្នាក់នៅ និងសេវាកម្មអាហារភោជនីយដ្ឋាន បារ បូកសរុបចូលគ្នាមានចំនួនដល់ទៅ ៣០០០ក្រុមហ៊ុនបានប្រកាសបិទអាជីវកម្ម។

អ្នកជំនាញនៃក្រុមហ៊ុន ReSolve ដែលជាក្រុមហ៊ុនជួយរៀបចំ និងប្រឹក្សាបើកដំណើរការក្រុមហ៊ុនដ៏ល្បីនៅអង់គ្លេសបានលើកឡើងថា៖ ដោយសារតែបញ្ហាកើនឡើងនៃអត្រាការប្រាក់និងអត្រាប្រាក់ខែកើនឡើងគឺជាបញ្ហាធំចំបងសម្រាប់បណ្តាម្ចាស់ក្រុមហ៊ុន និងអាជីវកម្មទាំងអស់នៅពេលនេះ។
លោកបន្តថា៖ អត្រាការប្រាក់បានកើនឡើងដល់ចំណុចមួយដែលមិនធ្លាប់មានឡើយនៅចក្រភពអង់គ្លេសក្នុងរយៈពេលជាងមួយទសវត្សរ៍ចុងក្រោយនេះ វាបានបណ្តាលឲ្យតម្លៃថ្លៃដើមនៃការធ្វើកម្ចីគ្រប់ប្រភេទមានការកើនឡើងដូចគ្នាបូករួមទាំងអត្រាអតិផរណាខ្ពស់ផង និងបញ្ហាទំនុកចិត្តធ្លាក់ចុះនៃការចាយវាយរបស់អ្នកប្រើប្រាស់ ដែលជាលទ្ធផលតារាងតុល្យការប្រាក់ចំណូល និងចំណេញរបស់ក្រុមហ៊ុនទាំងនោះមិនមានភាពល្អប្រសើរឡើយ៕