សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋានគណៈកម្មការសេដ្ឋកិច្ច និងធុរកិច្ចឌីជីថល បានលើកទឹកចិត្តដល់ធុរជន ក៏ដូចជាសាធារណជនទូទៅ ចូលរួមចាប់យកបច្ចេកវិទ្យាឌីជីថល និងប្រើប្រាស់ថ្នាល់ឌីជីថល ដើម្បីទាញយកអត្ថប្រយោជន៍ជាអតិបរិមា សំដៅជំរុញការអភិវឌ្ឍសេដ្ឋកិច្ច និងសង្គមឌីជីថលកម្ពុជាឱ្យកាន់តែមានភាពរស់រវើក ។
នៅក្នុងវេទិការសេដ្ឋកិច្ចឌីជីថល ២០២៥ ដែលរៀបចំឡើងនៅសណ្ឋាគារ អូកវូដ កាលពីថ្ងៃទី១១ និង១២ ខែមីនា ឆ្នាំ ២០២៥ ឯកឧត្តម គង់ ម៉ារី បានគូសរំលេចពីការវិវត្តយ៉ាងឆាប់រហ័សនៃបច្ចេកវិទ្យាឌីជីថល និងសក្ដានុពលនៃការចាប់យកឌីជីថលក្នុងការជំរុញសម្ទុះ កំណើនសេដ្ឋកិច្ចឌីជីថលនៅកម្ពុជា តាមរយៈការនាំយកនូវគំរូធុរកិច្ចថ្មី ការលើកកម្ពស់នវានុវត្តន៍ និងការបង្កើនផលិតភាព និងប្រសិទ្ធភាពការងារ ទាំងក្នុងវិស័យឯកជន និងសេដ្ឋកិច្ចទាំងមូល ។
ក្នុងវេទិកាសេដ្ឋកិច្ចឌីជីថល ២០២៥ មានបទបង្ហាញចំនួន ៥ និងកិច្ចពិភាក្សាចំនួន ៤ ដែលផ្ដោតលើទិដ្ឋភាពរួមនៃសេដ្ឋកិច្ច និងសង្គមឌីជីថល, ការធ្វើបរិវត្តកម្មឌីជីថលសម្រាប់សហគ្រាស, អក្ខរកម្ម និងជំនាញឌីជីថលសម្រាប់សហគ្រាស, សន្តិសុខសាយប័រ ការការពារទិន្នន័យ ទ្រព្យសម្បត្តិឌីជីថល និងការទូទាត់ប្រាក់ឌីជីថល ។ បទបង្ហាញនីមួយៗ បានផ្ដល់ព័ត៌មានជាមូលដ្ឋានសម្រាប់កិច្ចពិភាក្សាយ៉ាងផុសផុល ហើយនឹងទទួលបានធាតុចូលសំខាន់ៗពីវាគ្មិនកិតិ្តយស និង អ្នកចូលរួម ។
វេទិកាសេដ្ឋកិច្ចឌីជីថលត្រូវបានធ្វើឡើងក្រោមគោលបំណង សំខាន់ៗរួមមាន លើកកម្ពស់ការផ្សព្វផ្សាយចំណេះដឹងអំពីបច្ចេកវិទ្យាឌីជីថល ជំនាញ និងសារៈសំខាន់នៃការចាប់យកឌីជីថលនៅក្នុងយុគសម័យសេដ្ឋកិច្ចឌីជីថល, បង្កើនការចែករំលែកទស្សនទាន គំនិតនវានុវត្តន៍ និង បទពិសោធន៍ថ្មីៗ ពាក់ព័ន្ធសេដ្ឋកិច្ចឌីជីថលនិង ជំរុញការកសាងបណ្ដាញទំនាក់ទំនង និងសហគមន៍ធុរកិច្ច និងសេដ្ឋកិច្ចឌីជីថលនៅកម្ពុជា។
ជាលទ្ធផលនៃវេទិកានេះមានអ្នកចូលរួមសរុបចំនួន ២៥៦ នាក់នៅថ្ងៃទី ១ និង ចំនួន ១៤៨ នាក់ នៅថ្ងៃទី ២ ដែលបានបញ្ចប់ទៅដោយរលូន តាមរយៈការផ្ដល់វេទិកាដែលបង្កើតឱ្យមានការជជែកពិភាក្សាពីសេដ្ឋកិច្ចឌីជីថល។ គណៈកម្មាធិការសេដ្ឋកិច្ច និងធុរកិច្ចឌីជីថល នឹងបន្តឱ្យមានការរៀបចំវេទិកាបែបនេះបន្តទៀតនៅឆ្នាំបន្តបន្ទាប់។
Account
Security
Favourite Content