សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ តាមរយៈការសន្យាវិនិយោគថ្មីចុងក្រោយមួយដែលមានទំហំ៦០០ពាន់លានដុល្លារពីសំណាក់តំបន់អឺរ៉ុបទៅក្នុងទឹកដីសហរដ្ឋអាម៉េរិក បូករួមជាមួយនឹងកុងត្រាពាណិជ្ជកម្មទំហំ ៧៥០ពាន់លានដុល្លារផងនោះ បានធ្វើឲ្យរដ្ឋបាលលោក Trump ប្រើពេលមិនដល់២សប្តាហ៍ផងអាចទទួលបានប្រយោជន៍សម្រាប់សេដ្ឋកិច្ចជាតិសរុបដល់ទៅជិត ២ទ្រីលានដុល្លារអាម៉េរិក។
ប្រធានាធិបតីអាម៉េរិក លោក Donald Trump កាលពីថ្ងៃចន្ទដើមសប្តាហ៍បានប្រកាសថា សហភាពអឹរ៉ុបនឹងបញ្ចេញកញ្ចប់វិនិយោគប្រមាណជា ៦០០ពាន់លានដុល្លារចាក់ចូលទៅក្នុងប្រទេសអាម៉េរិក ជាមួយនឹងកិច្ចព្រមព្រៀងពាណិជ្ជកម្មដើម្បីទិញផលិតផលនានារបស់អាម៉េរិកដែលមានទាំងថាមពល និងសព្វាវុធ ចំនួន៧៥០ពាន់លានដុល្លារផ្សេងទៀត ដែលជាផ្នែកមួយនៃការព្រមព្រៀងដើម្បីទំលាក់តម្លៃពន្ធគយ ១៥ភាគរយពីសហរដ្ឋអាម៉េរិក។
សេចក្ដីប្រកាសនេះធ្វើឡើងបន្ទាប់ពីអាម៉េរិក ទើបតែទទួលបានកញ្ចប់វិនិយោគប្រមាណជា ៥៥០ពាន់លានដុល្លារពីសម្ព័ន្ធមិត្តជប៉ុនរបស់ខ្លួនកាលពីសប្តាហ៍មុន ហើយក៏ជាថ្នូរនឹងការទទួលយកពន្ធគយ១៥ភាគរយដូចគ្នាពីអាម៉េរិក។ នេះមានន័យថា អាម៉េរិកបានទទួលកុងត្រាសរុបដល់ទៅ១៩០០ពាន់លានដុល្លារដោយប្រើពេលត្រឹមតែ ២សប្តាហ៍ប៉ុណ្ណោះ។
ក្រោយភាពជោគជ័យក្នុងការចរចាកិច្ចព្រមព្រៀងពាណិជ្ជកម្មជាមួយនឹងដៃគូទាំងពីរនេះរួចមក រដ្ឋាភិបាលក្រុងវ៉ាស៊ិនតោន កាលពីថ្ងៃចន្ទសប្ដាហ៍នេះ បានសម្លឹងមើលចំណុចផ្សេងទៀតដែលអាចទាញបានជាផលចំណេញបន្ថែមលើកិច្ចជំនួបមន្ត្រីជាន់ខ្ពស់ជាមួយដែលជាមហាអំណាចសេដ្ឋកិច្ចទី២របស់ពិភពលោកគឺប្រទេសចិនផងដែរ។
ជំនួបដែលមានតំណាងចូលរួមពីសំណាក់រដ្ឋមន្ត្រីរតនាគារជាតិអាម៉េរិក លោក Scott Bessent និងឧបនាយករដ្ឋមន្ត្រីចិន លោក He Lifeng ត្រូវបានរៀបចំឡើងកាលពីថ្ងៃចន្ទសប្ដាហ៍នេះ នាទីក្រុង Stockholm ប្រទេសស៊ុយអែត។ ការចរចានេះធ្វើឡើងបន្ទាប់ពីភាគីទាំងពីរបានយល់ព្រមពន្យាពេលក្នុងការដាក់តម្លៃពន្ធគយខ្ពស់ទៅវិញទៅមកដែលមានសុពលភាពត្រឹមថ្ងៃទី១២ ខែសីហា ខាងមុខនេះ។
ជុំវិញបញ្ហានេះ លោក Jamie Cox ប្រធានកិច្ចការងារសម្រាប់ដៃគូនៃក្រុមហ៊ុន Harris Financial Group បានលើកឡើងថា៖ នៅពេលដែលជប៉ុនបានសម្រេចចិត្តយល់ព្រមលើកិច្ចព្រមព្រៀងវិនិយោគថ្មីទៅហើយនោះ សម្រាប់តំប់អឺរ៉ុបគឺនៅសេសសល់ជម្រើសតិចតួចណាស់ដើម្បីបដិសេធអាម៉េរិក។ ប៉ុន្តែ យ៉ាងណាក្តី សម្រាប់ភាគីចិនវិញ នឹងមិនអាចងាយស្រួលដូចការរំពឹងទុករបស់សហរដ្ឋអាម៉េរិកនោះឡើយ។
គួរឲ្យដឹងដែរ ថាអាម៉េរិកក៏កំពុងទទួលបានជោគជ័យជាមួយនឹងសង្ក្រាមពាណិជ្ជកម្មតាមបណ្តាប្រទេសមួយចំនួនរួចទៅហើយ ដែលនៅក្នុងនោះក៏មានប្រទេសក្នុងតំបន់អាស៊ីផងដែរ ដូចជា ហ្វីលីពីន និងឥណ្ឌូនេស៊ី ជាដើម ដែលព្រមទទួលយកតម្លៃពន្ធគយថ្មី១៩ភាគរយ ខណៈដែលប្រទេសវៀតណាមទទួលពន្ធប្រមាណជា២០ភាគរយ ដែលទាំងអស់នេះគឺជាអ្វីដែលរដ្ឋបាលលោក Trump បានខិតខំជាមួយនឹងការប្តូរលើការនាំចូលទំនិញពីអាម៉េរិកជាប់ពន្ធគយសូន្យ៕
Account
Security
Favourite Content