បរទេស៖កាលពីដើមខែធ្នូកន្លងមកនេះ អនុស្សណៈយោគយល់គ្នារវាង៣ប្រទេសដែលស្ថិតនៅតំបន់ប៉ែកអាគ្នេយ៍នៃប្លុកអឺរ៉ុបត្រូវបានធ្វើឡើង។កិច្ចព្រមព្រៀងដែលនឹងអនុញ្ញាតឲ្យមានការកសាងគម្រោងគមនាគមន៍ដ៏ធំមួយរវាងគ្នាក្នុងការផ្តល់ផលប្រយោជន៍យ៉ាងច្រើនទៅដល់គ្រប់ភាគីផងទៅដល់ប្លុកអឺរ៉ុបទាំងមូលផងនិងក៏ដូចជាជួយបង្កើនកម្លាំងរបស់អង្គការ​ណាតូផង។

ក្នុងគ្រាដែលស្ថានភាពភូមិសាស្ត្រនយោបាយមិនប្រាកដប្រជា ជាពិសេសក្នុងតំបន់អឺរ៉ុបនោះ ប្រទេសប៊ុលហ្គារ៉ិ ប្រទេសក្រិកនិងរ៉ូមេនី បានបង្ហាញនូវមហិច្ឆតារួមគ្នាក្នុងការកសាងនូវគម្រោងគមនាគមដ៏ធំមួយនៅច្រករបៀងរវាងសមុទ្រ Aegean Sea ទៅដល់សមុទ្រខ្មៅ Black Sea ។

កាលពីថ្ងៃទី៣ខែធ្នូកន្លងមកនេះប្រទេសទាំងបីបានចូលរួមក្នុងការចុះហត្ថលេខាលើកិច្ចព្រមព្រៀងអនុស្សរណៈយោគយល់គ្នានាទីក្រុងប្រ៊ូស៊ែលដើម្បីអនុវត្តគម្រោងអភិវឌ្ឍបណ្តាញ​ហេដ្ឋារចនាសម្ព័ន្ធដ៏ធំមួយដែលស្ថិតនៅក្រោមការគាំទ្រយ៉ាងពេញទំហឹងពីសំណាក់គណៈកម្មការអឺរ៉ុប European Commission (EC) និងធនាគារវិនិយោគអឺរ៉ុប European Investment Bank (EIB)។

យោងតាមបណ្តាញសារព័ត៌មានក្នុងស្រុករបស់ប៊ុលហ្គារីEualive និងNovinataបានសរសេរថា៖គោលដៅធំនៃការបង្កើតបណ្តាញដឹកជញ្ជូននេះនឹងអាចជួយធ្វើឲ្យសកម្មភាពពាណិជ្ជកម្មកាន់តែមានភាពឆាប់រហ័ស ការប្រកួតប្រជែងក្នុងទីផ្សារនិងជាពិសេសបញ្ចប់ទៅជាប្រវត្តិសាស្ត្រភាពឯកោនិងដាច់ស្រយាលនៅក្នុងតំបន់ប៉ែកខាងអាគ្នេយ៍របស់ប្លុកអឺរ៉ុបឲ្យទៅជាតំបន់ដែលមានសេដ្ឋកិច្ចរីកចម្រើននិងមានសារៈសំខាន់ខ្លាំងឡើងវិញចំពោះប្លុកទាំងមូល។

បន្ថែមពីនេះ គម្រោងនេះក៏នឹងក្លាយទៅជាផ្លូវពាណិជ្ជកម្មថ្មី និងភ្ជាប់កំពង់ផែធំៗ មជ្ឈមណ្ឌលថាមពល និងមជ្ឈមណ្ឌលសេដ្ឋកិច្ច ហើយនៅពេលដែលបានបញ្ចប់ច្រករបៀងនឹងក្លាយទៅជាផ្នែកមួយដែលមិនអាចខ្វះបាននៃបណ្តាញដឹកជញ្ជូនឆ្លងទ្វីបអឺរ៉ុប ជំរុញពាណិជ្ជកម្ម ទេសចរណ៍ និងស្ថិរភាពក្នុងតំបន់ទាំងមូល។

