បរទេស៖ យោងតាមប្រភពព័ត៌មានពី CNBC បានរាយការណ៍ថា តម្លៃប្រេងឆៅបានឡើងថ្លៃជិត ១ ភាគរយបន្ថែម ដោយសារស្តុកប្រេងរបស់សហរដ្ឋអាមេរិកបានធ្លាក់ចុះ ខណៈដែលអង្គការ OPEC មើលឃើញតម្រូវការប្រេងរឹងមាំដែលគាំទ្រដោយកំណើនសេដ្ឋកិច្ចកាន់តែខ្លាំងនៅឆ្នាំនេះ។

ទន្ទឹមនឹងនេះ តម្លៃប្រេងឆៅម៉ាក Brent ឡើងថ្លៃ ០,៥ ភាគរយ ឬ ៨៥,០៨ ដុល្លារក្នុងមួយបារ៉ែល ខណៈដែលប្រេងឆៅម៉ាក West Texas Intermediate (WTI) ឡើងថ្លៃ ០,៨ ភាគរយ ឬ ៨២,១០​ ដុល្លារក្នុងមួយបារ៉ែល។ កាលពីសប្តាហ៍មុន ស្តុកប្រេងរបស់សហរដ្ឋអាមេរិកបានធ្លាក់ចុះចំនួន ៣,៤ លានបារ៉ែល ខណៈដែលស្តុកប្រេងសាំងធ្លាក់ចុះ ២ លានបារ៉ែល នេះបើយោងតាមរដ្ឋបាលព័ត៌មានថាមពល។ គេព្យាករណ៍ថា តម្រូវការប្រេងអាចនថយចុះចំនួន ៣៣៤ ០០០ បារ៉ែលក្នុងមួយថ្ងៃ ប៉ុន្តែតម្រូវការប្រេងឥន្ធនៈនឹងកើនឡើងពេលចាប់ផ្តើមរដូវក្ដៅ។

ស្របពេលនេះដែរ អង្គការ OPEC បានរក្សាការព្យាករណ៍កំណើនតម្រូវការប្រេងរបស់ខ្លួនចំនួន ២,២ បារ៉ែលក្នុងមួយថ្ងៃសម្រាប់ឆ្នាំ ២០២៤ ។ លើសពីនេះ ពួកគេបានបង្កើនការព្យាករណ៍កំណើនសេដ្ឋកិច្ចពិភពលោកសម្រាប់ឆ្នាំនេះដល់ ២,៩ ភាគរយ ដែលត្រូវបានជំរុញដោយលទ្ធផលការងារប្រសើរជាងការរំពឹងទុកនៅក្នុងប្រទេសប្រេស៊ីល រុស្ស៊ី ឥណ្ឌា និងចិន បូករួមនឹងការស្ទុះងើបឡើងវិញក្នុងតំបន់អឺរ៉ូ។

កាលពីប៉ុន្មានថ្ងៃមុន តម្លៃប្រេងបានធ្លាក់ចុះបីថ្ងៃជាប់គ្នា ចំពេលមានការចរចាបទឈប់បាញ់ឡើងវិញរវាងក្រុមហាម៉ាស់ និងអ៊ីស្រាអែល និងព្យុះសង្ឃរា Beryl ។ ហេដ្ឋារចនាសម្ព័ន្ធប្រេងនៅលើឆ្នេរសមុទ្រឈូងសមុទ្រហាក់ដូចជាបានជៀសវាងការខូចខាតយ៉ាងច្រើនពីព្យុះ។ ទីផ្សារត្រូវបានរំពឹងថា ការនាំចេញប្រេងនឹងធ្លាក់ចុះជាលទ្ធផលដែលអាចនាំឱ្យមានការកើនឡើងនៃស្តុកឡើងវិញ។ ស្របពេលដែល OPEC រំពឹងពីការកើនឡើងសេដ្ឋកិច្ចសកលនៅឆ្នាំនេះ ប៉ុន្តែទីភ្នាក់ងារថាមពលអន្តរជាតិ (IEA) បានកែប្រែការព្យាករណ៍របស់ខ្លួនថា កំណើនតម្រូវការប្រេងពិភពលោកកំពុងបន្តធ្លាក់ចុះ ជាមួយនឹងការថយចុះគួរឱ្យកត់សម្គាល់នៃការប្រើប្រាស់នៅក្នុងប្រទេសចិន។ IEA បាននិយាយនៅក្នុងរបាយការណ៍ប្រចាំខែរបស់ខ្លួនស្តីពីទីផ្សារប្រេងថា ការប្រើប្រាស់ប្រេងនៅក្នុងប្រទេសចិន ដែលជាអ្នកជំរុញនៃកំណើនតម្រូវការប្រេងសកលបានធ្លាក់ចុះក្នុងខែមេសា និងឧសភា។ មិនត្រឹមតែប៉ុណ្ណោះ តម្រូវការរបស់ចិននៅក្នុងត្រីមាសទីពីរក៏ទាបជាងរយៈពេលដូចគ្នាក្នុងឆ្នាំ ២០២៣ ផងដែរ ។ IEA បានកាត់បន្ថយការព្យាករណ៍របស់ខ្លួនសម្រាប់តម្រូវការប្រេងរបស់ចិនមកត្រឹម ១៧ លានបារែលក្នុងមួយថ្ងៃសម្រាប់ឆ្នាំនេះ។ បន្ថែមពីនេះ IEA មើលឃើញថាកំណើនតម្រូវការរបស់ចិនអាចនឹងធ្លាក់ចុះដល់ឆ្នាំ ២០២៥។

ការវិលត្រឡប់របស់ចិនទៅរកភាពប្រក្រតីមុនពេលមានការររាត្បាត ជាមួយនឹងកំណើនទន់ខ្សោយ គេមើលឃើញថា កំណើនតម្រូវការប្រេងពិភពលោកធ្លាក់ចុះពី ៧០ ភាគរយឆ្នាំមុនមកត្រឹម ៤០ ភាគរយនៅឆ្នាំនេះ។ ស្ថាប័នមួយដែលមានមូលដ្ឋាននៅទីក្រុងប៉ារីស បានលើកឡើងថា តម្រូវការប្រេងបានកើនឡើងត្រឹមតែ ៧១០ ០០០ បារ៉ែលប៉ុណ្ណោះក្នុងមួយថ្ងៃក្នុងត្រីមាសទីពីរ ដែលជាអត្រាយឺតបំផុតក្នុងរយៈពេលមួយឆ្នាំ។ យ៉ាងណាមិញ ប្រទេសដែលមានសេដ្ឋកិច្ចកំពុងរីកចម្រើនដូចជាឥណ្ឌា និងប្រេស៊ីលនឹងមានចំណែកកាន់តែច្រើននៅក្នុងកំណើនតម្រូវការប្រេងពិភពលោក ខណៈដែលសេដ្ឋកិច្ចជឿនលឿននៅក្នុង OECD នឹងឃើញការថយចុះនៃការប្រើប្រាស់៕