បរទេស ៖ យោងតាមប្រភពព័ត៌មានពី BBC បានរាយការណ៍ថា អាជ្ញាធរប្រេស៊ីលសម្រេចផ្អាកការសាងសង់រោងចក្ររថយន្តអគ្គិសនីចិន BYD ដោយសារកម្មកររស់នៅក្នុងលក្ខខណ្ឌស្រដៀងគ្នាទៅនឹងទាសភាព។

យោងតាមសេចក្តីថ្លែងការណ៍របស់ការិយាល័យអយ្យការការងារសាធារណៈ (MPT) បានឱ្យដឹងថា កម្មករជាង ១៦០ នាក់ត្រូវបានជួយសង្គ្រោះនៅក្នុងរដ្ឋ Bahia ភាគឦសាននៃប្រទេសប្រេស៊ីល។ ពួកគេ​រស់នៅ និងធ្វើការ​ក្នុង​បរិយាកាស​ដ៏អាក្រក់បំផុត ខណៈដែល​លិខិត​ឆ្លង​ដែន​ និង​ប្រាក់​ខែ​របស់​ពួក​គេ​ត្រូវ​បាន​ក្រុមហ៊ុន​សាងសង់​លាក់ទុក។

កម្មករទាំងនោះត្រូវបានជួលដោយក្រុមហ៊ុនសាងសង់ Jinjiang Construction Brazil។ ក្រុមហ៊ុននេះបែងចែកកន្លែងរស់នៅចំនួន៤សម្រាប់កម្មករនៅក្នុងទីក្រុង Camaçari ដោយមានកន្លែង​មួយ​នោះ កម្មករ​ត្រូវដេក​លើ​គ្រែ​ដោយ​គ្មាន​ពូក។ មិនត្រឹមតែប៉ុណ្ណោះ បន្ទប់ទឹកនីមួយៗត្រូវចែករំលែកក្នុងចំណោមកម្មករ ៣១ នាក់ផងដែរ ដោយបង្ខំឱ្យពួកគេត្រូវក្រោកពីព្រលឹម ដើម្បីរបៀបចំខ្លួនសម្រាប់ការងារ។ MPT លើកឡើងថា លក្ខខណ្ឌដែលបានរកឃើញនៅក្នុងកន្លែងស្នាក់នៅរបស់កម្មករបង្ហាញជារូបភាពគួរឱ្យព្រួយបារម្ភ។ ច្បាប់ប្រេស៊ីលបានកំណត់ថា លក្ខខណ្ឌដូចទាសភាពរួមមានការជាប់បំណុល និងការងារដែលបំពានសេចក្តីថ្លៃថ្នូររបស់មនុស្ស។ MPT បានបន្ថែមថា ស្ថានភាពនេះក៏បង្កើតជាពលកម្មដោយបង្ខំផងដែរ ដោយសារកម្មករជាច្រើនទទួលបានប្រាក់ឈ្នួលតិច ឬ ត្រូវបានកាត់ប្រាក់ខែ។ ប្រសិនបើពួកគេចង់បញ្ចប់កិច្ចសន្យាការងារ ពួកគេត្រូវប្រឈមមុខនឹងការចំណាយច្រើនទៅលើសំណង។

ជាការឆ្លើយតប BYD បាននិយាយនៅក្នុងសេចក្តីថ្លែងការណ៍មួយថា ខ្លួនបានកាត់ផ្តាច់ទំនាក់ទំនងជាមួយក្រុមហ៊ុនដែលពាក់ព័ន្ធ ហើយនៅតែប្តេជ្ញាចិត្តចំពោះការអនុលោមតាមច្បាប់ពេញលេញរបស់ប្រទេសប្រេស៊ីល។ BYD បន្ថែមថា កម្មករដែលរងផលប៉ះពាល់នឹងត្រូវបានផ្លាស់ប្តូរទៅសណ្ឋាគារ។ លើសពីនេះ BYD ធ្លាប់បានធ្វើការត្រួតពិនិត្យលម្អិតឡើងវិញលើលក្ខខណ្ឌការងារ និងការរស់នៅសម្រាប់និយោជិតជាប់កិច្ចសន្យា ហើយបានស្នើសុំឱ្យក្រុមហ៊ុនសំណង់ធ្វើការកែលម្អជាច្រើនដងមកហើយ។

