សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមរបាយការណ៍របស់ក្រសួងពាណិជ្ជកម្មបានបង្ហាញថា នៅក្នុងរយៈពេល៩ខែ ដែលគិតពីខែមករា និងខែកញ្ញា ឆ្នាំ២០២៥ ទំហំពាណិជ្ជកម្មរវាងកម្ពុជា និងបណ្តាប្រទេសដែលជាសមាជិកនៃភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) មានទំហំសរុបប្រមាណ ២៩,៤ពាន់លានដុល្លារអាម៉េរិក ដោយក្នុងនោះ កម្ពុជា បានធ្វើការចេញក្នុងតម្លៃសរុប ៧,៤ ពាន់លានដុល្លារកើនឡើងប្រមាណ ១០ភាគរយបើធៀបទៅនឹងរយៈពេលដូចគ្នាកាលពីឆ្នាំមុនដែលមានត្រឹមតែ ៦,៧ ពាន់លានដុល្លារប៉ុណ្ណោះ ឬស្មើនឹងប្រមាណ ៣១,៩ ភាគរយនៃការនាំចេញសរុបរបស់កម្ពុជា ដែលមានចំនួន ២៣ ពាន់លានដុល្លារ។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានលើកឡើងពីសារៈសំខាន់នៃទីផ្សារ RCEP ដែលកំពុងមានកំណើននៃការនាំចូលទំនិញពីកម្ពុជា។
លោក ប៉ែន សុវិជាតិ បានសង្កត់ធ្ងន់ថា
«កិច្ចព្រមព្រៀង RCEP បានដើរតួនាទីយ៉ាងសំខាន់ក្នុងការលើកកម្ពស់ និងជំរុញការនាំចេញផលិតផលរបស់កម្ពុជាទៅកាន់ទីផ្សារដ៏ធំជាមួយនឹងពន្ធអនុគ្រោះ។ ក្រៅពីនេះ កិច្ចព្រមព្រៀង RCEP នឹងជួយសេដ្ឋកិច្ចកម្ពុជាឱ្យរីកចម្រើន បង្កើនសមត្ថភាពប្រកួតប្រជែង និងផ្តល់ជាវេទិកាសម្រាប់ពាណិជ្ជកម្មប្រកបដោយស្ថិរភាព ចំពេលមានភាពមិនប្រាកដប្រជាជាសកល។ វាគឺជាឧបករណ៍ដ៏សំខាន់សម្រាប់ការសម្រេចបាននូវគោលដៅអភិវឌ្ឍន៍រយៈពេលវែងរបស់ប្រទេស ដែលមានភាពប្រកួតប្រជែង»។
យោងតាមវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា បានឱ្យដឹងថា RCEP មានសារសំខាន់សម្រាប់កម្ពុជា ព្រោះវាជួយជំរុញការនាំចេញ និងទាក់ទាញការវិនិយោគពីបរទេស ដោយផ្តល់លទ្ធភាពទទួលបានទីផ្សារកាន់តែច្រើនទៅកាន់តំបន់ធំៗដែលមានប្រទេសជាច្រើនជាសមាជិក មានការកំណត់ស្តង់ដារ វិធានពាណិជ្ជកម្ម និងជំរុញសមាហរណកម្មសេដ្ឋកិច្ច ខណៈដែលកិច្ចព្រមព្រៀង RCEP-កម្ពុជា បានចូលជាធរមាននៅថ្ងៃទី១ ខែមករា ឆ្នាំ២០២២ ហើយកតិកាសញ្ញាពាណិជ្ជកម្មនេះមាន១៥ ប្រទេសនៅតំបន់អាស៊ីប៉ាស៊ីហ្វិក ដែលមានសមាជិកអាស៊ានចំនួន១០ រួមជាមួយដៃគូពាណិជ្ជកម្មកំពូលទាំង៥ របស់កម្ពុជា ដូចជា ប្រទេសចិន វៀតណាម ថៃ ជប៉ុន និងសិង្ហបុរី។
យោងតាមរបាយការណ៍របស់ក្រសួងពាណិជ្ជកម្ម ទំនិញនាំចេញសំខាន់ៗរបស់កម្ពុជាទៅកាន់ទីផ្សារ RCEP រួមមាន សម្លៀកបំពាក់ គ្រឿងចក្រ ឧបករណ៍អគ្គិសនី ផលិតផលស្បែកជើង ទំនិញផលិតផលស្បែក គ្រាប់ធញ្ញជាតិ គ្រឿងសង្ហារឹម កៅស៊ូ ផ្លែឈើ បន្លែ ប្រដាប់ក្មេងលេង និងវាយនភណ្ឌ។ ដោយឡែកចំពោះការនាំចូលសំខាន់ៗរបស់ព្រះរាជាណាចក្រកម្ពុជាពីទីផ្សារទាំងនេះរួមមាន វត្ថុធាតុដើមសម្រាប់ផលិតសម្លៀកបំពាក់ ឱសថ និងអាហារបំប៉ន សម្ភារៈប្រើប្រាស់ ព្រមទាំងអាហារ និងភេសជ្ជៈ។
គួររំលឹកថា រាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម និងក្រសួងស្ថាប័នពាក់ព័ន្ធផ្សេងទៀត បច្ចុប្បន្នកំពុងធ្វើការដើម្បីបង្កើតកិច្ចព្រមព្រៀងពាណិជ្ជកម្មសេរី (FTAs) បន្ថែមទៀតជាមួយដៃគូអភិវឌ្ឍន៍ពាណិជ្ជកម្ម និងសេដ្ឋកិច្ចសំខាន់ៗ ដើម្បីពង្រីកច្រកទីផ្សារសកលសម្រាប់ផលិតផលក្នុងស្រុកឱ្យកាន់តែទូលាយ៕
Account
Security
Favourite Content