ភ្នំពេញ ៖ ក្រុមហ៊ុនដ៏​ធំមួយ​មកពីកោះហៃណាន ​នៃសាធារណរដ្ឋ​ប្រជា​មានិតចិន និងជាក្រុមហ៊ុនរដ្ឋចិន​ Sinomach Hainan Development Co.,Ltd បានមកបំពេញទស្សនកិច្ច​នៅក្នុងប្រទេស​កម្ពុជា ដើម្បីស្វែងយល់ពីកាលានុវត្តភាព និងបរិយាកាស​វិនិយោគ ជាពិសេស​លើការ​អភិវឌ្ឍ​ឧស្សាហកម្មស្វាយចន្ទី ។​

នៅក្នុង​ដំណើរទស្សនកិច្ច​ស្វែងយល់ពី​កាលានុវត្តភាព និង​បរិយាកា​ស​វិនិយោគ​នៅកម្ពុជា​នេះដែរ ប្រតិភូក្រុមហ៊ុន​បាន​ជាមួយឯកឧត្តម​ ជា វុទ្ធី អគ្គលេខាធិការ​គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា​​ដើម្បី​ស្វែងយល់បន្ថែម ។

នៅក្នុងឱកាស​នោះដែរ ឯកឧត្តម​ ជា វុទ្ធី អគ្គលេខាធិការ​គណៈកម្មាធិការ​វិនិយោគ​កម្ពុជា បានស្វាគមន៍​ចំ​ពោះ​​​ប្រតិភូក្រុមហ៊ុនដែលមកស្វែងយល់ពី​ឱកាស​វិនិយោគនៅក្នុង​ប្រទេស​កម្ពុជា ជាពិសេស លើឧស្សាហកម្មស្វាយចន្ទីដែលកម្ពុជាកំពុងផ្តោតការយកចិត្តទុកដាក់យ៉ាងខ្លាំងក្នុងការអភិវឌ្ឍផលិតកម្ម ។

ឯកឧត្តម​ បានអត្ថាធិប្បាយ​ពីខ្សែច្រវាក់​តម្លៃ​នៃឧស្សាហកម្ម​ស្វាយចន្ទី តាំងពីដើមទី​រហូតដល់ចុងទី ដែលរៀបរាប់ចាប់តាំងពី​ការ​ដាំដុះ​ ការ​ថែទាំ​ ការ​ប្រមូលផល ការ​រៀបចំឃ្លាំង​ស្តុក ការ​រៀបចំ​សម្ងួត រហូតដល់ការ​កែច្នៃ​ជា​ផលិតផលសម្រេច​​ ហើយដែលបច្ចុប្បន្ន​រាជរដ្ឋាភិបាល​កម្ពុជា បាន និ​ងកំពុងយកចិត្តទុក​ដាក់​​យ៉ាង​ខ្លាំង ក្នុងការ​ជំរុញការ​អភិវឌ្ឍឧស្សាហកម្មស្វាយចន្ទីនេះ និងកំពុងត្រូវការ​ក្រុមហ៊ុន​វិនិយោគកែច្នៃ​​ដោយប្រើ​បច្ចេកវិទ្យាទំនើប ។​

លោក​ David Zou Zhun ប្រធាន​ផ្នែក​កសិកម្ម​នៃក្រុមហ៊ុន Sinomach Hainan Development បានបង្ហាញពី​​ចំណាប់អារម្មណ៍សហការ​ជាមួយរាជរដ្ឋាភិបាលកម្ពុជា ក្នុងការ​បណ្ដាក់ទុន​វិនិយោគក្នុងវិស័យនេះ ។ ក្រុម​​ហ៊ុនក៏បានបង្ហាញនូវ​សុទិដ្ឋិនិយម​ក្នុងការ​គិតគូរ​បណ្ដាក់ទុនវិនិយោគ​នៅក្នុងវិស័យឧស្សាហកម្ម​ស្វាយ​ចន្ទីនេះ ។ បច្ចុប្បន្ន​ ក្រុមហ៊ុន​បានសហការចាប់ដៃគូជាមួួក្រុមហ៊ុន Kampu Nuts Agro Products , ក្រុមហ៊ុន​ Hangzhou Baichen Food Co.,Ltd , ក្រុមហ៊ុន​ Hangzhou Jiabin Agricultural Park និងក្រុមហ៊ុន Hangzhou Weiying Food Co.,Ltd ដើម្បីធ្វើការ​ប្រមូលទិញស្វាយចន្ទីស្ងួត​ និងស្វាយចន្ទីកែច្នៃយកទៅចែកចាយ​នៅទីផ្សារ​ប្រទេសចិន ។

លោកមានប្រសាសន៍ថា គម្រោងវិនិយោគឧស្សាហកម្មស្វាយចន្ទីនៅកម្ពុជា ក្រុមហ៊ុននឹងរៀបចំជាបីដំណាក់កាល ដែលដំណាក់កាលទី១ គ្រោងនឹងកែច្នៃគ្រាប់ស្វាយចន្ទីឱ្យបានចំនួន ៣ម៉ឺនតោន/ឆ្នាំ, ដំណាក់កាលទី២ ចំនួន ២០ម៉ឺនតោន/ឆ្នាំ និងដំណាក់កាលទី៣ ចំនួន ៥០ម៉ឺនតោន/ឆ្នាំ ។

ឯកឧត្តម​ ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា កាលពីពេលថ្មីៗនេះបានឡើងថ្លែងសុន្ទរកថា​នៅលើវេទិកាធំមួយ​នាប្រទេស​ចិន ដោយប្រកាស​ស្វាគមន៍​រាល់ការ​វិនិយោគរបស់ចិនមកកម្ពុជា និងការវិនិយោគរបស់វិនិយោគិនប្រទេសដទៃទៀត​មកកាន់កម្ពុជា ស្របពេលដែលកម្ពុជា​បានបើក​ឱកាសយ៉ាងទូលាយ​សម្រាប់អ្នកវិនិយោគដែលចង់បណ្ដាក់ទុនវិនិយោគ​ ដោយលើកទឹកចិត្ត​ផ្នែកពន្ធ និងការ​សម្រួល​នីតិវិធីជាច្រើន​ទៀត ៕