សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពសារព័ត៌មានថៃ The Nation បានរាយការណ៍ថា សភាពាណិជ្ជកម្មខេត្តចាន់ថាបុរី ប្រទេសថៃ បង្ហាញពីការព្រួយបារម្ភចំពោះការបិទច្រកព្រំដែនបណ្តោះអាសន្នជាមួយប្រទេសកម្ពុជា ដោយព្រមានថា វិធានការបែបនេះអាចបណ្តាលឱ្យសេដ្ឋកិច្ចខាតបង់រាប់ពាន់លានបាត។
កាលពីថ្ងៃអាទិត្យ លោក Ukrit Wongthongsalee ប្រធានសភាពាណិជ្ជកម្មខេត្តចាន់ថាបុរី បានបង្ហាញពីក្តីព្រួយបារម្ភបន្ទាប់ពីការបិទច្រកព្រំដែនបានឡែម និងច្រកព្រំដែនបានផាក់កាដ ក្នុងស្រុកក្លងយ៉ៃ ខេត្តចាន់ថាបុរី។ ច្រកទាំងពីរនេះគឺមានសារៈសំខាន់សម្រាប់ពាណិជ្ជកម្មនៅក្នុងខេត្តចាន់ថាបុរី ដោយសារប្រតិបត្តិការឆ្លងកាត់ព្រំដែនភាគច្រើនពាក់ព័ន្ធនឹងទំនិញប្រើប្រាស់ ផលិតផលកសិកម្ម និងការឆ្លងកាត់របស់អ្នកធ្វើដំណើរថៃ និងកម្ពុជា រួមទាំងកម្មករកម្ពុជាដែលធ្វើការនៅក្នុងរោងចក្រកែច្នៃផ្លែឈើក្នុងខេត្តចាន់ថាបុរី។
យ៉ាងណាក៏ដោយ ទោះបីជានៅមិនមានផលប៉ះពាល់អវិជ្ជមានខ្លាំងក៏ដោយ ប៉ុន្តែ លោក Ukrit បានកត់សម្គាល់ថា ព្រឹត្តិការណ៍នាពេលអនាគតនឹងតម្រូវឱ្យមានការសង្កេតយ៉ាងប្រុងប្រយ័ត្ន ព្រោះសកម្មភាពសន្តិសុខ និងនយោបាយអាចនឹងផ្លាស់ប្តូរស្ថានភាពនៅព្រំដែន។ មិនត្រឹមតែប៉ុណ្ណោះ លោក Ukrit ក៏បានព្រមានថា ការបិទច្រកព្រំដែនដែលអូសបន្លាយរយៈពេលជាច្រើនខែនឹងរំខានដល់ការធ្វើពាណិជ្ជកម្មឆ្លងព្រំដែន ដោយសារច្រកចូលទាំងនេះជួយសម្រួលដល់ការរកស៊ីរវាងថៃ និងកម្ពុជា។ លើសពីនេះ ក្តីបារម្ភចម្បងមួយគឺកម្មករកម្ពុជាមានចំណែក ៨០% នៃកម្លាំងពលកម្មនៅក្នុងរោងចក្រកែច្នៃផ្លែឈើក្នុងខេត្តចាន់ថាបុរី។ ទន្ទឹមនឹងនេះ សភាពាណិជ្ជកម្មខេត្តចាន់ថាបុរី បានអះអាងថា ប៉ុស្តិ៍ត្រួតពិនិត្យព្រំដែនមិនគួរត្រូវបានបិទជាបណ្តោះអាសន្នទេ ព្រោះវាមិនជាប់ពាក់ព័ន្ធនឹងបញ្ហាសន្តិសុខដែលកំពុងកើតមាននៅក្នុងតំបន់ចុងបូកនៃខេត្ត Ubon Ratchathani នោះទេ។
លោក Ukrit បានសង្កត់ធ្ងន់លើសារៈសំខាន់សេដ្ឋកិច្ចដ៏សំខាន់តាមរយៈច្រកឆ្លងកាត់ទាំងនេះ ដោយសារពាណិជ្ជកម្មតាមព្រំដែនប្រចាំឆ្នាំមានតម្លៃរាប់ពាន់លានបាត សូម្បីតែការបិទបណ្តោះអាសន្នដែលមានរយៈពេលខ្លីក៏អាចបណ្តាលឱ្យមានការខាតបង់សេដ្ឋកិច្ចលើសពីមួយពាន់លានបាតដែរ។ នៅក្នុងស្ថានភាពបែបនេះ វាមានភាពចាំបាច់ណាស់ក្នុងការប្រាស្រ័យទាក់ទងបើកចំហ និងការសន្ទនាជាជាងការបង្កជាជម្លោះឲ្យកាន់តែធ្ងន់ធ្ងរ។
លោក Ukrit លើកឡើងថា ៖ «ភាពស្នេហាជាតិសុទ្ធតែមានក្នុងចំណោមពួកយើងទាំងអស់គ្នា ប៉ុន្តែស្របពេលដែលប្រជាជនកំពុងប្រឈមនឹងស្ថានភាពសេដ្ឋកិច្ចដ៏លំបាកបែបនេះ ការញុះញង់បន្ថែមទៀតនឹងមិនធ្វើឱ្យស្ថានភាពប្រសើរឡើងនោះទេ ហើយពាណិជ្ជកម្មត្រូវតែបន្ត។ សហគមន៍មូលដ្ឋានមិនចង់ឃើញជម្លោះកើតឡើងរវាងជនជាតិថៃ និងកម្ពុជានោះទេ ដោយសារភាគីទាំងពីរពឹងផ្អែកលើទំនាក់ទំនងពាណិជ្ជកម្មដែលកំពុងបន្ត។ ដូច្នេះច្រកព្រំដែនគួរតែបន្តបើកចំហ»៕
Account
Security
Favourite Content