ភ្នំពេញ ៖ ច្រករបៀងឧស្សាហកម្ម និងបច្ចេកវិទ្យា ក្រោមក្របខ័ណ្ឌនៃភាពជាដៃគូយុទ្ធសាស្ត្រគ្រប់ជ្រុងជ្រោយនៃកិច្ចសហប្រតិបត្តិការ និងកិច្ចសហប្រតិបត្តិការពេជ្ររវាងកម្ពុជា-ចិន ត្រូវបានរំពឹងថានឹងក្លាយជាកម្លាំងចលករសម្រាប់កំណើនសេដ្ឋកិច្ចរបស់កម្ពុជា ដើម្បីសម្រេចបាននូវចក្ខុវិស័យឆ្នាំ២០៥០ ក្នុងនាមជាប្រទេសដែលមានប្រាក់ចំណូលខ្ពស់។

ការរំពឹងទុកនេះ ធ្វើឡើងក្នុងជំនួបរវាង ឯកឧត្តម លោក សួន សុផល អគ្គលេខាធិការរងក្រុមប្រឹក្សាវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) និងគណៈប្រតិភូនៃគណៈកម្មាធិការកំណែទម្រង់ និងអភិវឌ្ឍន៍ជាតិរបស់ប្រទេសចិន (NDRC) ដឹកនាំដោយលោកស្រី Zhang Jianhua អគ្គនាយករងទទួលបន្ទុកនាយកដ្ឋានវិនិ​យោ​គ​បរទេស ក្នុងគោលបំណងពិភាក្សា និងពិគ្រោះយោបល់អំពីទស្សនទាននៃផែនការសហប្រតិបត្តិការសម្រាប់ការអភិវឌ្ឍរបៀងឧស្សាហកម្ម និងបច្ចេកវិទ្យាដែលនឹងចូលរួមចំណែកដល់ការពង្រឹង និងពង្រីកវិបុលភាពនៃសហគមន៍វាសនារួមកម្ពុជា-ចិន។

លោក សួន សុផល អគ្គលេខាធិការរង បានរំពឹងយ៉ាងមុតមាំថា របៀងឧស្សាហកម្ម និងបច្ចេកវិទ្យានឹងអាចក្លាយទៅជាចំណែកនៃកម្លាំងចលករសម្រាប់រុញច្រានកំណើនសេដ្ឋកិច្ចកម្ពុជាឈានឆ្ពោះសម្រេចបាននូវចក្ខុវិស័យកម្ពុជាឆ្នាំ២០៥០។

នៅទីស្តីការក្រុមប្រឹក្សាអភិវឌ្ឍន៍កម្ពុជា កាលពីព្រឹកថ្ងៃទី២៤ ខែមេសា ឆ្នាំ២០២៤ ភាគីទាំងពីរបានពិភាក្សា និងផ្លាស់ប្តូរយោបល់លើគំនិតនៃផែនការសហប្រតិបត្តិការសម្រាប់ការអភិវឌ្ឍន៍ច្រករបៀងឧស្សាហកម្ម និងបច្ចេកវិទ្យា ដែលនឹងរួមចំណែកក្នុងការពង្រឹង និងពង្រីកវិបុលភាពនៃសហគមន៍ជោគវាសនារួមកម្ពុជា-ចិន។

ភាគីទាំងពីរ បានឯកភាពក្នុងការបង្រួបបង្រួមកិច្ចសហប្រតិបត្តិការខាងលើប្រកបដោយភាតរភាពជាមួយយុទ្ធសាស្ត្រមន្ទីរបញ្ចកោណរបស់រាជរដ្ឋាភិបាលកម្ពុជា និងគំនិតផ្តួចផ្តើមខ្សែក្រវាត់ និងផ្លូវ (BRI) របស់ប្រទេសចិន និងឯកសារគោលនយោបាយជាតិសំខាន់ៗផ្សេងទៀត ដើម្បីធានាបាននូវប្រសិទ្ធភាព និងប្រសិទ្ធផលវិជ្ជមានលើការអភិវឌ្ឍន៍សេដ្ឋកិច្ចសង្គមនៃប្រទេសទាំងពីរ។

គួរបញ្ជាក់ជូនផងដែរថា របៀងឧស្សាហកម្ម និងបច្ចេកវិទ្យាគឺជាសមិទ្ធផល ដែលប្រសូត្រចេញពីក្របខ័ណ្ឌនៃកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ កិច្ចសហប្រតិបត្តិការត្បូងពេជ្រកម្ពុជា-ចិន និងអនុស្ស រណៈនៃការយោគយល់គ្នា ស្តីពីយន្តការការងារចម្រុះ ដែលបានចុះហត្ថលេខាកាលពីថ្ងៃទី១៥ ខែកញ្ញា ឆ្នាំ២០​២៣ លើការកសាងរបៀងអភិវឌ្ឍន៍ឧស្សាហកម្ម រវាងក្រុមប្រឹក្សាអភិវឌ្ឍន៍កម្ពុជា និងគណៈកម្មាធិការជាតិអភិវឌ្ឍន៍ និងកំណែទម្រង់នៃសាធារណរដ្ឋប្រជាមានិតចិន ស្របពេលគ្នាជាមួយនឹងដំណើរទស្សនកិច្ច លើកដំបូងរបស់សម្តេចធិបតីនាយករដ្ឋមន្ត្រីទៅកាន់ប្រទេសចិន ដើម្បីជំរុញ ការអនុវត្តកុងសង់ស៊ីសដ៏សំខាន់របស់ថ្នាក់ដឹកនាំកម្ពុជា និងចិនស្តីពីការពិនិត្យលទ្ធភាពក្នុងការបង្កើតរបៀងអភិវឌ្ឍន៍ឧស្សាហកម្ម៕