គួរឲ្យបញ្ជាក់ដែរថា រោងចក្រនៅប្រេស៊ីលនេះគ្រោងនឹងដំណើរការនៅខែមីនា ឆ្នាំ ២០២៥ ហើយត្រូវបានកំណត់ថាជារោងចក្រ EV ដំបូងបង្អស់របស់ BYD នៅខាងក្រៅអាស៊ី។  BYD មានឈ្មោះពេញថា Build Your Dreams គឺជាក្រុមហ៊ុនផលិតរថយន្ត EV ដ៏ធំបំផុតមួយរបស់ពិភពលោក។ ក្នុងរយៈពេល៣ខែចុងក្រោយនៃឆ្នាំ២០២៣ វាបានលក់រថយន្តអគ្គិសនីច្រើនជាងរថយន្ត Tesla របស់ Elon Musk។ ឥឡូវនេះ ម៉ាករថយន្តទាំងពីរកំពុងប្រជែងគ្នាដណ្តើមតំណែងកំពូលនៅក្នុងវិស័យនេះ។  ក្នុងរយៈពេលប៉ុន្មានឆ្នាំមកនេះ BYD បានពង្រីកទីតាំងរបស់ខ្លួននៅក្នុងប្រទេសប្រេស៊ីល ដែលជាទីផ្សារក្រៅប្រទេសដ៏ធំបំផុតមួយរបស់ខ្លួន។ កាលពីឆ្នាំ២០១៥ ក្រុមហ៊ុននេះបាន​បើក​រោងចក្រ​ដំបូង​នៅ​ទីក្រុង​សៅប៉ូឡូ ដែល​ផលិត​តួ​រថយន្ត​ក្រុង​អគ្គិសនី។ កាលពីឆ្នាំមុន BYD ប្រកាសថា ខ្លួននឹងវិនិយោគប្រហែល ៤៨២,២ លានដុល្លារនៅក្នុងប្រទេសប្រេស៊ីល ដើម្បីសាងសង់រោងចក្រផលិត EV ។

ការលក់រថយន្តអគ្គិសនី EV នៅក្នុងប្រទេសចិនត្រូវបានជំរុញដោយការឧបត្ថម្ភធនរបស់រដ្ឋាភិបាល ដែលលើកទឹកចិត្តអ្នកប្រើប្រាស់ផ្លាស់ប្តូរពីរថយន្តប្រើសាំងទៅជារថយន្ត EV ឬរថយន្តកូនកាត់។ យ៉ាងណាមិញ ករណីនេះបង្កជាការប្រតិកម្មកាន់តែខ្លាំងឡើងនៅបរទេស ដែលពួកគេមើលឃើញថាជាការគាំទ្រដោយអយុត្តិធម៌របស់រដ្ឋាភិបាលចិនចំពោះក្រុមហ៊ុនផលិតរថយន្តក្នុងស្រុក។ ជាមួយគ្នានេះដែរ ទីផ្សារធំៗដូចជាសហរដ្ឋអាម៉េរិក និងសហភាពអឺរ៉ុប បានដាក់ពន្ធលើរថយន្តអគ្គិសនី EV ពីប្រទេសចិន។ មិនត្រឹមតែប៉ុណ្ណោះ ពន្ធអាចនឹងត្រូវបានដាក់បន្ថែមទៀត ពេលដែលប្រធានាធិបតីជាប់ឆ្នោត Donald Trump ចូលកាន់តំណែង៕