សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របទៅនឹងវិស័យសំណង់ទាំងមូលនៅក្នុងប្រទេសកម្ពុជាបន្តមានសកម្មភាពនោះ ការសាងសង់សំណង់ថ្មីៗនៅតំបន់ជាប់ព្រំដែននៃប្រទេសកម្ពុជា កំពុងមានការកើនឡើងគួរឱ្យកត់សម្គាល់ ដែលធ្វើឱ្យផ្គត់ផ្គង់គ្រឿងសំណង់ បានបង្វែរទិសដៅទៅរកតំបន់ដែលមានការសាងសង់ច្រើននោះវិញ ។
បើតាមអ្នកផ្គត់ផ្គង់គ្រឿងសំណង់នៅក្នុងប្រទេសកម្ពុជា បានប្រាប់សារព័ត៌មាន AMS ឱ្យដឹងថា បច្ចុប្បន្ននេះ នៅតាមតំបន់ព្រំដែនកម្ពុជា ដូចជាក្រុងប៉ោយប៉ែត ខេត្តបន្ទាយមានជ័យ ក្រុងបាវិត ខេត្តស្វាយរៀងជាដើម កំពុងមានការសាងសង់នូវសំណង់ថ្មីៗជាច្រើន ជាពិសេសសំណង់រោងចក្រ តំបន់សេដ្ឋកិច្ចពិសេស និងឃ្លាំងរោងចក្រ។
ឧកញ៉ា ហួត ជា អគ្គនាយកក្រុមហ៊ុននាំចូលសម្ភារៈសំណង់មកកាន់ទីផ្សារប្រទេសកម្ពុជាបានឱ្យដឹងថា ជាការកត់សម្គាល់ និន្នាការនៃការផ្គត់ផ្គង់សម្ភារៈសំណង់នាពេលបច្ចុប្បន្ននេះបានបង្វែទៅកាន់តំបន់ព្រំដែននៃប្រទេសកម្ពុជា ព្រោះទីនោះមានការសាងសង់ច្រើន រាប់ទាំងគម្រោងបង្កើតរោងចក្រ និងសាងសង់ឃ្លាំងសម្រាប់ស្តុកទំនិញ ហើយក៏មានគម្រោងបង្កើតសួនឧស្សាហកម្មផងដែរ។
លោកឧកញ៉ាបន្តថា ទន្ទឹមនឹងការរីករាលដាលនៃការសាងសង់នៅតាមតំបន់ព្រំដែន និងតាមបណ្ដាខេត្តដែលមានសក្ដានុពលកើនឡើង ការប្រើប្រាស់សម្ភារៈសំណង់នៅក្នុងស្រុកក៏ឃើញថាមានការកើនឡើងជាងមុនដែរ ជាក់ស្ដែងក្រុមហ៊ុន ហួត ជា តែម្ដង បានបង្កើនការផ្គត់ផ្គង់សម្ភារៈសំណង់ច្រើនជាងឆ្នាំកន្លងទៅ។
លោក ពុត ចន្ដារិទ្ធ អគ្គលេខាធិការនៃសមាគមឧស្សាហកម្មស៊ីម៉ង់ត៏កម្ពុជា បានថ្លែងថា ក្នុងឆ្នាំ២០២៥ តម្រូវការនៃការប្រើប្រាស់ស៊ីម៉ង់ត៏ចាប់ផ្ដើមមានកំណើន ដោយភាគច្រើននៅតាមតំបន់ព្រំដែន ។
លោកបន្តថា បើទោះបីជាតម្រូវការនៃការប្រើប្រាស់ស៊ីម៉ង់ត៏កើនឡើងជាងឆ្នាំមុនក្តី តែតម្លៃស៊ីម៉ង់ត៏ដែលផលិតក្នុងស្រុកមិនបានឡើងថ្លៃទេ ផ្ទុយទៅវិញមានតែបញ្ចុះតម្លៃ ជាក់ស្ដែង បច្ចុប្បន្ននេះ ស៊ីម៉ង់ត៏ដែលផលិតចេញពីរោងចក្រនានាក្នុងប្រទេសកម្ពុជាបានបញ្ចុះតម្លៃ ដើម្បីលើកទឹកចិត្តដល់អ្នកសាងសង់ និងម្ចាស់ដេប៉ូគាំទ្រស៊ីម៉ង់ត៏ក្នុងស្រុក ប៉ុន្តែសម្រាប់ម្ចាស់ដេប៉ូយកទៅលក់បន្តក្នុងតម្លៃប៉ុន្មាននោះ ខាងសមាគមមិនអាចហាមឃាត់បានទេ ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកទឹកចិត្តដលអ្នកសាងសង់នៅក្នុងប្រទេសកម្ពុជា ព្យាយាមប្រើប្រាស់គ្រឿងបង្គុំសំណង់និងគ្រឿងសំណង់ក្នុងស្រុកឱ្យបានច្រើនតាមដែលអាចធ្វើបាន ដើម្បីជំរុញ និងគាំទ្រផលិតផលក្នុងស្រុក និងកាត់បន្ថយនូវការនាំចូលសម្ភារៈ និងគ្រឿងបង្គុំពីក្រៅប្រទេសមកប្រើប្រាស់ ។
គួរបញ្ជាក់ថា ក្នុងរយៈពេលប៉ុន្មានឆ្នាំចុងក្រោយមកនេះ តំបន់មួយចំនួនដែលស្ថិតនៅតាមបណ្ដាខេត្ត ដូចជា ខេត្តស្វាយរៀង ខេត្តកំពង់ស្ពឺ ព្រះសីហនុ និងខេត្តបន្ទាយមានជ័យ ទទួលបានការចាប់អារម្មណ៍ និងមានការវិនិយោគពីសំណាក់វិនិយោគិនក្នុង និងក្រៅប្រទេស ដូចជាគម្រោងវិនិយោគលើរោងចក្រផលិតសំបកកង់ឡាន រោងចក្រផ្គុំ និងដំឡើងរថយន្ត ជាពិសេសគម្រោងបង្កើតតំបន់សេដ្ឋកិច្ចពិសេស និងសួនឧស្សាហកម្មជាដើម ៕
Account
Security
Favourite Content