សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីរដ្ឋាភិបាលប៉េកាំងបានដកចេញនូវគោលនយោបាយសូន្យកូវីដ និងបើកឱ្យមានការធ្វើដំណើរដោយបើកចំហរ នៅក្នុងឆ្នាំ២០២៣នេះ សញ្ញាវិជ្ជមានសម្រាប់កម្ពុជាចាប់ផ្ដើមមានពន្លឺឡើងវិញ ជាក់ស្ដែងក្នុងរយៈពេល១ខែដំបូងនៃឆ្នាំ២០២៣នេះ ជនជាតិចិនជាច្រើនបានចូលមកកម្ពុជាវិញដែលមានចំនួនរហូតដល់២ម៉ឺន៤ពាន់នាក់។ នេះបើតាមក្រសួងទេសចរណ៍កម្ពុជាចេញផ្សាយកាលពីពេលថ្មីៗនេះ ។
របាយការណ៍របស់ក្រសួងទេសចរណ៍បានឱ្យដឹងថា ក្នុងរយៈពេល១ខែដើមឆ្នាំ២០២៣ កម្ពុជាទទួលបានភ្ញៀវទេសចរសរុបជាង៤០ម៉ឺននាក់ ក្នុងនោះភ្ញៀវទេសចរជាតិថៃជាប់ចំណាត់ថ្នាក់លេខ១ ភ្ញៀវទេសចរជនជាតិវៀតណាមជាប់ចំណាត់ថ្នាក់លេខ២ និងចិនជាប់លេខ៣ក្នុងចំណោមទេសចរចូលមកកម្ពុជា ។
លោកបណ្ឌិត គី សេរីវឌ្ឍន៍ ប្រធានមជ្ឈមណ្ឌលសិក្សាចិននៃរាជបណ្ឌិត្យសភាកម្ពុជាបានមានប្រសាសន៍ថា ចិន ជាជនជាតិមួយដែលប្រទេសជាច្រើនចង់ឱ្យចិនទៅលេងប្រទេសគេណាស់ ពីព្រោះជនជាតិម្នាក់ៗមានការចំណាយខ្ពស់នៅពេលពួកគេទៅកម្សាន្ត ជាក់ស្ដែងការចំណាយរបស់ទេសចរចិននៅកម្ពុជាឃើញថាមានកម្រិតខ្ពស់ធៀបនឹងទេសចរជនជាតិផ្សេងៗដូចជាតិអឺរ៉ុបជាដើម។
លោកបណ្ឌិតបន្តថា តាមការសិក្សាស្រាវជ្រាវចិនម្នាក់ចាយលុយប្រមាណ ១ ២០០ដុល្លារអាមេរិកក្នុងការស្នាក់នៅ និងហូបចុក ក៏ដូចជាប្រើប្រាស់សេវាកម្មនានានៅក្នុងប្រទេសកម្ពុជា ខណៈជនជាតិអឺរ៉ុបបានចំណាយត្រឹមតែ ៥០០ដុល្លារអាមេរិកក្នុងម្នាក់ប៉ុណ្ណោះ។
លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CEVA) ក៏បានថ្លែងផងដែរថា បន្ទាប់ពីប្រទេសចិនបានបើកទូលាយនិងអនុញ្ញាតឱ្យមានការធ្វើដំណើរចេញប្រទេសឡើងវិញឃើញថា ភ្ញៀវទេសចរចិនបានចូលមកកម្ពុជាជាបន្តបន្ទាប់ឡើងវិញ ហើយរំពឹងថា ក្នុងឆ្នាំ២០២៣នេះ ការវិនិយោគនានា ជាពិសេសលើវិស័យអចលនទ្រព្យពីប្រទេសចិននឹងកើនឡើងវិញដូចគ្នាផងដែរ។
លោកបន្តថា ការវិនិយោគអចលនទ្រព្យនៅក្នុងប្រទេសកម្ពុជាពីបរទេសនាពេលបច្ចុប្បន្ននេះ ភាគច្រើនគឺជាការវិនិយោគមកពីប្រទេសចិន ដោយមិនទាន់មានវិនិយោគិនមកពីប្រទេសណាមកដណ្ដើមដំណែងចិនបាននៅឡើយទេ ប៉ុន្តែក្រៅពីចិនក៏មានវិនិយោគគិនមកពីប្រទេសកូរ៉េ ជប៉ុន សិង្ហបុរី និងបណ្ដាប្រទេសមួយចំនួនក្នុងតំបន់អាស៊ាន ។
គួរឱ្យដឹងដែរថា នៅក្នុងឆ្នាំ២០២៣នេះ កម្ពុជារំពឹងថានឹងទទួលបានភ្ញៀវជនជាតិចិនមកប្រទេសកម្ពុជាប្រមាណ ២លាននាក់ ខណៈប្រទេសចិនរំពឹងថាឆ្នាំនេះជនជាតិរបស់ខ្លួននឹងចេញក្រៅប្រទេសក្នុងរង្វង់ជិត ១០០លាននាក់ដើម្បីធ្វើដំណើរកម្សាន្តទៅបណ្ដាប្រទេសនានាលើពិភពលោក ៕
Account
Security
Favourite Content