ភ្នំពេញ ៖ រហូតមកដល់​ដំណាច់ឆមាសទី១ ឆ្នាំ២០២៥​ វិស័យអចលនទ្រព្យនៅតែបន្តមានកំណើនទាប ដែលអូសបន្លាយតាំងពីវិបត្តិកូវីដ​១៩​ ក្នុងឆ្នាំ២០២០ មកម្ល៉េះ។ ​ជាក់ស្ដែង ក្នុង​ឆមាសទី១​ឆ្នាំ ២០២៥នេះ វិស័យអចលនទ្រព្យ​មានកំណើន​ត្រឹមតែ០,៨​ភាគរយ​ប៉ុណ្ណោះ ។ នេះបើតាមរបាយការណ៍របស់ធនាគារ​ជាតិនៃកម្ពុជា ចេញផ្សាយសម្រាប់​ឆមាសទី១ ឆ្នាំ២០២៥ ។​

យោងតាមធនាគារ​ជាតិនៃ​កម្ពុជា​​បាន​ឱ្យដឹងថា ការកើនឡើង​យឺត​នេះដោយសារតែការ​ធ្លាក់ចុះនៃថ្លៃ ​និងទំហំឥណទាន​សម្រាប់លំនៅឋាន​ ស្របពេលដែល​ការ​វិនិយោគ​ផ្ទាល់ពីបរទេស​នៅក្នុងវិស័យមួយនេះ ធ្លាក់ចុះ ។ សន្ទស្សន៍ថ្លៃលំនៅឋានរួម​ ក៏បានថយចុះជា​មធ្យម ៣,៦ភាគរយ ដែល​ក្នុងនោះនៅរាជធានីភ្នំពេញថយចុះ ៣,៦ភាគរយ និងបណ្ដាខេត្ត​បានថយ​ ៧,១ភាគរយ​ ។​

របាយការណ៍របស់ធនាគារ​ជាតិនៃកម្ពុជា​​បាន​បង្ហាញផងដែរ ពីកំណើន​នៃវិស័យសំណង់​ក្នុងឆមាសទី១​ ដោយមានត្រឹមតែ ០,៧ភាគរយប៉ុណ្ណោះ បើទោះបីជា​ការនាំចូលសម្ភារ និង​បរិក្ខារសំណង់​កើនឡើង​ខ្ពស់ក្ដី ។​ វិស័យ​សំណង់​ក្នុងឆមាសទី១ ឆ្នាំ ២០២៥នេះ គឺមានការ​គាំទ្រ​ដោយសកម្មភាពសាងសង់​សំណង់​ឧស្សាហកម្ម និងសំណង់​ឯកជន​ ខណៈសំណង់​សាធារណៈ​មានកំណើន​យឹត ។ ការនាំចូលសម្ភារសំណង់ និង​បរិក្ខារសំណង់ មានកំណើន​រហូតដល់​ ៤៤,១ភាគរយ ខណៈរយៈពេលដូចគ្នា​កាលពីឆ្នាំ ២០២៤ មានកំណើន២៧,៥ភាគរយ ។

យោងតាមការ​សិក្សា​ស្រាវជ្រាវ​របស់​ក្រុមហ៊ុន ​CBRE Cambodia បានបង្ហាញឱ្យឃើញថា ចាប់តាំងពីកម្ពុជា​បានជួបប្រទះនឹ​ងវិបត្តិ​កូវី១៩ ក្នុងឆ្នាំ២០២០ គម្រោង​វិនិយោគក្នុងវិស័យសំណង់ដែល​បានអនុម័ត​ក្នុងប្រទេសកម្ពុជា​មានថយចុះជា​បន្តបន្ទាប់​ ជាក់ស្ដែង​ក្នុងឆ្នាំ២០១៩ គម្រោង​វិនិយោគ​ក្នុងវិស័យនេះចំនួន ៤ ៧៩៣គម្រោង ត្រូវ​បានអនុម័ត ហើយចូលមកដល់ឆ្នាំ ២០២០ គម្រោងវិនិយោគ​ក្នុងវិស័យ​សំណង់ដែល​បានអនុម័ត​បានធ្លាក់មកនៅក្រោម​៤០០០គម្រោង ហើយនៅឆ្នាំ ២០២១​បានបន្តធ្លាក់​ចុះមកនៅ​ក្រោម​៣០០០គម្រោង ហើយធ្លាក់​បន្ត​ទៀតនៅមកត្រឹមជាង​១៥០០គម្រោង​ក្នុងឆ្នាំ២០២២ ។ សម្រាប់ឆ្នាំ២០២៣ និងឆ្នាំ ២០២៤​ គម្រោង​វិនិយោគ​ក្នុងវិស័យសំណង់​ដែលបានអនុម័ត​ចាប់ផ្ដើមឡើង​បន្តិច​ តែនៅឆមាសទី១ឆ្នាំ ២០២៥ គម្រោងវិនិយោគ​ក្នុងវិស័យសំណង់ដែល​បានអនុម័តមានចំនួន ១ ៦០៥​គម្រោង ។

គួរ​បញ្ជាក់ថា បើទោះបីជា​ស្ថានភាពនៃវិស័យអចលនទ្រព្យ​ នៅតែមិនទាន់បានងើបឡើង​វិញ​ដូច​មុនវិបត្តិកូវីដ១៩ ប៉ុន្តែតម្លៃនៃអចលនទ្រព្យខ្លះ​នៅតែ​មិនមានការធ្លាក់​ចុះ​ខ្លាំងនោះទេ ផ្ទុយទៅវិញ​អ ចលនទ្រព្យខ្លះ​ដូចជា​ដីធ្លី និងលំនៅឋាននៅតែមានតម្លៃ​ល្អប្រសើរ គ្រាន់តែការ​ទិញលក់​មានសកម្មភាពថយចុះ ។

អ្នកជំនាញ​នៃវិស័យ​អចលនទ្រព្យ​បាន​បង្ហាញពីទស្សន​ស្រដៀង​គ្នា​ថា ក្នុងពេលដែល​វិស័យអចលនទ្រព្យ​របស់​កម្ពុជា​បន្តពឹងលើ​ការ​វិនិយោគពីខាងក្រៅ​ នៅពេលស្ថានភាពសេដ្ឋកិច្ច​ខាងក្រៅមានបញ្ហា ​ឬមិនទាន់​បានងើបឡើង​នោះ ​វិស័យអចលនទ្រព្យ​នៅកម្ពុជា​នឹងនៅតែបន្តជួប​ប្រទះ​នឹង​បញ្ហា​ ។ ប៉ុន្តែយ៉ាងណាក្ដី តាមរយៈយន្តការ​របស់រាជរដ្ឋាភិបាល​កម្ពុជា បានធ្វើឱ្យវិស័យអចលនទ្រព្យ​នៅតែអាចដំណើរ​បានទៅមុខ ជាពិសេសការអនុវត្តគោលនយោបាយគាំទ្រពិសេសពីសំណាក់រាជរដ្ឋាភិបាលទៅលើគម្រោងវិនិយោគថ្មី គម្រោងវិនិយោគលើសំណង់ដែលជាប់គាំង និងគម្រោងវិនិយោគដែលមានស្រាប់៕