បរទេស ៖ ថ្មីៗនេះ កម្លាំងកងទ័ពចិន ហៅកាត់ថា PLA (China’s People’s Liberation Army) បានបង្ហាញនូវក្តីព្រួយបារម្ភយ៉ាងខ្លាំងអំពីសុវត្ថិភាពនៃរោងចក្រនុយក្លេអ៊ែរទាំងឡាយរបស់ខ្លួនក្នុងករណីប្រសិនបើមានករណីជម្លោះដោយយោធាណាមួយផ្ទុះឡើងនាពេលអនាគត។ បញ្ហានេះបានបង្ខំឲ្យ PLA ចាប់ផ្តើមធ្វើការសិក្សាទៅលើទីតាំងរោងចក្រផលិតថាមពលនុយក្លេអ៊ែរមួយចំនួន ជាពិសេសរោងចក្រដែលស្ថិតនៅក្បែរឆ្នេរសមុទ្រដែលវាអាចក្លាយទៅជាគោលដៅជាយុទ្ធសាស្ត្រក្នុងការវាយប្រហារពីគូសត្រូវ ប្រសិនបើមានហេតុការណ៍សង្គ្រាមណាមួយអាចកើតឡើងនោះ។

ក្នុងការសិក្សាស្រាវជ្រាវអំពីហានិភ័យដ៏គ្រោះថ្នាក់នេះ PLA បានធ្វើការព្យាករណ៍ទុកជាមុន ទាំងទំហំនៃគ្រោះថ្នាក់ ចំនួនពលរដ្ឋដែលអាចបាត់បង់ជីវិតដោយសារការសាយភាយថាមពលនុយក្លេអ៊ែរ ក៏ដូចជាផលប៉ះពាល់ទៅដល់បរិស្ថានដែលនៅជុំវិញគោលដៅទាំងនោះផងដែរ។

ហេតុអ្វីបានជានៅសុខៗប្រទេសចិនបែរជាបង្ហាញអំពីការព្រួយបារម្ភទាំងនេះ?

អ្នកជំនាញបាននិយាយថា កត្តាដែលជំរុញឱ្យក្ដីព្រួយបារម្ភទាំងនេះកើនមានគឺមិននៅឆ្ងាយនោះទេ ពោលគឺដោយសារតែរដ្ឋាភិបាលក្រុងប៉េកាំងកន្លងមកក៏បានតាមដានរួចហើយដែរទៅលើបញ្ហាជម្លោះរបស់អ៊ុយក្រែន និងរុស្ស៊ី។ រោងចក្រនុយក្លេអ៊ែររបស់អ៊ុយក្រែនដែលគ្រប់គ្រងដោយរុស្ស៊ី និងជារោងចក្រផលិតថាមពលធំបំផុតរបស់ប្រទេស Zaporizhzhia តែងតែក្លាយទៅជាគោលដៅវាយប្រហារ និងចោទប្រកាន់ដាក់គ្នាចំពោះការវាយប្រហារនានាទាំងយន្តហោះចម្បាំង និងយន្តហោះដ្រូន។

ដូច្នេះ ឧបទ្ទវហេតុទាំងនេះបានធ្វើឱ្យក្រុមអ្នកយុទ្ធសាស្រ្តចិនមានការភ្ញាក់ផ្អើល រហូតធ្វើឱ្យមានការព្រួយបារម្ភ និងមិនច្បាស់លាស់ថា សង្គ្រាម ឬការវាយប្រហារណាមួយអាចកើតមានឡើងនៅពេលណា ត្បិតបទពិសោធន៍ក៏បានឃើញរួចទៅហើយថា ជាច្បាប់ ឬជាបទដ្ឋានអន្តរជាតិ ដូចជា អនុសញ្ញាទីក្រុងហ្សឺណែវជាដើម បានហាមឃាត់មិនឱ្យមានការវាយប្រហារបែបនេះនោះទេ ប៉ុន្តែធាតុពិតនៃជម្លោះរវាងរុស្ស៊ី និងអ៊ុយក្រែន សុទ្ធតែបានបង្ហាញឱ្យឃើញអំពីភាពផ្ទុយគ្នារួចទៅហើយ។

បច្ចុប្បន្នភាពនៃរោងចក្រផលិតថាមពលនុយក្លេអ៊ែររបស់ប្រទេសចិន

សរុបទាំងរោងចក្រដែលកំពុងដំណើរការ និងកំពុងសាងសង់ ទាំងតូច និងធំ នៅទូទាំងប្រទេសនាបច្ចុប្បន្ន មានប្រមាណជា១០២កន្លែង ដែលវាបានរុញច្រានឲ្យមហាយក្សអាស៊ីមួយនេះក្លាយជាប្រទេសធំបំផុតដែលផលិតថាមពលអាតូមិក។

កាលពីខែមេសាកន្លងទៅនេះ រដ្ឋាភិបាលក្រុងប៉េកាំង ទើបតែបានអនុម័តក្នុងការសាងសង់រោងចក្រនុយក្លេអ៊ែរថ្មីរហូតដល់ទៅ១០កន្លែង និងសុទ្ធតែមានទីតាំងជាប់ឆ្នេរសមុទ្រ។ ក្នុងនោះមានមួយចំនួនដាក់ទីតាំងស្ថិតនៅក្បែរភូមិសាស្ត្រគួររសើបខ្លាំង ដូចជា ក្បែរកោះតៃវ៉ាន់ និងតាមឆ្នេរនៅសមុទ្រចិនខាងត្បូងជាដើម។

គោលដៅនៃការបង្កើនសមត្ថភាពផលិតថាមពលនុយក្លេអ៊ែរដ៏ខ្លាំងក្លាបែបនេះ គឺធ្វើឡើងស្របតាមគោលនយោបាយចិនក្នុងការបង្កើនកិច្ចខិតខំក្នុងការងាកទៅរកថាមពលកកើតឡើងវិញឱ្យបានកាន់ច្រើនឡើង និងដើម្បីរៀបចំខ្លួនឲ្យបានល្អស្របតាមគោលដៅគ្រប់គ្រងបញ្ហាបម្រែប្រមួលអាកាសធាតុរបស់អង្គការសហប្រជាជាតិ៕