សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុភ្នំពេញ ៖ ក្រោយពីមានរបាយការណ៍ជាក់លាក់នៃចំនួនមនុស្សបាត់បង់ជីវិតដោយសារជំងឺមហារីកម្នាក់ត្រឹមតែរយៈពេល៤០នាទីនោះ ក្រុមអ្នកជំនាញបានអំពាវនាវដល់ប្រជាពលរដ្ឋបង្កើនការយកចិត្តទុកដាក់ទៅលើបញ្ហាសុខភាពរបស់ខ្លួន តាមរយៈការជ្រើសរើសបន្លែ ផ្លែឈើ ត្រីសាច់ សម្រាប់ធ្វើម្ហូបអាហារទទួលទានប្រចាំថ្ងៃឱ្យបានត្រឹមត្រូវ និងជៀសវាងការទទួលទានរាល់ចំណីអាហារដែលមានផ្ទុកសារធាតុគីមី។
អ្នកស្រី សែម ស្រីទូច ជាអ្នកជំនាញផ្នែកវិស្វកម្មចំណីអាហារ បានឱ្យដឹងថា ការយល់ដឹងរបស់ពលរដ្ឋទៅលើចំណីអាហារហាក់នៅមានកម្រិត ខណៈដែលពួកគាត់ជ្រើសរើសយកបន្លែ ផ្លែឈើ ដែលមិនមានប្រភពច្បាស់លាស់មកចម្អិនធ្វើម្ហូបអាហារទទួលទានប្រចាំថ្ងៃ។ ការទិញបន្លែ ផ្លែឈើ ត្រីសាច់ មិនដឹងពីប្រភពច្បាស់នេះហើយជាបញ្ហាចម្បង ធ្វើឱ្យប៉ះពាល់សុខភាពដោយសារបន្លែមានផ្ទុកសារធាតុគីមី ច្រើនលើសកម្រិត ដូចដែលក្រសួងសុខាភិបាលរកឃើញថា ក្នុងរយៈពេល៤០នាទីមានពលរដ្ឋខ្មែរម្នាក់ស្លាប់ដោយសារជំងឺមហារីក។
អ្នកស្រីបន្តថា ៖
«ខ្ញុំសូមអំពាវនាវដល់ដល់ពលរដ្ឋ ត្រូវចេះគិតគូរពីសុភាពខ្លួនឯងតាមរយៈការហូបចំណីអាហារ ពិសេសបន្លែគ្មានសារធាតុគីមី លើសពីនេះរាល់ផលិតកម្ម និងអាជីវកម្ម មិនត្រូវលក់ផលិតផលគិតតែពីប្រាក់ចំណេញ គិតពីតែប្រយោជន៍ខ្លួនឯងនោះទេ តែត្រូវគិតគូរពីសុខភាពអតិថិជនរបស់ខ្លួនផង»។
ជាមួយគ្នានេះអ្នកស្រី អេង សម្ផស្ស ម្ចាសហាងអាលីម៉ង់បានឱ្យដឹងថា ដោយសារសង្កេតឃើញអំពីផលប៉ះពាល់ចំពោះសុខភាពធ្ងន់ធ្ងរ ដែលបណ្តាលមកពីការទទួលទានបន្លែមានសារធាតុគីមីនេះហើយ ទើបអ្នកស្រីបានផ្តួចផ្តើម សហការជាមួយប្រជាពលរដ្ឋតាមជនបទផលិតបន្លែសុវត្ថិភាព និងប្រមូលយកមកលក់ក្នុងហាងសម្រាប់ពលរដ្ឋទូទៅ។
អ្នកស្រីបញ្ជាក់ថា ដើម្បីទទួលបានអាហារសុវត្ថិភាពទាំងនេះ អ្នកស្រីបានបើកវគ្គបណ្តុះ បណ្តាល ផ្តល់បច្ចេកទេស ផ្តល់គ្រាប់ពូជ និងធ្វើផ្ទះសំណាញ់ជូនពលរដ្ឋផងដែរ ដើម្បីឱ្យច្បាស់ថា ពួកគេផលិតបាននូវបន្លែ ដែលមិនមានសារធាតុគីមីសម្រាប់ដាក់លក់ជូនអតិថិជន។
អ្នកស្រី អេង សម្ផស្ស បានលើកឡើងដូច្នេះថា ៖
«ជាទូរទៅបន្លែសរីរាង្គ ឬបន្លែសុវត្ថិភាព មានលក់នៅតាមផ្សារទំនើប មានតម្លៃថ្លៃជាងបន្លែផ្លែឈើលក់នៅតាមផ្សារធម្មតាបន្តិច ប៉ុន្តែបើសិនជាបងប្អូនគាំទ្រទិញកាន់តែច្រើននឹងធ្វើឱ្យការផលិតក៏បានកាន់តែច្រើនដែលជាកត្តាសំខាន់ធ្វើឱ្យតម្លៃបន្លែសុវត្ថិភាពចុះថោកបន្ថែមទៀត»។
ដោយឡែក អ្នកស្រី ម៉េង សុរ៉ាវីន ជាអតិថិជនដែលចូលមកទិញបន្លែនៅក្នុងហាងអាលីម៉ង់ម្នាក់បាននិយាយឱ្យដឹងថា អ្នកស្រីសុខចិត្តចំណាយលុយទិញបន្លែផ្លែឈើល្អៗហូប ជាជាងចំណាយលុយទិញថ្នាំពេទ្យ ឬចំណាយលុយចូលមើលជំងឺក្នុងមន្ទីរពេទ្យ ដែលសារនេះអ្នកស្រីចង់បញ្ជាក់ថា ទិញបន្លែសុវត្ថិភាពហូបថ្លែជាងបន្លែតាមផ្សារទូរទៅបន្តិចមែន ប៉ុន្តែទទួលបានសុខភាពល្អ ជាជាងទិញបន្លែមានសារធាតុគីមីហូបប៉ះពាល់សុខភាព ហើយត្រូវចំណាយប្រាក់ច្រើនដើម្បីព្យាបាលសុខភាពក្រោយពេលទទួលទាន៕
វិន ឈុនហ៊ាត
Account
Security
Favourite Content