សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ កម្ពុជាទទួលបានគម្រោងវិនិយោគលើរោងចក្រផលិតសំបកកង់យានយន្តជាបន្តបន្ទាប់ ហើយគិតត្រឹមដំណាច់ខែសីហា ឆ្នាំ២០២៤កន្លងទៅនេះ យ៉ាងហោចណាស់មានរោងចក្រចំនួន៥បានចុះបញ្ជីវិនិយោគនៅក្នុងប្រទេសកម្ពុជា គិតជាទឹកប្រាក់វិនិយោគមានចំនួន ១៩១០លានដុល្លារអាមេរិក ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយកាលពីដើមខែកញ្ញា ២០២៤កន្លងទៅនេះ កម្ពុជាបានអនុម័តគម្រោងវិនិយោគលើរោងចក្រចំនួន២បន្ថែមទៀត ដែលមួយនៅខេត្តក្រចេះមានទឹកប្រាក់ចំនួន ៤៣០លានដុល្លារអាមេរិក និងមួយទៀតនៅក្នុងតំបន់សេដ្ឋកិច្ចពិសេសស៊ីនបាវិត ក្នុងខេត្តស្វាយរៀងមានទឹកប្រាក់ចំនួន ២៥៦លានដុល្លារអាមេរិក ។
ចំណែករោងចក្រផលិតសំបកកង់យានយន្តចំនួន៣ផ្សេងទៀត ត្រូវបានសម្ពោធដាក់ឱ្យដំណើរការហើយ ក្នុងនោះមានរោងចក្រផលិតសំបកកង់ឡានរបស់ក្រុមហ៊ុន Cart Tire Co.,Ltd នៅក្នុងតំបន់សេដ្ឋកិច្ចពិសេសឈីលូ ជានពុចាយ ខេត្តស្វាយរៀងមានទុនវិនិយោគ ប្រមាណ៧៨៧លានដុល្លារអាមេរិក រោងចក្រផលិតសំបកកង់រថយន្តរបស់ក្រុមហ៊ុន General Tire Technology ( Cambodia ) នៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ ក្នុងទុនវិនិយោគប្រមាណ ២៩៧លានដុល្លារអាមេរិក ។
ចំណែករោងចក្រផលិតសំបកកង់ឡានមួយទៀត ដែលទើបដាក់ឱ្យដំណើរការនៅក្នុងតំបន់សេដ្ឋកិច្ចពិសេសយូប៊ីអ៊ីស្នួលក្នុងស្រុកស្នួល ខេត្តក្រចេះ មានទុនវិយោគប្រមាណ ១៤០លានដុល្លារអាមេរិក ។ តាមរយៈរោងចក្រផលិតសំបកកង់រថយន្តទាំង៥ បាន និងកំពុងផ្ដល់ឱកាសការងារដល់ពលរដ្ឋរាប់ពាន់កន្លែង និងបានជួយលើកកម្ពស់ទីផ្សារកៅស៊ីរបស់កម្ពុជាដែលធ្លាប់តែមានបញ្ហាកន្លង ជាពិសេសកាត់បន្ថយការនាំចូល កាត់បន្ថយតម្លៃសំបកកង់រថយន្តលើទីផ្សារប្រទេសកម្ពុជាបានមួយកម្រិតផងដែរ ។
បើតាមអ្នកឧកញ៉ា សំ សុខនឿន ប្រធានក្រុមប្រឹក្សាភិបាលក្រុមហ៊ុន SAM SN Group បានមានប្រសាសន៍ថា ដើម្បីរក្សាស្ថិរភាពសេដ្ឋកិច្ច កម្ពុជាត្រូវជំរុញ និងបង្កើនការផលិតសម្រាប់ផ្គត់ផ្គង់ក្នុងស្រុក ព្រោះថា ប្រសិនបើការផលិតក្នុងស្រុកបានច្រើន នឹងចូលរួមក្នុងការលើស្ទួយ និងរក្សាស្ថិរភាពសេដ្ឋកិច្ចក្នុងស្រុក។
អ្នកឧកញ៉ាបញ្ជាក់ថា ៖
« កន្លងមក កម្ពុជាបាននាំចូលផលិតជាច្រើនពីបណ្ដាប្រទេសដទៃមកបម្រើ និងបំពេញតម្រូវការប្រជាជនក្នុងស្រុក ហើយទំនិញទាំងនោះ យកមកលក់ និងចែកចាយនៅកម្ពុជាគឺមានតម្លៃថ្លៃ ដូច្នេះ បើសិនជាកម្ពុជាមានអ្វីសម្រាប់ខ្លួនឯងបានច្រើន នោះស្ថិរភាពនៃសេដ្ឋកិច្ច ស្ថិរភាពនៃការរស់នៅរបស់ប្រជាជននឹងមានស្ថិរភាពដូចគ្នាដែរ ។ បើសិនជាកម្ពុជាមានរោងចក្រកាន់តែច្រើន មិនថាតែរោងចក្រផលិតចំណីអាហារ រោងចក្រផលិតគ្រឿងសំណង់ ឬរោងចក្រផលិតសម្ភារៈប្រើប្រាស់នោះទេ នោះកម្ពុជានឹងកាត់បន្ថយការនាំចូលសម្ភារៈប្រើប្រាស់ ចំណីអាហារពីប្រទេសក្រៅ អាចជួយឱ្យប្រជាជនមានការងារធ្វើ មានខ្សែច្រវាក់ផលិតកម្មជួយគ្នាទៅវិញទៅមក ដូចជារោងចក្រផលិតសំបកកង់ឡាន ត្រូវការកៅស៊ូដើម្បីមកបម្រើក្នុងរោងចក្រសម្រាប់ដំណើរការផលិត» ។
ដោយឡែក បើតាមអ្នកគ្រប់គ្រងរោងចក្រផលិតសំបកកង់ឡាននៅក្នុងតំបន់សេដ្ឋកិច្ចពិសេសឈីលូជានពុចាយ បានលើកឡើងថា រោងចក្រមួយនេះបានបោះទុនវិនិយោគចំនួនពីរដង ដោយលើកទី១ បាន និងកំពុងដំណើរការផលិត និងគម្រោងលើកទី២ កំពុងដំណើរការសាងសង់ពង្រីកបន្ថែម ដូច្នេះ បើសិនជារោងចក្រសាងសង់គម្រោងទី២រួចរាល់ នោះវានឹងធ្វើឱ្យតម្រូវការកៅស៊ូសម្រាប់ការផលិតកាន់តែច្រើន ហើយអ្នកកៅស៊ូនឹងលែងភិតភ័យក្នុងការស្វែងរកទីផ្សារកៅស៊ូដូចមុនទៀតហើយ ពោលគឺរោងចក្រនឹងទទួលទិញដើម្បីបម្រើដល់ការផលិតសំបកកង់ឡាន ។
ក្រៅពីរោងចក្រនេះ ក៏មានរោងចក្រផ្សេងទៀតនៅកម្ពុជា ក៏នឹងមានតម្រូវការកៅស៊ូសម្រាប់ផលិតជាសំបកកង់ឡានដែរ ដូច្នេះកសិករដាំកៅស៊ូនៅកម្ពុជា នឹងលែងមានបញ្ហាទីផ្សារដូចកាលពីប៉ុន្មានឆ្នាំមុនទៀតហើយ ដោយពួកគាត់អាចដាំកៅស៊ូសម្រាប់ផ្គត់ផ្គង់ក្នុងរោងចក្រជាមួយនឹងតម្លៃសមរម្យ ៕
Account
Security
Favourite Content