វ៉ាស៊ីនតោន៖ ធនាគារពិភពលោក World Bank កាលពីថ្មីៗនេះ បាន​អនុម័តការ​វិនិយោគ​ថ្មី​មួយ​ទៀតសម្រាប់​គម្រោងកែលម្អ​ហេដ្ឋារចនាសម្ព័ន្ធ ផ្គត់ផ្គង់ទឹកនៅកម្ពុជា ដែលគេរំពឹង​ថានឹង​ផ្តល់​អត្ថប្រយោជន៍​​ដល់​​ប្រជាជនជាង ១១៣ ០០០នាក់។ គម្រោងនេះស្ថិតក្រោមការផ្តល់ហិរញ្ញប្បទានឥណទានក្នុងចំនួនទឹកប្រាក់ ១៤៥ លានដុល្លារអាមេរិក នឹងធ្វើឱ្យសន្តិសុខទឹកមានភាពប្រសើរ ដែលជួយបង្កើនផលិតភាពកសិកម្ម និងកសាងភាពធន់ទៅនឹងអាកាសធាតុ។

សមាគមអភិវឌ្ឍន៍អន្តរជាតិ (IDA) របស់ធនាគារពិភពលោក បានផ្តល់“គម្រោងកែលម្អសន្តិសុខទឹកនៅកម្ពុជា” (Cambodia Water Security Improvement Project) ក្រោមជំនួយឥណទានចំនួន ១៤៥ លានដុល្លារអាមេរិក ដែលនឹងធ្វើឱ្យគម្រោងកែលម្អ​ហេដ្ឋារចនាសម្ព័ន្ធផ្គត់ផ្គង់ទឹកនៅកម្ពុជាកាន់​តែ​មាន​ភាព​ប្រសើរឡើង។

លោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំនៅ​កម្ពុជា មានប្រសាសន៍ថា គម្រោងនេះ​នឹង​ជួយប្រទេសកម្ពុជាឱ្យ​មានសន្តិសុខទឹកប្រកបដោយចីរភាព និងសម្រេច​បាន​ផលិតភាពកសិកម្មកាន់តែ​ច្រើន។

លោក​ស្រី​ បានមាន​ប្រសាសន៍​​ថា ៖ ការវិនិយោគនៅពេលនេះ​ផ្តោតទៅ​លើភាពធន់ទៅ​នឹងអាកាស​ធាតុ ការធ្វើផែន​ការ និងការ​រៀបចំ​ហេដ្ឋារចនាសម្ព័ន្ធឱ្យ​កាន់តែប្រសើរឡើង ដែលមិនត្រឹមតែអាច​ឆ្លើយ​តប​បានភ្លាម​ៗ​​ទៅនឹងតម្រូវការទឹករបស់កសិករ និងគ្រួសារ​កម្ពុជា​ប៉ុណ្ណោះ​ទេ ប៉ុន្តែថែមទាំងធ្វើ​ជាមូលដ្ឋានគ្រឹះសម្រាប់ការផ្តល់​សេវា​ទឹករយៈពេលវែងផងដែរ។

សូមជម្រាបដែរថា គម្រោងនេះនឹងត្រូវអនុវត្តក្នុងរយៈពេលប្រាំឆ្នាំ ដោយក្រសួងធនធានទឹក និងឧតុនិយម និងក្រសួងកសិកម្ម រុក្ខា​ប្រមាញ់ និងនេសាទ។ គម្រោងនឹងពង្រឹងការគ្រប់គ្រងធនធានទឹកតាមរយៈការពង្រីកស្ថា​នីយជលសាស្ត្រ ការ​ធ្វើបច្ចុប្បន្ន​ភាព​គោលនយោបាយ និងបទប្បញ្ញត្តិ ការរៀបចំផែនការគ្រប់គ្រងអាងទន្លេដែលមានព័ត៌មានអំពី​អាកាសធាតុ និងការ​ពង្រឹង​ការបំពេញមុខងាររបស់អាជ្ញាធរទឹកថ្នាក់​ជាតិ​ និងថ្នាក់​ខេត្ត។

ប្រព័ន្ធផ្គត់ផ្គង់ទឹកសម្រាប់គ្រួសារ និងប្រព័ន្ធធារាសាស្រ្ត ​នឹង​ត្រូវ​បាន​ស្តារឡើងវិញ និងកែលម្អឱ្យ​ប្រសើរឡើង ហើយ​សហគមន៍កសិករ ​អ្នកប្រើប្រាស់ទឹក ​​នឹងទទួល​បាន​ការ​បណ្តុះបណ្តាល​ និង​ជំនួយបច្ចេកទេស​តាម​រយៈគម្រោងសម្រាប់ធ្វើ​ប្រតិបត្តិការ និងការថែទាំហេដ្ឋារចនាសម្ព័ន្ធ ដែល​ត្រូវ​បាន​កែលម្អឡើងវិញ។ តាម​រយៈមន្ទីរកសិកម្ម រុក្ខាប្រមាញ់ និងនេសាទ ថ្នាក់ជាតិ​ និងថ្នាក់​ខេត្ត វិធានការនានានឹងត្រូវធ្វើឡើងដើម្បីជួយកសិករឱ្យ​ចេះ​ចាប់​យកបច្ចេកវិទ្យាឆ្លាតវៃសម្រាប់​បង្កើន​ផលិតភាព និងកាត់បន្ថយការបំភាយឧស្ម័ននៅ​ក្នុងវិស័យ​កសិកម្ម៕