គម្រោងសំខាន់ៗដែលរួមមានទាំងស្ពានធំៗចំនួន៣នៅប៊ុលហ្គារី គម្រោងឆ្លងទន្លេ គម្រោងធ្វើឲ្យប្រសើរឡើងនៃផ្លូវដែកនិងផ្លូវហាយវេ៉យព្រមទាំងគម្រោងពង្រីកផែនិងផ្លូវដឹកជញ្ជូនតាមផ្លូវទឹកជាច្រើនផ្សេងទៀតផងដែរ។

អត្ថប្រយោជន៍ជាច្រើនទៀតក៏នឹងត្រូវបានផ្តល់ទៅឲ្យប្លុកយោធាណាតូដែលដឹកនាំដោយអាមេរិកផងដែរ។ក្រុមមន្ត្រីកំពូលៗបានលើកឡើងថាគំនិតផ្តួចផ្តើមនឹងអាចជួយលើកតម្កើងប្រសិទ្ធភាពនៃការរស់នៅរបស់ជនស៊ីវិលផងនិងក៏ដូចជាវិស័យយោធាផងដែរ។ហេដ្ឋារចនាសម្ព័ន្ធថ្មីនឹងអាចជំរុញឲ្យទាំងណាតូនិងអឺរ៉ុបក្នុងការចល័តទ័ពបានលឿនជាងមុននិងសុវត្ថិភាពជាងមុនដោយគិតចាប់តាំងតែពីពីផែសមុទ្រមួយចំនួនរបស់ប្រទេសក្រិកឆ្លងកាត់ប៊ុលហ្គារីនិងរ៉ូមេនីឆ្ពោះទៅកាន់ប្រទេសម៉ូដុលវ៉ានិងអ៊ុយក្រែនបានយ៉ាងងាយស្រួល។

គួរឲ្យដឹងដែរថាឯកសារព្រមព្រៀងនេះត្រូវបានចុះហត្ថលេខាដោយឧបនាយករដ្ឋមន្ត្រី និងជារដ្ឋមន្ត្រីក្រសួងដឹកជញ្ជូន និងគមនាគមន៍លោក Grozdan Karadjov រដ្ឋមន្ត្រីបណ្តោះអាសន្នក្រសួងដឹកជញ្ជូននៃប្រទេសក្រិក លោក Konstantinos Kiranakis និង រដ្ឋលេខាធិការនៃក្រសួងដឹកជញ្ជូននៃប្រទេសរូម៉ានី លោក Ionut Cristian Savoiu ព្រមទាំងភាគីមកពី EC និង EIB ផងដែរ។

Black Sea ឬសមុទ្រខ្មៅគឺជាច្រកសមុទ្រដ៏មានសារៈសំខាន់ដោយសារតែទីតាំងភូមិសាស្ត្ររបស់វា។ Black Sea ដើរតួជាការតភ្ជាប់ដ៏សំខាន់រវាងអឺរ៉ុប និងអាស៊ី និងជាផ្លូវដ៏សំខាន់សម្រាប់​ពាណិជ្ជកម្មអន្តរជាតិ ថាមពល និងសន្តិសុខស្បៀង។វាជាចំណុចឆ្លងកាត់​ដ៏សំខាន់សម្រាប់ការនាំចេញពីប្រទេសរុស្ស៊ី និងអ៊ុយក្រែន ជាពិសេសគ្រាប់ធុញ្ញជាតិ និងបម្រើជាច្រករបៀងថាមពលដែលមានបំពង់បង្ហូរប្រេងដែលដំណើរការនៅក្រោមបាតសមុទ្រផង។ តំបន់នេះក៏មានសារៈសំខាន់ផ្នែកយោធា និងសន្តិសុខផងដែរ ជាមួយនឹងសកម្មភាពកងទ័ពជើងទឹកដ៏សំខាន់ និងប្រវត្តិនៃជម្លោះ ដែលធ្វើឱ្យវាក្លាយជាចំណុចដែលមិនមើលរំលងឡើយសម្រាប់មហាអំណាចពិភពលោក៕