សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាការពិត សេវាកម្មបង់រំលស់ជាសេវាកម្មល្អមួយដែលអាចជួយសម្រួលការចាយវាយរបស់ប្រជាជនមួយចំនួន។ ជំនួសឱ្យការប្រើប្រាស់ប្រាក់ទាំងដុលទៅទិញសម្ភារៈណាមួយ ប្រជាជនអាចជ្រើសរើសប្រើសេវាកម្មបង់រំលស់ដែលសមស្របទៅតាមលទ្ធភាពរបស់ពួកគេ។
ទាក់ទិននឹងការបង់រំលស់នេះដែរ លោក ហួរ ពុទ្ធី ដែលជាប្រធានជាន់ខ្ពស់ផ្នែករៀបចំយុទ្ធសាស្ត្រឥណទាននៃធនាគារអ៉ីអន បានលើកឡើងថា ការស្វែងរកដៃគូសម្រាប់បង់រំលស់គឺជារឿងដ៏សំខាន់មួយដែលប្រជាជនមិនគួរមើលរំលង។ អ្នកដែលមានបំណងចង់ប្រើសេវាកម្មនេះ គួរតែទៅរកស្ថាប័នណាដែលមានអាជ្ញាបណ្ណអនុញ្ញាតពីធនាគារជាតិ ដែលមានច្បាប់គ្រប់គ្រងត្រឹមត្រូវ។
ក្រៅតែពីចំណុចនេះទៅ លោក ហួរ ពុទ្ធី ក៏បានគូសបញ្ជាក់នូវចំណុចសំខាន់មួយទៀតគឺការរៀបចំផែនការហិរញ្ញវត្ថឱ្យបានច្បាស់លាស់។
អ្នកជំនាញរូបនេះបានមានប្រសាសន៍រៀបរាប់ថា៖
«ដើម្បីកុំឱ្យមានហានិភ័យហិរញ្ញវត្ថុ ប្រជាជនគួរតែមានផែនការចំណាយចំណូលឱ្យបានច្បាស់លាស់ ជាពិសេសត្រូវមានមួយកញ្ចប់ដាច់ដោយឡែកសម្រាប់តែការបង់សងត្រឡប់ទៅកាន់ស្ថាប័នផ្ដល់កម្ចីវិញ។»
ប្រសិនបើមានលទ្ធភាព លោកលើកទឹកចិត្តឱ្យអតិថិជនបែងចែកប្រាក់មួយកញ្ចប់ទៀតសម្រាប់ករណីអាសន្ន។ កញ្ចប់នេះនឹងអាចធានាសុវត្ថិភាពដល់អតិថិជនក្នុងករណីដែលរូបគេមានបញ្ហាការងារជាដើម។
លោកបន្តសង្កត់ធ្ងន់ដែរថា៖
«ប្រជាជនត្រូវដឹងថាគាត់ប្រើប្រាស់សេវាកម្មឱ្យឆ្លើយតបទៅនឹងតម្រូវការចាំបាច់របស់គាត់។ ឧទាហរណ៍ថា លទ្ធភាពគាត់អាចខ្ចីបានត្រឹមម៉ូតូសេរីឆ្នាំ២០០០ទេ តែគាត់ចង់បានសេរីឆ្នាំ២០២៤ ដូច្នេះនៅពេលសិក្សាជាមួយធនាគារមិនជោគជ៏យ គាត់អាចនឹងប្រើប្រាស់កម្ចីឯកជន ចំណុចនេះហើយដែលបង្កការគ្រោះថ្នាក់សម្រាប់គាត់។»
ជារួម លោកលើកទឹកចិត្តឱ្យប្រជាជនដែលមានបំណងចង់ប្រើសេវាកម្មបង់រំលស់បើកចិត្តក្នុងការជជែកជាមួយគ្រឹះស្ថានផ្ដល់កម្ចី និងសហការក្នុងដំណើរការសិក្សាលទ្ធភាព ហើយប្រសិនបើគ្រឹះស្ថានផ្ដល់កម្ចីសិក្សាឃើញថាអតិថិជនរូបនោះមិនមានលទ្ធភាពទិញសម្ភារៈតាមការចង់បានរបស់ខ្លួនទេ ក៏សូមឱ្យអតិថិជនគោរពទៅតាមការណែនាំរបស់ធនាគារ៕
Account
Security
Favourite Content