សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីឆ្នាំ២០២០មក ពោលគឺចាប់តាំងពីពិភពលោកទទួលរងនូវវិបត្តិកូវីដ១៩ឃើញថា ការអភិវឌ្ឍខុនដូនៅក្នុងប្រទេសកម្ពុជាចាប់ផ្ដើមមាននិន្នាការថមថយជាបន្តបន្ទាប់ ជាក់ស្ដែងក្នុងឆ្នាំ២០២៣នេះ តាមការសិក្សារបស់ក្រុមហ៊ុនអចលនទ្រព្យអន្តរជាតិដែលមានមូលដ្ឋានក្នុងប្រទេសកម្ពុជាមួយបានបង្ហាញថា ការផ្គត់ផ្គង់ខុនដូក្នុងឆ្នាំ២០២៣នេះរំពឹងថានឹងមានត្រឹមតែ ៨ ០០០យូនីតប៉ុណ្ណោះ ។
យោងតាមរបាយការណ៍របស់ក្រុមហ៊ុន CBRE Cambodia បានបង្ហាញថា ក្នុងឆមាសទី១ឆ្នាំ២០២៣នេះ ការអភិវឌ្ឍខុនដូថ្មីៗ ក្នុងប្រទេសកម្ពុជាសម្រេចបានប្រមាណតែ ១ ៦០០យូនីតប៉ុណ្ណោះ ខណៈពេញមួយឆ្នាំ២០២៣ ការផ្គត់ផ្គង់ខុនដូនៅក្នុងប្រទេសកម្ពុជារំពឹងមានតែ ៨ ០០០យូនីត ។
របាយការណ៍ដដែលឱ្យដឹងថា ក្នុងរយៈពេល១០ឆ្នាំកន្លងមកនេះ ការអភិវឌ្ឍខុនដូនៅក្នុងប្រទេសកម្ពុជាឃើញថាមានតែ២ឆ្នាំប៉ុណ្ណោះដែលមានការអភិវឌ្ឍខ្ពស់ ក្នុងនោះគឺឆ្នាំ២០១៥ និងឆ្នាំ២០១៩ ។ ឆ្នាំ២០១៥ គឺជាឆ្នាំដែលវិនិយោគិនចិនចូលមកកម្ពុជាច្រើន ហើយឆ្នាំនោះដែរការអភិវឌ្ឍខុនដូថ្មីៗមានច្រើនគម្រោង ជាពិសេសគម្រោងនៅក្នុងរាជធានីភ្នំពេញ។ ដោយឡែកក្នុងឆ្នាំ២០១៩ ជាឆ្នាំដែលចាត់ទុកថាវិស័យអចលនទ្រព្យក្នុងប្រទេសកម្ពុជាបានឡើងដល់ចំណុចកំពូល ដូច្នេះ ក្នុងឆ្នាំនោះ វិស័យអចលនទ្រព្យស្ទើរតែគ្រប់ផ្នែកទៅហើយ មានការកើនឡើងដល់ចំណុចកំពូល និងបានថមថយជាបន្តបន្ទាប់ចាប់តាំងពីឆ្នាំនោះមក។
ក្នុងឆ្នាំ២០២៣ រយៈពេល ១ឆមាសកន្លងមកនេះ មានតែគម្រោងខុនដូប៉ុណ្ណោះ បានចាប់ផ្ដើមអភិវឌ្ឍន៍ ខណៈជាង១៥០គម្រោងទៀត ដែលបានអភិវឌ្ឍន៍តាំងពីមុនៗ មកនោះនៅតែមិនទាន់បានលក់ចេញអស់នៅឡើយ ។
របាយការណ៍របស់ក្រុមហ៊ុននេះក៏បានបង្ហាញតម្លៃខុនដូលើទីផ្សារប្រទេសកម្ពុជាក្នុងឆ្នាំ២០២៣នេះ ដោយបង្ហាញថាអត្រាតម្លៃបន្តធ្លាក់ចុះក្នុងកម្រិតតិចតួច ជាក់ស្ដែងខុនដូតម្លៃខ្ពស់ៗ បានធ្លាក់ចុះ១ភាគរយធៀបនឹងឆមាសមុន នឹងធ្លាក់ចុះ៤ភាគរយធៀបនឹងឆមាសទី១ឆ្នាំមុន ។ ខុនដូតម្លៃមធ្យមបានធ្លាក់ចុះ ត្រឹមតែ ០,០៣ភាគរយធៀបនឹងឆមាសមុន និងធ្លាក់ចុះ៤ភាគរយធៀបនឹងឆមាសទី១ឆ្នាំមុន។ ដោយឡែក ខុនដូតម្លៃសមរម្យវិញមានការធ្លាក់ចុះ ០,១ភាគរយធៀបនឹងឆមាសមុន និងធ្លាក់ចុះ២ភាគរយធៀបនឹងរយៈពេលដូចគ្នាកាលពីឆ្នាំមុន ។
ទីផ្សារខុនដូក្នុងប្រទេសកម្ពុជានៅតែបន្តពឹងផ្អែកលើវិនិយោគិនបរទេសដដែល ជាពិសេសវិនិយោគិនមកពីប្រទេសចិន និងប្រទេសក្នុងតំបន់អាស៊ាន បើទោះបីជាបច្ចុប្បន្នទីផ្សារមួយនេះមានប្រជាពលរដ្ឋកម្ពុជាមួយចំនួនចាប់ផ្ដើមមានចំណាប់អារម្មណ៍វិនិយោគិនច្រើនជាងមុនក្ដី ។
អ្នកនាង ជិន ច័ន្ទដាលុច្ស ប្រធានផ្នែកវាយតម្លៃនៃក្រុមហ៊ុនអចលនទ្រព្យ CBRE Cambodia បានលើកឡើងផងដែរថា បើទោះបីជាបច្ចុប្បន្ននេះមានប្រជាពលរដ្ឋកម្ពុជាមួយចំនួនបានងាកទៅចាប់អារម្មណ៍លើខុនដូដើម្បីការរស់នៅ និងវិនិយោគក្ដី តែទីផ្សារមួយនេះនៅតែពឹងលើជនបរទេស ដូច្នេះបើសិនជាជនបរទេស ជាពិសេសវិនិយោគិនបរទេសមិនទាន់មកបណ្ដាក់ទុនវិនិយោគក្នុងប្រទេសច្រើនឡើងវិញទេ ទីផ្សារមួយនេះក៏នៅតែមិនទាន់ដូចមុនបានដែរ ៕
Account
Security
Favourite Content