បរទេស ៖ នាយករដ្ឋមន្ត្រីទីម័រខាងកើត លោក​ Kay Rala Xanana Gusmao បានជួបពិភាក្សាជាមួយ​លោក តូ ឡឺម ប្រធានរដ្ឋ និងជាអគ្គលេខាធិការបក្សកុម្មុយនីស្តវៀតណាម ក្នុងគោលបំណងបង្កើនទំនាក់ទំនងមិត្តភាពយូរអង្វែង និងកិច្ចសហប្រតិបត្តិការពហុវិស័យ ក្នុងឱកាសដែលលោកទៅបំពេញទស្សនកិច្ចនៅវៀតណាម រយៈពេល ៤ ថ្ងៃ គិតចាប់តាំងពីថ្ងៃទី ៧ ដល់ ថ្ងៃទី ១០​ ខែមិថុនា ដើម្បីចូលរួមវេទិកាអនាគតអាស៊ាន។

យោងតាមសេចក្ដីរាយការណ៍ពី Vietnam Net បានឱ្យដឹងថា​ នៅក្នុងដំណើរទស្សនកិច្ចផ្លូវការរបស់លោក​ Kay Rala Xanana Gusmao ខាងលើនេះ គឺជាឱកាសដ៏មានអត្ថន័យយ៉ាងពិសេសសម្រាប់ទីម័រខាងកើត ក្នុងការចូលរួមកម្មវិធីរបស់អាស៊ានជាលើកដំបូងក្នុងនាមជាសមាជិកពេញសិទ្ធិ។

ជាកិច្ចស្វាគមន៍ចំពោះមេដឹកនាំទីម័រខាងកើតកាលពីថ្ងៃពុធ សប្ដាហ៍នេះ លោក តូ ឡឹម បានលើកឡើងថា ដំណើរទស្សនកិច្ចនេះមានសារៈសំខាន់យ៉ាងខ្លាំង និងជាការបើកទំព័រថ្មីនៃកិច្ចអភិវឌ្ឍន៍សំខាន់ៗក្នុងទំនាក់ទំនងមិត្តភាពយូរអង្វែងរវាងវៀតណាម និងទីម័រខាងកើត។

លោក តូ ឡឹម ក៏បានអបអរសាទរទីម័រខាងកើតចំពោះសមិទ្ធផលនាពេលថ្មីៗនេះ ជាពិសេសការចូលជាសមាជិកអាស៊ានជាផ្លូវការ។ វៀតណាមនឹងបន្តគាំទ្រទីម័រខាងកើតក្នុងការធ្វើសមាហរណកម្មយ៉ាងពេញលេញ ទាំងក្នុងតំបន់ និងអន្តរជាតិ។ មេដឹកនាំទាំងពីរឯកភាពរក្សាការសម្របសម្រួលយ៉ាងជិតស្និទ្ធនៅក្នុងអាស៊ាន អង្គការសហប្រជាជាតិ និងវេទិកាតំបន់ និងអន្តរជាតិផ្សេងទៀត។ ពួកគេក៏បានសន្យាថានឹងរួមចំណែកដល់ការរួបរួមរបស់អាស៊ាន ពង្រឹងតួនាទីកណ្តាលរបស់ប្លុក, គាំទ្រសន្តិភាព ស្ថិរភាព កិច្ចសហប្រតិបត្តិការ, និងការអភិវឌ្ឍន៍នៅទូទាំងអាស៊ីអាគ្នេយ៍។

ទន្ទឹមនឹងនេះ លោក តូ ឡឹម បានស្នើឲ្យប្រទេសទាំងពីរបន្តពង្រឹងទំនាក់ទំនងនយោបាយរវាងបក្សកុម្មុយនិស្តវៀតណាម និងសមាជជាតិសម្រាប់ការកសាងឡើងវិញរបស់ទីម័រខាងកើត (CNRT) ។ ទាំងវៀតណាម និង ទីម័រខាងកើត គួរតែពង្រីកកិច្ចសហប្រតិបត្តិការលើវិស័យការពារជាតិ និងសន្តិសុខ ដោះស្រាយបញ្ហាប្រឈមសន្តិសុខ ព្រមទាំងពង្រឹងទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគលើវិស័យដែលមានសក្តានុពលខ្លាំរួមមាន ប្រេង និងឧស្ម័ន រ៉ែ កសិកម្ម ទូរគមនាគមន៍ ការផ្លាស់ប្តូរឌីជីថល និងការអភិវឌ្ឍន៍ធនធានមនុស្ស។ លើសពីនេះ ភាគីទាំងពីរក៏មានបំណងបង្កើនកិច្ចសហប្រតិបត្តិការលើវិស័យអប់រំ ទេសចរណ៍ និងការផ្លាស់ប្តូរប្រជាជន និងប្រជាជន ដោយផ្អែកលើកិច្ចព្រមព្រៀងដែលបានចុះហត្ថលេខានាពេលថ្មីៗនេះ រួមមាន កិច្ចព្រមព្រៀងលើកលែងទិដ្ឋាការសម្រាប់អ្នកកាន់លិខិតឆ្លងដែនធម្មតា។

ជាការឆ្លើយតប លោកនាយករដ្ឋមន្ត្រី Xanana Gusmao បានស្វាគមន៍ចំពោះទិសដៅយុទ្ធសាស្ត្រដែលបានគូសបញ្ជាក់ដោយ លោក តូ ឡឹម សម្រាប់អនាគតនៃទំនាក់ទំនងទ្វេភាគី។ នាយករដ្ឋមន្ត្រីទីម័រខាងកើត បានសម្តែងនូវក្តីសង្ឃឹមថា ប្រទេសទាំងពីរនឹងរៀបចំកិច្ចប្រជុំលើកដំបូងសម្រាប់គណៈកម្មការចម្រុះលើកិច្ចសហប្រតិបត្តិការទ្វេភាគីនាពេលឆាប់ៗនេះ ដើម្បីពិភាក្សាអំពីផែនការជាក់លាក់ និងវិស័យអាទិភាព ក៏ដូចជាមធ្យោបាយដែលវៀតណាមអាចជួយដល់ទីម័រខាងកើតក្នុងការពង្រឹងសេដ្ឋកិច្ច ពឹងផ្អែកលើខ្លួនឯង អភិវឌ្ឍវិស័យឯកជន កែលម្អស្ថាប័ន និងពង្រីកហេដ្ឋារចនាសម្ព័ន្ធ៕