បរទេស៖ យោងតាមប្រភពព័ត៌មានពី Hellen Shipping News បានរាយការណ៍ថា​ ការរញ្ជួយដីនៅប្រទេសតួកគី និងស៊ីរីកាលពីប៉ុន្មានថ្ងៃកន្លងទៅនេះ បានបំផ្លាញជីវិតមនុស្សជាង ៤៦ ០០០ នាក់ និងធ្វើឱ្យមនុស្សជាច្រើននាក់ផ្សេងទៀតរងរបួស។ បញ្ហានេះក៏ទំនងជាប៉ះពាល់ដល់សេដ្ឋកិច្ចពិភពលោកតិចតួចផងដែរ ដោយសារការផ្លាស់ប្តូរផ្នែកដឹកជញ្ជូនប្រេង និងហ្គាស។

ប្រទេសស៊ីរីមានចំណែកតិចតួចនៅក្នុងសេដ្ឋកិច្ចពិភពលោក ខណៈដែលតួកគី ជាមហាអំណាចសេដ្ឋកិច្ចនៅមជ្ឈឹមបូព៌ា ដោយសារតែទំហំសេដ្ឋកិច្ច និងរចនាសម្ព័ន្ធឧស្សាហកម្មរបស់ខ្លួនក៏មិនសូវមានចំណែកច្រើននៅក្នុងសេដ្ឋកិច្ចពិភពលោកដែរ។ កាលពីឆ្នាំ២០២២ កន្លងទៅនេះ ផលិតផលក្នុងស្រុកសរុប (GDP) របស់ប្រទេសតួកគី មានចំនួន ៨៥៣,៣ ពាន់លានដុល្លារ ដែលស្មើនឹង ០,៨៤ ភាគរយនៃចំនួនសរុបសកល។ ដូចនេះហើយ ​បញ្ហារញ្ជួយដីនេះអាចនឹងមិនសូវមានឥទ្ធិពលខ្លាំងលើទិន្នផលសេដ្ឋកិច្ចពិភពលោក ប៉ុន្តែវាប៉ះពាល់ដល់ការដឹកជញ្ជូនផ្សេងៗ ដោយសារគម្រោងហេដ្ឋារចនាសម្ព័ន្ធសំខាន់ៗមួយចំនួន និងបំពង់បង្ហូរប្រេងនៅតួកគីរងការខូចខាតយ៉ាងដំណំ ហើយអាចនឹងសាងសង់វិញក្នុងតម្លៃថ្លៃ។

មួយវិញទៀត តួកគីគឺជាមជ្ឈមណ្ឌលដឹកជញ្ជូនថាមពលសកលដ៏សំខាន់មួយ ដោយសារវាស្ថិតនៅចន្លោះទ្វីបអឺរ៉ុប ដែលជាទីផ្សារនាំចូល និងប្រើប្រាស់ថាមពលដ៏ធំបំផុតរបស់ពិភពលោក រវាងនឹងមជ្ឈិមបូព៌ា អាស៊ីកណ្តាល និងសមុទ្រកាសព្យែន ដែលជាតំបន់សម្បូរទៅដោយថាមពលប្រេង និង ហ្គាស។  ម៉្យាងវិញទៀត ការនាំចេញប្រេង និង ហ្គាសរបស់រុស្ស៊ីទៅកាន់អឺរ៉ុប និងការគ្រោងនាំចេញប្រេងរបស់អាស៊ីកណ្តាល និងអាស៊ែបៃហ្សង់ទៅកាន់អឺរ៉ុប គឺសុទ្ធតែតម្រូវឱ្យមានការសាងសង់បំពង់បង្ហូរប្រេង និងហ្គាសតាមរយៈតួកគី ។

ចាប់តាំងពីការចាប់ផ្តើមនៃជម្លោះរុស្ស៊ី-អ៊ុយក្រែន គឺការដាក់ទណ្ឌកម្មរបស់លោកខាងលិចប្រឆាំងនឹងទីក្រុងមូស្គូតាមរយៈបំពង់បង្ហូរប្រេងតាមអ៊ុយក្រែន និងប៉ូឡូញត្រូវបានរឹតបន្តឹងយ៉ាងខ្លាំង។ ចាប់តាំងពីបំពង់បង្ហូរហ្គាសធម្មជាតិ Nord Stream ត្រូវបានបំផ្លាញ រុស្ស៊ីចាំបាច់ត្រូវពង្រីកផ្លូវនាំចេញប្រេង និងហ្គាសរបស់ខ្លួនជាបន្ទាន់។ ដូចនេះ ផ្លូវចំនួន៤ ដែលអាចធ្វើទៅបានដើម្បីពង្រីកបណ្តាញផ្គត់ផ្គង់របស់រុស្ស៊ីគឺមានដូចជា៖ ចិន តួកគី អ៊ីរ៉ង់ និង ផ្លូវរវាងអាហ្វហ្គានីស្ថាន-ប៉ាគីស្ថាន-ឥណ្ឌា។ ទោះបីជាយ៉ាងណាក្តី អ៊ីរ៉ង់កំពុងរងឥទ្ធិពលនៃទណ្ឌកម្មរបស់លោកខាងលិច ខណៈដែល​បំពង់​បង្ហូរ​ប្រេង​ឆ្លងកាត់​អាហ្វហ្គានីស្ថាន-ប៉ាគីស្ថាន-​ឥណ្ឌា​មិនទាន់បាន​រៀបចំត្រឹមត្រូវនោះទេ ដូច្នេះជម្រើសប្រាកដគឺមានតែ ប្រទេសចិន និងតួកគីតែប៉ុណ្ណោះ។ មិនត្រឹតមតែប៉ុណ្ណោះ Ceyhan ដែលជាមជ្ឈមណ្ឌលដឹកជញ្ជូនប្រេង និងឧស្ម័នដ៏សំខាន់បំផុតរបស់តួកគី អាចនឹងធ្វើឲ្យតួកគីចុះខ្សោយក្នុងនាមជាមជ្ឈមណ្ឌលដឹកជញ្ជូនប្រេង និងហ្គាសអន្តរជាតិ។ នេះអាចជំរុញឱ្យប្រទេសរុស្ស៊ី និងបណ្តាប្រទេសនៅអាស៊ីកណ្តាលនាំចេញធនធានប្រេង និងហ្គាសរបស់ពួកគេឆ្ពោះទៅភាគខាងកើតតាមរយៈចិន ខណៈដែលអឺរ៉ុបនឹងបង្ខំចិត្តពឹងផ្អែកលើអាហ្វ្រិកខាងជើង និងខាងលិចបន្ថែមទៀត ដើម្បីរកប្រេង និងហ្គាសជំនួសរបស់រុស្ស៊ី៕