បន្ទាប់ពីព័ត៌មានស្រូវធ្លាក់ថ្លៃនៅដើមឆ្នាំ២០២៥នេះ ប៉ុន្តែមកទល់ពេលនេះ កសិករដាំពោតក្រហម និង ដំឡូងមី ហាក់មានសង្ឃឹមលក់បានថ្លៃឡើងវិញហើយ ដោយសារក្រុមហ៊ុនធំៗចំនួន ៦ កំពុងរង់ចាំទិញកសិផលពីកសិករយើងក្នុងបរិមាណដ៏ច្រើន។​

លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម នៅព្រឹកថ្ងៃទី១៩ ខែមីនា ឆ្នាំ២០២៥នេះ បានអញ្ជើញជាអធិបតីក្នុងពិធីចុះអនុស្សរណៈយោគយល់គ្នាស្តីពីកិច្ចសហប្រតិបត្តិការជំរុញ​ការប្រមូលទិញផលិតផលពោតក្រហម ដំឡូងមី និងវត្ថុធាតុដើមដទៃទៀតរវាងក្រសួងពាណិជ្ជកម្ម និងក្រុមហ៊ុនផលិតចំណីសត្វចំនួន៦ រួមមាន ក្រុមហ៊ុនអិមភីក អេស៊ីអិមស៊ី (ខេមបូឌា), ក្រុមហ៊ុនបេតាហ្រ្គោ (ខេមបូឌា) ខមភេនី លីមីធីត, ក្រុមហ៊ុនអេហ្រ្គី-ម៉ាស្ទ័រ ខូអិលធីឌី, ក្រុមហ៊ុន ឌឹ ហឺស្ស ធីអិមអេច, ក្រុមហ៊ុន អេ អេន ធី ហ្វីដ ឯ.ក, និងក្រុមហ៊ុន ស៊ីជេ ជេលជីដាងហ្វីដ (ខេមបូឌា) ខូអិលធីឌី។

អនុស្សរណៈនៃការយោគយល់គ្នានេះ ក្រសួងពាណិជ្ជកម្ម នឹងសហការសម្របសម្រួល​ជាមួយក្រុមហ៊ុនទាំង៦ ដើម្បីប្រមូលទិញពោតក្រហមចំនួន ១៨៩ ០០០ តោន ដំឡូងមីចំនួន ៨១ ៦០០ តោន កញ្ជុងអង្ករចំនួន ៥១ ១៣០ និងកន្ទក់ចំនួន ៥៧ ៧៣០ តោន។ ទាំងនេះបានបង្ហាញឱ្យឃើញពីការចូលរួមជំរុញការវិនិយោគទៅលើការកែច្នៃកសិផលនៅក្នុងស្រុក ក៏ដូចជាបង្កើនគុណតម្លៃ និងការពង្រឹងខ្សែច្រវាក់តម្លៃផលិតផល ស្របពេលដែលកម្ពុជាកំពុងតែជួបប្រទះបញ្ហាការកើនឡើងថ្លៃដើមចំណីសត្វ ព្រមទាំងបង្កើនឱកាសធុរកិច្ច ក្នុងការអភិវឌ្ឍន៍វិស័យកសិ-ពាណិជ្ជកម្ម និងលើកស្ទួយសេដ្ឋកិច្ច-សង្គមប្រកបដោយបរិយាប័ន្ន។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានឱ្យដឹងថាកិច្ចសហការជាមួយក្រុមហ៊ុនទាំង ៦ខាងលើ ធ្វើឡើងដើម្បីលើកទឹកចិត្ត និងជំរុញចលនានៃផលិតផលកសិកម្ម ដោយធានាបាននូវតម្លៃសមរម្យទៅតាមទីផ្សារ ដើម្បីកាត់បន្ថយការព្រួយបារម្ភនាពេលកន្លងមក ដោយពេលខ្លះនៅពេលរដូវប្រមូលផលតម្លៃ​ធ្លាក់ថ្លៃ ឬពេលខ្លះគ្មានទីផ្សារសម្រាប់នាំចេញតែម្តង។

ឯកឧត្តមបន្តថា នេះមិនមែនជាលើកទីមួយនោះឡើយដែលក្រសួងចុះអនុស្សារណៈយោគ យល់គ្នាជាមួយឯកជន ប៉ុន្តែបានធ្វើជារឿយៗដើម្បីដាក់លក់ផលិតផលខ្មែរនៅតាមផ្សារ ទំនើប តាមស្ថានីយ៍ប្រេងឥន្ទនៈ តាមភោជនីយដ្ឋាន ឬតាមសណ្ឋាគារជាដើម ធ្វើយ៉ាងណា ប្រើប្រាស់ផលិតផលខ្មែរឱ្យបានកាន់តែច្រើន។

តាមរយៈអនុស្សារណៈយោគយល់គ្នានេះ គេរំពឹងថាតម្លៃពោតក្រហម និងដំឡូងមី មាន​តម្លៃខ្ពស់ជាងឆ្នាំមុនៗ ដោយកាលពីឆ្នាំ២០២៤កន្លងទៅ គ្រាប់ពោតក្រហមមានតម្លៃចន្លោះពី ៩២០ ទៅ ១០០០រៀល ហើយនៅដើមឆ្នាំ២០២៥នេះ ដំឡូងមីស្រស់មានតម្លៃ ១៨០ ទៅ២០០រៀល ចំណែកដំឡូងមីក្រៀមមានតម្លៃ ៥៨០ ទៅ ៦០០រៀលក្នុង ១គីឡូក្រាម ចំណែកកន្ទក់មានតម្លៃប្រហែល ២៥០ដុល្លារក្នុងមួយតោន៕ វិន ឈុនហ៊ាត