ភ្នំពេញ ៖​ គិតចាប់ពីថ្ងៃទី​២៦ ខែមេសា ដល់ថ្ងៃទី​១០ ខែឧសភា ២០២៣ កំណាត់ផ្លូវជាតិប្រមាណ ២០ ​ខ្សែ ​ត្រូវ​បា​នក្រុ​ម​កា​រងារបច្ចេកទេស ចុះធ្វើការជួសជុលថែទាំ ដើម្បីផ្តល់​ភា​ព​ងា​យ​ស្រួ​ល​ក្នុង​កា​​រ​ធ្វើ​ដំ​ណើរ​ដ​ល់​ប​ងប្អូនប្រជាពលរដ្ឋ និងការដឹកជញ្ជូនទំនិញឆ្លងកាត់។ នេះបើតាមសេចក្ដីប្រកាសព័ត៌​មានរបស់​ក្រសួង​សាធារណ​ការនិងដឹកជញ្ជូន​។​

បើតាមសេចក្ដីប្រកាសព័ត៌មានដដែលឱ្យដឹងថា ក្រុមការងារបច្ចេកទេស នៃមន្ទីរសាធារណការ និង​ដឹក​ជញ្ជូន ខេត្តរតនគិរី បន្ទាយមានជ័យ ត្បូងឃ្មុំ សៀមរាប កែប កំពង់ចាម បាត់ដំបង ព្រះវិហារ កំពង់ឆ្នាំង កំពង់​ស្ពឺ តាកែវ ស្វាយរៀង និងរាជធានីភ្នំពេញ បានខិតខំប្រឹងប្រែងយកចិត្តទុកដាក់យ៉ាងសកម្ម ដោយ​បាន​ចុះជួ​​ស​ជុលថែទាំលុបសំបុកមាន់ អ៊ុតកៅស៊ូ និងអ៊ុតចិញ្ចើមផ្លូវ គូសគំនូសចែកទ្រូងផ្លូវ គំនូសចរាចរណ៍ ដាំនិ​ងលា​បថ្នាំបង្គោលសញ្ញាចរាចរណ៍ ស្តាប្រព័ន្ធលូ លើកំណាត់ផ្លូវជាតិមួយចំនួនរួមមាន៖ ផ្លូវលេខ៦ លេខ៧៦ លេខ៧៨-៥ លេខ៥ លេខ៥៦D លេខ៥៩ លេខ៧ លេខ៨ លេខ៧២ លេខ៦៤ លេខ៦៧ លេខ៦៨ លេខ​៣៣A លេខ៥៧B លេខ៥៧B១ លេខ៦២ លេខ៩៥ លេខ៥៣ លេខ២ លេខ៣ ដើម្បី​ជួយ​សម្រួ​លដ​ល់កា​រធ្វើ​ដំណើរ របស់បងប្អូនប្រជាពលរដ្ឋ ផ្តល់ភាពងាយស្រួលក្នុងការដឹកជញ្ជូនទំនិញឆ្លងកាត់ និង​ចំណេ​ញ​ពេ​ល​វេ​លា​។​

ក្រសួងសាធារណការ​និងដឹកជញ្ជូនក៏បាន​បញ្ជាក់ផងដែរថា ​ទន្ទឹមនឹងផ្លូវថ្នល់ស្អាតល្អ សូមប​ង​ប្អូ​នប្រ​ជា​ពល​រដ្ឋ កុំបំពានយកដីចំណីផ្លូវមកធ្វើអាជីកម្មដើម្បីប្រយោជន៍ផ្ទាល់ខ្លួន ជៀសវាងការចាក់ដីខ្ពស់ជាងផ្លូវ ​និ​ង​កុំ​ដឹក​ទំនិញលើសទម្ងន់ ដើម្បីរក្សាផ្លូវថ្នល់ឱ្យមានភាពល្អប្រសើរ និងអាចប្រើប្រាស់បានយូរអង្វែង។

ក្រៅពីផ្លូវជាតិទាំង​ជាង ២០ ខ្សែ​នេះ ក៏មានកំណាត់ផ្លូវជាតិជាច្រើន​ខ្សែទៀត​បានជួសជុលនិងថែទាំ ហើយ​ក៏​មាន​គម្រោងផ្លូវ​ជាច្រើន​ក៏គ្រោងនឹង​ស្ថាបនា​ជួស​ជុលលើកកម្រិតគុណភាព​ដើម្បី​សម្រួល​ដល់ការ​ធ្វើដំណើរ​និងការ​ដឹកជញ្ជូនទំនិញ របស់ប្រជាពលរដ្ឋ​ផងដែរ។

ឯកឧត្តម​ស៊ុន ចាន់​ថុល រដ្ឋមន្ត្រីក្រសួ​ងសាធារណការ​និងដឹកជញ្ជូន ក៏បានលើកឡើងផងដែរថា​ ផ្លូវថ្នល់​នេះ គឺមានសារសំខាន់ណាស់​ក្នុងការ​ជំរុញ​សេដ្ឋកិច្ច​ជាតិ​ ហេតុដូច្នេះហើយ​ទើប​រាជរដ្ឋាភិបាល​បាន​ខិតខំ​សន្សំ​ថ​វិ​កា​​​មួយផ្នែក​សម្រាប់អភិវឌ្ឍន៍​ផ្លូវ​ថ្នល់​ និងហេដ្ឋារចនាសម្ព័ន្ធជាច្រើន​ទៀត​។ ឯកឧត្តម​បន្តថា ​មានផ្លូវ​ល្អ ទើប​មានការ​ធ្វើដំណើរពីសំណាក់ប្រជាពលរដ្ឋ ទេសចរជាតិនិងអន្តរជាតិ​ និង​ការ​វិនិយោគ​ផងដែរ ជាក់ស្ដែង​កន្លងមក​នៅពេលមានការអភិវឌ្ឍផ្លូវ​ថ្មីគេក៏ឃើញថា​មាន​ទេសចរ និង​វិនិយោគិន​ទៅដល់​តំបន់​ផ្លូវថ្មីនោះជា​បន្តបន្ទាប់៕