ភ្នំពេញ៖ ជប៉ុន តាមរយៈគណៈប្រតិភូរបស់ខ្លួនមកពីក្រសួងសេដ្ឋកិច្ច ពាណិជ្ជកម្ម និងឧស្សាហកម្ម (METI) និងសមាគមគ្រប់គ្រងបរិស្ថានជប៉ុនសម្រាប់ឧស្សាហកម្ម (JEMAI) បានចែករំលែកនូវបទពិសោធន៍ និងជំនាញប្រកបដោយប្រសិទ្ធភាពជាច្រើនទសវត្សរ៍ក្នុងការគ្រប់គ្រងឧស្សាហកម្មរបស់ជប៉ុន ដើម្បីគាំទ្រដល់ការអភិវឌ្ឍឧស្សាហកម្មប្រកបដោយនិរន្តរភាពនៅកម្ពុជា។

ការបង្ហាញនូវវិធីសាស្ត្រដ៏មានសារសំខាន់នេះត្រូវបានធ្វើឡើងនៅក្នុងឱកាសទទួលបានការអនុញ្ញាតចូលជួបពិភាក្សាការងារជាមួយ ឯកឧត្តម ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាថ្ងៃទី១១ ខែមីនា ឆ្នាំ២០២៥ នៅទីស្ដីការក្រសួង។

នៅក្នុងកិច្ចប្រជុំនេះ លោក HAMASAKA Takashi ប្រធានការិយាល័យលើកកម្ពស់ការគ្រប់គ្រងបរិស្ថាន នៃក្រសួងសេដ្ឋកិច្ច ពាណិជ្ជកម្ម និងឧស្សាហកម្ម ជប៉ុន បានលើកឡើងពីប្រវត្តិនៃដំណើរឧស្សាហូបនីយកម្មយ៉ាងឆាប់រហ័សរបស់ប្រទេសជប៉ុនក្នុងទសវត្សរ៍ឆ្នាំ១៩៥០ និង១៩៦០ ដែលបង្កឱ្យមានការបំពុលយ៉ាងខ្លាំង។ ជាការឆ្លើយតប រដ្ឋាភិបាលជប៉ុនបានអនុវត្តវិធានការច្បាប់ បទប្បញ្ញត្តិ ក្នុងភាពជាដៃគូជិតស្និទ្ធជាមួយវិស័យឯកជន ដើម្បីបង្កើតបច្ចេកវិទ្យាគ្រប់គ្រងការបំពុល ទន្ទឹមនឹងនោះ បន្តលើកកម្ពស់ការអភិវឌ្ឍ ឧស្សាហកម្មប្រកបដោយចីរភាព។

លោកបានចែករំលែកអំពីឧត្តមានុវត្តមួយចំនួនរបស់ជប៉ុន រួមទាំងការបង្កើតអង្គភាពគ្រប់គ្រងការបំពុលសម្រាប់រោងចក្រចាប់តាំងពីឆ្នាំ១៩៧១ ព្រមទាំងសារៈសំខាន់នៃការអនុលោមតាមស្តង់ដានិរន្តរភាពអន្តរជាតិ សម្រាប់ការចូលរួមក្នុងខ្សែច្រវាក់ផ្គត់ផ្គង់សកលរបស់ឧស្សាហកម្មកម្ពុជា។

ឯកឧត្តម ហែម វណ្ណឌី បានស្វាគមចំពោះការចែករំលែកបទពិសោធន៍របស់ភាគីជប៉ុននិងបាន ជម្រាបជូនអំពីកំណើនសេដ្ឋកិច្ច និងនគរូបនីយកម្មយ៉ាងឆាប់រហ័សរបស់កម្ពុជាមុនវិបត្តិកូវីដ១៩ ដែលនាំមកទាំងកាលា​នុវត្តភាព និងបញ្ហាប្រឈមផ្នែកបរិស្ថាន ។ ឯកឧត្តមបានបញ្ជាក់ការប្តេជ្ញាចិត្តរបស់រាជរដ្ឋាភិបាល     កម្ពុជាក្នុងការទាក់ទាញការវិនិយោគ ទន្ទឹមនឹងនោះ ពង្រឹងការអនុវត្តគោលការសង្គម បរិស្ថាន និងអភិបាលកិច្ច (ESG) ក្នុងឧស្សាហកម្ម។

ឯកឧត្តមរដ្ឋមន្ត្រីបានសង្កត់ធ្ងន់លើអភិក្រមតុល្យភាព ដោយរៀបចំបទប្បញ្ញត្តិដែលមានលក្ខណៈច្បាស់លាស់ និងជាក់ស្តែងតាមបរិបទរបស់កម្ពុជា ផ្តោតលើការអប់រំនិងការគាំទ្រវិស័យឯកជន ជាជាងការប្រើប្រាស់វិធានការផាកពិន័យ និងដាក់ទណ្ឌកម្មជាធំ។

លោក HAMASAKA បានលើកឡើងថា សមាគម JEMAI របស់ជប៉ុន បាននិងកំពុងសហការគាំទ្រក្រសួងឧស្សាហកម្មកម្ពុជា លើកិច្ចខិតខំប្រឹងប្រែងក្នុងការគ្រប់គ្រងការបំពុលនៅក្នុងរោងចក្រសហគ្រាស ដើម្បីជំរុញការអភិវឌ្ឍឧស្សាហកម្មស្របតាមគោលដៅអភិវឌ្ឍន៍ប្រកបដោយចីរភាព៕