ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា CDC បានឱ្យដឹងថា ក្នុងត្រីមាសទី១ ឆ្នាំ២០២៥ នេះ CDC បានចុះបញ្ជីគម្រោងវិនិយោគសរុបចំនួន ១៧២គម្រោងដែលមានទុនវិនិយោគសរុបប្រមាណ ២៥០០លានដុល្លារអាមេរិក និងអាចបង្កើតការងារបានចំនួន១២ម៉ឺនកន្លែង ។

តាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ចេញផ្សាយថ្ងៃទី៨ ខែមេសា ឆ្នាំ២០២៥ បានបញ្ជាក់ថា គិតចាប់ពីខែមករា ដល់ដំណាច់ខែមីនា ឆ្នាំ២០២៥ ក្នុងចំណោមគម្រោងវិនិយោគទាំង១៧២គម្រោង មានគម្រោងពង្រីកផលិតកម្មចំនួន ៦គម្រោង ហើយក្នុងចំណោមគម្រោងវិនិយោគទាំងអស់នោះ មានទីតាំងស្ថិតនៅក្រៅតំបន់សេដ្ឋកិច្ចពិសេសចំនួន៩៩គម្រោង និងគម្រោងវិនិយោគដែលមានទីតាំងស្ថិតនៅក្នុងតំបនសេដ្ឋកិច្ចពិសេសចំនួន៧៣គម្រោង ។

យោងតាមសេចក្ដីប្រកាសព័ត៌មានដដែលនេះ ក្នុងត្រីមាសទី១ ឆ្នាំ ២០២៥នេះ ការចុះបញ្ជីគម្រោងវិនិយោគមានការកើនឡើង៦៦គម្រោង ខណៈទុនវិនិយោគមានការកើនឡើងប្រមា​ណជាង៣០៥លានដុល្លារអាមេរិក ស្មើនឹងប្រមាណ១៤ភាគរយ ធៀបនឹងរយៈពេលដូចគ្នាក្នុងឆ្នាំ ២០២៥ ។ ដោយឡែកក្នុងខែមីនាកន្លងទៅនេះ ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគសរុបចំនួន៦០គម្រោង ក្នុងទុនវិនិយោគប្រមាណ១,៤ពាន់លានដុល្លារអាមេរិក និងអាចបង្កើតការងារបានប្រមាណជិត ៥ម៉ឺនកន្លែង ក្នុងនោះគម្រោងពង្រីកផលិតកម្មមានចំនួន២គម្រោងផងដែរ ។

ជាការកត់សម្គាល់ ក្នុងត្រីមាសទី១ឆ្នាំ ២០២៥នេះ គម្រោងវិនិយោគធំៗ ដែលមានភាពលេចធ្លោជាងគេប្រចាំត្រីមាសរួមមាន៖ គម្រោងអភិវឌ្ឍន៍ស្ថានីយ៍ផលិតអគ្គិសនីដើរដោយពន្លឺព្រះអាទិត្យចំនួន៣គម្រោង អានុភាពសរុប៣៥០មេហ្កាវ៉ាត់ ដែលមានទីតាំងស្ថិតនៅក្នុងខេត្តកំពង់ឆ្នាំង ខេត្តពោធិ៍សាត់ មានទុនវិនិយោគសរុបប្រមាណ ២៥៩លានដុល្លារអាមេរិក បង្កើតការងារបាន១០៩កន្លែង ។

ក្រៅពីនេះមានគម្រោងវិនិយោគបង្កើតរោងចក្រកែច្នៃលោហធាតុចំនួន៣គម្រោង មានទីតាំងនៅខេត្តបន្ទាយមានជ័យ កំពត និងខេត្តកំពង់ស្ពឺ មានទុនវិនិយោគប្រមាណ៨៣,៣លានដុល្លារអាមេរិក បង្កើតការងារបានចំនួន១១០០កន្លែង។

សូមជម្រាបដែរថា​ ក្នុងឱកាសនៃកិច្ចពិភាក្សាជាមួយវិនិយោគិនថ្មីៗនេះ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានជម្រាបជូនអំពីជំហររបស់រាជរដ្ឋាភិបាលកម្ពុជាដែលតែងតែខ្វល់ខ្វាយ និងមានការយកចិត្តទុកដាក់យ៉ាងខ្លាំងចំពោះសុខទុក្ខរបស់អ្នកវិនិយោគ។ ជាក់ស្តែងបញ្ហាពន្ធ លោក ដូណាល់ ត្រាំ បានប្រកាសព័ត៌មានអំពីការកំណត់ពន្ធទៅលើបណ្តាប្រទេសនានា រួមទាំងប្រទេសកម្ពុជា រាជរដ្ឋាភិបាល បានបើកកិច្ចប្រជុំបន្ទាន់ជាបន្តបន្ទាប់ ដើម្បីប្រមូលនូវធាតុចូលនានា និងពិនិត្យ ឆ្លើយតបទៅនឹងភាគីសហរដ្ឋអាម៉េរិកវិញផងដែរ។

ជាលទ្ធផល រាជរដ្ឋាភិបាលកម្ពុជាបានចេញលិខិតផ្លូវការចំនួន ២ ដែលចេញដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងក្រសួងពាណិជ្ជកម្ម ក្នុងគោលបំណងស្នើឱ្យមានកិច្ចចរចាទ្វេភាគីរវាងសហរដ្ឋអាមេរិក និងកម្ពុជា ការបង្ហាញឆន្ទះក្នុងការបញ្ចុះអត្រាពន្ធ ក្នុងកម្រិត​អតិប្បរមាពី៣៥% មកនៅត្រឹម ៥%, និងស្នើឱ្យមានការពន្យាពេលសម្រាប់អនុវត្តន៍អត្រាពន្ធដែលបានកំណត់។

រាជរដ្ឋាភិបាលកម្ពុជា​ សូមស្នើឱ្យវិនិយោគិនរក្សាភាពស្ងៀមស្ងាត់ បន្តដំណើរការអាជីវកម្មរបស់ខ្លួនជាប្រក្រតី និងរង់ចាំដោយក្តីសង្ឃឹមជឿជាក់មកលើរាជរដ្ឋាភិបាល ក្នុងកិច្ចជំនួបពិភាក្សារវាងរាជរដ្ឋាភិបាលកម្ពុជាជាមួយសហរដ្ឋអាមេរិក ដើម្បីស្វែងរកដំណោះស្រាយជូនវិនិយោគិន នាពេលឆាប់ៗដ៏ខ្លីខាងមុខនេះ៕