ខេត្តកំពត ៖ ​ រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ បានលើកឡើងថា អំបិលជាទំនិញយុទ្ធសាស្ត្រមួយដែលត្រូវបានប្រើប្រាស់ប្រចាំថ្ងៃ និង​សម្រាប់ការកែច្នៃផលិតផលផ្សេងៗ ដោយក្នុង១​ឆ្នាំៗ​កម្ពុជា​ត្រូវការ​អំបិល​ចន្លោះ ៧-១០ ​ម៉ឺន​តោន​ដើម្បី​បំពេញតម្រូវការ​ប្រើប្រាស់​ក្នុងស្រុក​។

ឯកឧត្តម ហែម វណ្ណឌី រដ្ឋមន្ត្រីក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ នៅក្នុង​វេទិកា​ពិភាក្សា ​«​អាទិភាព​ការងារ​របស់​ក្រសួង​ឧស្សាហ​កម្ម វិទ្យាសាស្ត្រ បច្ចេកវិទ្យា និង​នវានុវត្តន៍​» កាលពីពេលកន្លងទៅថ្មីៗនេះបាន​លើក​ឡើង​ថា រដ្ឋាភិបាល​តែង​លើក​ទឹក​ចិត្ត​ឱ្យ​កសិករ​ផលិត​អំបិល​ឱ្យបាន​ច្រើន ព្រមទាំង​បានដាក់​ចេញ​វិធានការ​គាំទ្រ​ជាច្រើន​ដើម្បី​អភិវឌ្ឍ​ផលិតកម្ម​អំបិល​។

ឯកឧត្តមបានបន្តទៀតថា ជាមួយនឹងផែនការលើកកម្ពស់ និងជំរុញឱ្យមានស្ដង់ដារលើផលិតកម្មនៃការផលិតអំបិល រាជរដ្ឋាភិបាលបានរៀបចំយុទ្ធសាស្ត្រអភិវឌ្ឍន៍អំបិល ឆ្នាំ​២០២២​-២០២៦ ដើម្បីស្វែងរកទីផ្សារថ្មីៗ ដែលមិនមែន​ជាទីផ្សារ​ប្រពៃណី ដូចជាការប្រើប្រាស់អំបិលធ្វើជាក្ល័រ ដើម្បីប្រព្រឹត្តកម្មទឹក​ស្អាតជាដើម និងបានលើកទឹកចិត្តដល់អ្នកផលិតអំបិលដែលមានសក្តានុពលក្នុងខេត្តទាំងពីរ (កំពត-កែប) ឱ្យសហការជាមួយក្រសួងសម្រាប់ការគាំទ្រទាក់ទងនឹងគុណភាព និងស្តង់ដារផលិតផល។

តាមរបាយការណ៍ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា ក្នុងឆ្នាំ២០​២៣ ផ្ទៃដីធ្វើស្រែអំបិលក្នុងខេត្តកំពត និងខេត្តកែប មានប្រមាណ៤ ៧៤៨ ហិកតា។ កាលពីឆ្នាំ២០២៣ ការប្រមូលផល​​​​នៅខេត្តកំពតសម្រេចបានជិត ៨ ម៉ឺនតោន និងខេត្តកែប ប្រមូលបានចំនួនប្រមាណ ២ ៥១៥,៧៥​ តោន​ ដោយក្នុងនោះខេត្តកែបមាន​ផ្ទៃដី​កំពុង​ផលិត​អំបិល​សរុប ៣៣១​ ហិកតា និង​ឃ្លាំង​ស្តុក​អំបិល​ចំនួន ៤៤​។

បច្ចុប្បន្ន ខេត្តកំពតមានកសិដ្ឋានផលិតអំបិលសរុបទំហំ ៣.៤៨៩ ហិកតា និងឃ្លាំងស្តុកអំបិលចំនួន ៥៦០កន្លែង ដោយអាចផ្តល់ទិន្នផលអំបិលបានប្រមាណ ១០ម៉ឺនតោនក្នុង១ឆ្នាំ។ នេះបើតាមការលើកឡើងរបស់លោកស្រី ស៊ឹម ណារី ប្រធានស្តីទីមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពត ។

លោកស្រី ស៊ឹម ណារី បានឱ្យដឹងថាបន្ថែមថា ស្រែអំបិលនេះ បានផ្តល់ការងារដល់ប្រជាពលរដ្ឋចំនួន ១ ៤៧៤ នាក់ ហើយកសិដ្ឋានផលិតអំបិលក្នុងខេត្តមួយនេះអាចដំណើរការបានរយៈពេល ៤ ទៅ ៦ ខែក្នុងមួយឆ្នាំ អាស្រ័យលើអាកា​សធាតុ និងអាចមានលទ្ធភាពផ្តល់ទិន្នផលអំបិលប្រមាណ ១០០ ០០០ តោនក្នុងមួយឆ្នាំ។

សូមបញ្ជាក់ថា ជាការលើកទឹកចិត្តដល់អ្នកផលិតអំបិល និងគាំទ្រសេវាសាធារណៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កំពុងអនុវត្តកំណែទម្រង់មួយចំនួន រួមទាំងការកែ​សម្រួល​ថ្លៃ រយៈពេល និងសុពលភាពនៃសេវាសាធារណៈរបស់ខ្លួន និងកំពុងប្រែក្លាយមន្ទីរ​ពិសោធន៍ជាតិទៅជា​គ្រឹះស្ថានរដ្ឋបាលសាធារណៈ ក្នុងគោលបំណងផ្តល់សេវាប្រកបដោយ​វិជ្ជាជីវៈជូនដល់វិស័យ​ឯកជនផងដែរ។

គួររំលឹកថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានកំណត់វិធាននៃការបង្កើត និងគ្រប់​គ្រង​សហគមន៍អំបិលខេត្តកំពត កែប តាមប្រកាសលេខ១៩៥ MISTI/២០២៣ ចុះថ្ងៃទី១៦ ខែសីហា ឆ្នាំ២​០​​​២៣ ដើម្បីលើកកម្ពស់ការផលិត ការធ្វើពិពិធកម្មផលិតកម្មអំបិល ការអភិរក្ស និងការអភិវឌ្ឍដីស្រែអំបិល ដើ​ម្បី​លើកកម្ពស់គុណភាពការផលិត និងស្តង់ដារសម្រាប់ផលិតកម្ម៕