ភ្នំពេញ៖ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាភិបាលបេឡាជាតិសន្តិសុខសង្គម (ប.ស.ស.) បានអះអាងថា ក្នុងឆ្នាំ២០២៥ កន្លងទៅនេះ ប.ស.ស. បានបន្តរក្សានូវដង្ហើមនវានុវត្តន៍ ដើម្បីក្លាយជាបង្អែកសន្តិសុខសង្គមដ៏រឹងមាំ ទំនើប និងផ្តល់ភាពកក់ក្តៅជូនមន្រ្តីរាជការ កម្មករនិយោជិត និងប្រជាពលរដ្ឋទូទៅ ។ ការថ្លែងបែបនេះ ត្រូវបានធ្វើឡើងនៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ និងទិសដៅការងារឆ្នាំ២០២៦ របស់ ប.ស.ស កាលពីរសៀលថ្ងៃទី២៤ ខែកុម្ភៈ ឆ្នាំ២០២៦។

ការពង្រីកវិសាលភាព និងប្រសិទ្ធភាពនៃរបបសន្តិសុខសង្គម នៅតែជាបេសកកម្មស្នូលរបស់ ប.ស.ស. ស្របតាមក្របខណ្ឌគោលនយោបាយជាតិគាំពារសង្គមរបស់រាជរដ្ឋាភិបាលកម្ពុជា ២០២៤-២០៣៥ យុទ្ធសាស្រ្ដជាតិស្ដីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ និងផែនទីបង្ហាញផ្លូវឆ្ពោះទៅការគ្របដណ្ដប់សុខភាពជាសកលនៅកម្ពុជាឆ្នាំ២០២៤-២០៣៥។

ឯកឧត្តម ហេង សួរ រដ្ឋមន្រ្តីក្រសួងការងារ បានលើកយកប្រសាសន៍ដ៏ថ្លៃថ្លារបស់ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មកបញ្ជាក់ថា ប.ស.ស ជានិមិត្តរូបសុខភាពសម្រាប់ភាពរីកចម្រើនរបស់ប្រជាជន ដែលបានជួយកាត់បន្ថយបន្ទុកចំណាយ និងពង្រឹងស្ថិរភាពចំណូល ដោយឈរលើស្មារតី «មិនបោះបង់ពលរដ្ឋណាម្នាក់» ជាចក្ខុវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា។ ការដាក់ឱ្យដំណើរការ ប.ស.ស. ទាំង ៣ផ្នែក (ហានិភ័យការងារ ថែទាំសុខភាព និងប្រាក់សោធន) ពិតជាជួយសម្រាលបន្ទុកគ្រួសារដោយបងប្អូន «រែក តែមិនទូល» ដូចពីអតីតកាល ដែល «បងប្អូនរែកផង និងទូលផង» ។ មានន័យថា បន្ទាប់ពីធ្វើការនៅសហគ្រាស ក្រុមហ៊ុន រោងចក្រ រហូតដល់វ័យចូលនិវត្តន៍ បងប្អូននឹងទទួលបានប្រាក់សោធន ដើម្បីផ្គត់ផ្គង់ជីវភាពខ្លួនឯងផ្ទាល់ ដោយមិនចាំបាច់ត្រូវរស់នៅក្រោមការទំនុកបម្រុងរបស់កូនចៅដូចសម័យមុននោះទេ។

ជាមួយគ្នានេះ ដើម្បីធានាសេវារបបសន្តិសុខសង្គមឱ្យកាន់តែប្រសើរ និងនិរន្តរភាព ឯកឧត្ដមរដ្ឋមន្ត្រីបានផ្ដល់អនុសាសន៍ដល់ ប.ស.ស. ត្រូវបន្តយកចិត្តទុកដាក់ខ្ពស់ក្នុងការលើកកម្ពស់ផ្ដល់សេវាដល់សមាជិក ប.ស.ស. ទាំងជាង ៣,៥លាននាក់ និងបន្តពង្រឹងកិច្ចសហការល្អជាមួយមូលដ្ឋានសុខាភិបាលជាដៃគូ ប.ស.ស. ជាប្រចាំ ដើម្បីដោះស្រាយបញ្ហាប្រឈម និងធានាសេវាកម្មរហ័សឱ្យកាន់តែមានប្រសិទ្ធភាព និងបង្កើនការសិក្សាស្រាវជ្រាវ និងផ្លាស់ប្តូរបទពិសោធ ដើម្បីពង្រីកវិសាលភាពគ្របដណ្តប់ទៅក្រុមគោលដៅថ្មីៗ។

ទន្ទឹមនឹងនេះ ក៏ត្រូវពង្រឹងអនុលោមភាព និងអធិការកិច្ច, លើកកម្ពស់ការធ្វើទំនើបកម្ម ប្រព័ន្ធបច្ចេកវិទ្យា និងឌីជីថល ដើម្បីប្រតិបត្តិការការងារ ក៏ដូចជាជំរុញការផ្សព្វផ្សាយលើការប្រើប្រាស់សេវាដោយប្រើប្រាស់ភាសាសាមញ្ញជាដើម។ លើសពីនេះ ត្រូវអនុវត្តអនុសាសន៍សំខាន់ៗរបស់រាជរដ្ឋាភិបាល ដូចជា ការពង្រីកការឧប​ត្ថម្ភសាច់ប្រាក់ដល់ស្ត្រីមានផ្ទៃពោះ និងកុមារអាយុក្រោម២ឆ្នាំ និងការកែលម្អមធ្យោបាយដឹកជញ្ជូនកម្មករ ព្រមទាំងពង្រឹងសវនកម្មផ្ទៃក្នុង បណ្តុះបណ្តាលមន្ត្រី និងគ្រប់គ្រងការប្រើប្រាស់មូលនិធិឱ្យចំគោលដៅប្រកបដោយនិរន្តរភាព៕