ភ្នំពេញ ៖ ជារៀងរាល់ឆ្នាំ នៅពេលដល់រដូវសែនចូលឆ្នាំថ្មីប្រពៃណីជនជាតិចិន-វៀតណាម ម្តងៗ គេសង្កេតឃើញថា តម្លៃទំនិញនៅលើទីផ្សារតែងឡើងថ្លៃជាលំដាប់ធៀបនឹងថ្ងៃធម្មតា ដូចជា បន្លែ ត្រី សាច់សម្រាប់ធ្វើម្ហូប ជាពិសេស តម្រូវការជ្រូកខ្វៃសម្រាប់សែនកុងម៉ា សុំលាភសុំជ័យ សិរីសួស្តីនៅថ្ងៃចូលឆ្នាំចិននេះតែម្តង ។

ជួបជាមួយម្ចាស់ហាង ចិន ខ្មៅ នៅម្ដុំជម្ពូរវ័ន្ត រាជធានីភ្នំពេញ បានឱ្យដឹងថា មកទល់ថ្ងៃទី២៧ ខែមករា ឆ្នាំ២០២៥នេះ ហាងចិនខ្មៅ បានទទួលការកម្ម៉ង់ពីភ្ញៀវប្រមាណជា១០០ក្បាល ទៅ ១១០ក្បាល ដែលប្រហាក់ប្រ​ហែលទៅនឹងតម្រូវការសែនកាលពីឆ្នាំមុនដែរ។ សម្រាប់ជ្រូកមានទម្ងន់ ៥គីឡូក្រាម មានតម្លៃចន្លោះពី ៥០ម៉ឺនរៀល ទៅ ៥៥ម៉ឺនរៀល អាស្រ័យលើការកម្ម៉ង់ទុកមុនយូរ ឬការកម្ម៉ង់យកភ្លាម ចំណែកជ្រូកខ្វៃមានទម្ងន់ ៨ ទៅ ១០គីឡូក្រាមមានតម្លៃចន្លោះពី ៨០ម៉ឺន ទៅ ៩០ម៉ឺនរៀល ក្នុងមួយក្បាល​ ហើយជ្រូកដែលទទួលបានការកម្ម៉ង់ច្រើនជាងគេគឺប្រភេទទម្ងន់១០គីឡូក្រាមនេះតែម្តង។

ម្ចាស់ហាងខាងលើអះអាងថា ៖

«តម្រូវការជ្រូកខ្វៃសម្រាប់សែនពេលបុណ្យចូលឆ្នាំចិនឆ្នាំនេះ មានប្រហាក់ប្រហែលឆ្នាំមុន ដែលកាលពីឆ្នាំទៅហាងចិនខ្មៅលក់ចេញបានចំនួន១២០ក្បាល រាប់ទាំងតូចទាំងធំ ចំណែកជិតដល់ថៃ្ងសែនឆ្នាំចិនឆ្នាំនេះ ហាងចិនខ្មៅទទួលបានការកម្ម៉ង់ទុកមុន បានប្រមាណជា១១០ក្បាលរួចមកហើយ។ សម្រាប់ហាងចិនខ្មៅនៅម្តុំផ្សារជម្ពូវ័នក្នុងសង្កាត់ចោមចៅខាងលើ លក់ជ្រូកសម្រាប់តែអតិថិជនកម្ម៉ង់ទុកប៉ុណ្ណោះ មិនដាក់លក់លាយដូចហាងមួយចំនួនទៀតនោះឡើយ»។

លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា មានប្រសាសន៍ថា ទាំងតម្រូវការជ្រូកខ្វៃ និងសាច់ជ្រូកលើជ្រុញ មានចំនួនប្រហាក់ប្រហែលឆ្នាំមុនដែរ។ ទោះជាសេដ្ឋកិច្ចជួបការលំបាកបន្តិច តែអ្នកមានទម្លាប់សែនគឺនៅតែទិញសែនជារៀងរាង់ឆ្នាំ មិនដែលខាននោះទេ។

លោកបានបញ្ជាក់ថា ៖

«តម្លៃសាច់ជ្រូក មិនថាជ្រូកសម្រាប់ខ្វៃ ឬជ្រូកសាច់ សម្រាប់នេះមិនឡើងថ្លៃទេ ដោយសារការផ្គត់ផ្គង់ជ្រូកក្នុងស្រុកមានគ្រប់គ្រាន់ មិនជួបការខ្វះខាតដូចឆ្នាំកន្លងទៅ ៣ ឬ ៤ឆ្នាំមុននោះឡើយ ដោយសារការចិញ្ចឹមក្នុងស្រុកមានការកើនឡើង ទាំងលក្ខណៈក្រុមហ៊ុន លក្ខណៈកសិដ្ឋាន និងលក្ខណៈគ្រួសារ»។​

យ៉ាងណាក៏ដោយ បើទោះជាមានករណីកុងស៊ីបោះដុំសាច់ជ្រូកទៅឱ្យឈ្មួញកណ្តាលក្នុងតម្លៃសមរម្យ មិនឡើងថ្លៃលើសថ្ងៃធម្មតាក៍ដោយ ក៍ប៉ុន្តែជាការកត់សម្គាល់ ភាគច្រើនឈ្មួញដែលទទួលយកទៅលក់រាយបន្តមួយចំនួន តែងឆក់ឱកាសរកផលប្រយោជន៍ លក់ឡើងថ្លៃខ្ពស់នៅពេលដល់រដវបុណ្យទានម្តង។

ក្នុងករណីនេះ លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជាបានអំពាវនាវដល់ឈ្មួញតូចធំទាំងអស់ កុំតម្លើងថ្លៃខ្ពស់ខ្លាំងពេកសម្រាប់លក់ជូនប្រជាពលរដ្ឋ គួរមានភាពស្មោះត្រង់ ជាពិសេសត្រូវផ្គត់ផ្គង់លើទីផ្សារតែប្រភេទសាច់ណាដែលមានគុណភាព ជៀសវាងលក់សាច់ខូចគុណភាព ឬសាច់នាំចូលដោយខុសច្បាប់តាមច្រករបៀង ដែលនាំឱ្យប៉ះពាល់សុខភាពអ្នកបរិភោគ។

សូមបញ្ជាក់ដែរថា បើតាមការបញ្ជាក់ពីសមាគមអ្នកចិញ្ចឹមសត្វកម្ពុជា បានឱ្យដឹងថា តម្រូវការជ្រូកខ្វៃនៅឆ្នាំនេះមានចំនួនប្រហាក់ប្រ​ហែលនឹងឆ្នាំមុនៗផងដែរ ពោលគឺចន្លោះពី ៣០០០ក្បាលទៅ ៤០០០ក្បាល សម្រាប់តម្រូវការសែនជាក់ស្តែងក្នុងឱកាសចូលឆ្នាំចិននៅក្នុងក្រុងភ្នំពេញ៕  វិន ឈុនហ៊ាត