ភ្នំពេញ ៖ ដីស្រែអំបិលនៅក្នុងខេត្តកំពត និងកែប នឹងត្រូវ​រៀបចំ​ដើម្បីរក្សា​ទុក​ជាទីតាំង​យុទ្ធសាស្ត្រ​សម្រាប់ជាតិរយៈពេល​យូរអង្វែង ដោយ​ក្រសួង​រៀបចំដែនដី នគរូបនីយកម្ម​ និងសំណង់​ នឹង​រៀបចំផែនការ​នៃការ​ប្រើប្រាស់​ដីនៅទីតាំង​នោះឱ្យបាន​ត្រឹមត្រូវ និងមានប្រសិទ្ធភាព​ ធ្វើយ៉ាងណាឱ្យពលរដ្ឋ​ក្នុងតំបន់នោះទទួលបានប្រាក់ចំណូល​បន្ថែម ។​​

នៅក្នុង​កិច្ចប្រជុំ​ប្រមូលធាតុចូល និងរកដំណោះស្រាយ​ករណី​ដីស្រែអំបិលនៅខេត្ត​កំពត និងកែប កាលពីចុងសប្ដាហ៍កន្លងទៅនេះ ឯកឧត្តម​ សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួង​រៀបចំដែនដី នគរូបនីយកម្ម និង​សំណង់​ បានបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ បានចាត់ទុកថា ករណីដីស្រែអំបិលនៅខេត្តកំពត និងខេត្តកែប ជាករណីសំខាន់មួយដែលត្រូវរៀបចំផែនការនៃការប្រើប្រាស់ដីឱ្យបានត្រឹមត្រូវ ដើម្បីរក្សាទុកស្រែអំបិលនៅខេត្តកំពត និងខេត្តកែប ជាកន្លែងយុទ្ធសាស្ត្រសម្រាប់ជាតិក្នុងរយៈពេលយូរអង្វែង និងអាចពិនិត្យលទ្ធភាពកែច្នៃបន្ថែមជាហាងកាហ្វេ ឬកន្លែងស្នាក់នៅសម្រាប់ភ្ញៀវទេសចរមកកម្សាន្ត ដើម្បីឱ្យប្រជាពលរដ្ឋក្នុងតំបន់នេះទទួលបានប្រាក់ចំណូលបន្ថែមទៀត ។

ឯកឧត្តម​បន្តថា កិច្ចការអាទិភាពរបស់ក្រសួងក្នុងការចុះបញ្ជីដីធ្លីបង្ហើយទូទាំងប្រទេសគឺជិតបញ្ចប់រួចរាល់ជាស្ថាពរហើយ ដោយនៅសល់ត្រឹមតែប្រមាណ ១០ ម៉ឺនក្បាលដីទៀតប៉ុណ្ណោះ ហើយចាប់ពីពេលនេះតទៅមុខ ក្បាលដីនៅទូទាំងប្រទេសអាចនឹងមានចំនួនសរុបប្រមាណជា ១៣លាន ៥០ម៉ឺនក្បាលដី។ ដោយឡែកបញ្ហាជម្លោះដីធ្លីក៏ដោះស្រាយបញ្ចប់ជិតរួចរាល់សព្វគ្រប់ផងដែរ គឺនៅសល់តែករណីធំៗមួយចំនួនដែលត្រូវការពេលវេលាបន្ថែមទៀតក្នុងការដោះស្រាយ។

ឯកឧត្តម បានគូសបញ្ជាក់ថា ៖

«កំពត គួរតែជាខេត្តដែលផ្ដល់នូវអំបិលគ្រប់គ្រាន់សម្រាប់ព្រះរាជាណាចក្រកម្ពុជា ហើយការផលិតអំបិលត្រូវតែធ្វើក្នុងតម្លៃដើមសូន្យ ។ អំបិលជាប្រភេទទំនិញយុទ្ធសាស្ត្ររបស់ជាតិ ហើយការផលិតអំបិលជាឧស្សាហកម្មមួយដែលយើងត្រូវចូលរួមលះបង់ដើម្បីជាតិ ពីព្រោះទាមទារឱ្យមានតម្លៃដើមផលិតទាបបំផុត ងាយស្រួលសម្រាប់ការផ្គត់ផ្គង់នៅក្នុងប្រទេស, ជួយដល់កសិករ, ងាយស្រួលសម្រាប់ការប្រកួតប្រជែងទីផ្សារ និងកសាងសេដ្ឋកិច្ចជាតិ»។

ឯកឧត្តម​បន្ថែមថា ៖

«គួរ​តែ​ដល់ពេលវេលាហើយដែលយើងទាំងអស់គ្នាត្រូវខិតខំប្រឹងប្រែងពង្រឹងសមត្ថភាពរបស់ខ្លួន រៀនរស់ដោយខ្លួនឯងដើម្បីជំរុញខឿនសេដ្ឋកិច្ចកម្ពុជាឱ្យកាន់តែរឹងមាំ»។

ឯកឧត្តមឧបនាយករដ្ឋមន្ត្រី ក៏បានស្នើសុំឱ្យមានការចូលរួមមតិយោបល់ពីអង្គប្រជុំបន្ថែមទៀត ដើម្បីរៀប​រៀងជាគោលនយោបាយ និងលក្ខខណ្ឌនៃការប្រើប្រាស់ដីស្រែអំបិលនេះឱ្យបានត្រឹមត្រូវក្នុងគោលដៅរក្សា​ទុកឱ្យបានគង់វង្ស និងបញ្ជូនបន្តស្នើសុំការសម្រេចពីរាជរដ្ឋាភិបាល ។​

គួរ​រម្លឹកថា​ ក្នុងប្រទេស​កម្ពុជា ទីតាំង​ផលិតអំបិល​ដ៏មានសក្ដានុពល​គឺមានតែ​ខេត្តកំពត​ និងកែប​ប៉ុណ្ណោះ ហើយ​ទីតាំង​នេះ ក្នុងមួយឆ្នាំៗអាចផលិតអំបិល​សម្រាប់ផ្គត់ផ្គង់​ដល់ពលរដ្ឋ​នៅទូទាំង​ប្រទេស ។ ដោយឡែក​ទិន្នផល​អំបិល​ប្រចាំឆ្នាំ ក៏អាស្រ័យទៅលើ​អាកាស​ធាតុ បើឆ្នាំណាអាកាស​ធាតុក្ដៅ និងអូស​បន្លាយ​យូរ​វាក៏អំណោយផល​សម្រាប់ការផលិតអំបិល តែបើសិនជា​ឆ្នាំណា​មានភ្លៀងធ្លាក់​ច្រើនទិន្ន​ផល​អំបិលក៏ធ្លាក់ចុះទៅតាមហ្នឹងដែរ ។ ដូច្នេះការរក្សា​ទុក​ទីតាំង​ស្រែអំបិល​ក្នុង​ខេត្តកំពត និងកែប គឺជាការ​រក្សា​នូវការផលិតអំបិលសម្រាប់ផ្គត់ផ្គង់លើទីផ្សារ​ក្នុងប្រទេស​ និងអាចនាំ​ចេញទៅក្រៅប្រទេស​ផងដែរ ៕ ​