ភ្នំពេញ៖ ជំងឺមិនឆ្លងបណ្តាលឱ្យមនុស្សស្លាប់ប្រមាណ ៦៤% នៅកម្ពុជា ខណៈនៅឆ្នាំ២០១៤ មានត្រឹមតែ ៥២%។ សមាមាត្រ នេះនឹងកើនឡើងជាមួយនឹងការរីកចម្រើនក្នុងការអភិវឌ្ឍ (នៅថៃមាន ៧៥% រួចទៅហើយ)។ប៉ុន្តែ ការសិក្សាបង្ហាញថា ជំងឺមិនឆ្លងភាគច្រើនអាចចៀសវាងបាន។ ជំងឺមិនឆ្លងសំខាន់ៗចំនួនបួនរួមមានជំងឺសរសៃ ឈាមបេះដូង ទឹកនោមផ្អែម មហារីក និងជំងឺផ្លូវដង្ហើមរ៉ាំរ៉ៃ ដែលបណ្តាលឱ្យស្លាប់ ៤០% ក្នុងចំណោមជំងឺមិនឆ្លង។

ឯកឧត្តមសាស្ត្រាចារ្យ  ឈាង រ៉ា រដ្ឋមន្ត្រីក្រសួងសុខាភិបាល បានថ្លែងឱ្យដឹងដូច្នេះនៅក្នុងសិក្ខាសាលាសភាថ្នាក់តំបន់ ស្តីពី « បម្រែបម្រួលប្រជាសាស្រ្ត និងជំងឺមិនឆ្លង៖ គោលនយោបាយឆ្លើយតបបញ្ហាប្រឈម សម្រាប់ប្រជាជនសកម្ម និងយុវជន » នាព្រឹកថ្ងៃទី៣១ខែមីនា ឆ្នាំ២០២៥ នៅវិមានរដ្ឋសភា។

ឯកឧត្តមរដ្ឋមន្ត្រី បានបញ្ជាក់ថា៖៨០% នៃជំងឺបេះដូង ដាច់សរសៃឈាមខួរក្បាល ទឹកនោមផ្អែមប្រភេទ ២ និងលើសពី ៣០% នៃជំងឺមហារីកអាចចៀសវាងបាន ដោយការឈប់ពិសាបារី និងគ្រឿងស្រវឹង ការបរិភោគអាហារដែលមានសុខភាពល្អ និងការធ្វើលំហាត់ប្រាណ។ ទោះបីជាគោលដៅល្អទាំងនេះហាក់ដូចជាពិបាកសម្រេចក៏ដោយ វឌ្ឍនភាពមានកម្រិតគួរឱ្យកត់សម្គាល់ ដែលអាចបំពេញបន្ថែមដោយគោលនយោបាយស្ម័គ្រចិត្តសមស្រប និងការអនុវត្តកាន់តែប្រសើររបស់ប្រជាជន តាមសារ អប់រំសុខភាពរបស់ក្រសួងសុខាភិបាល។

ការបង្ការធ្វើឱ្យសម្រេចបានវឌ្ឍនភាពទាំងនេះ៖ ជួយឱ្យចៀសផុតពីជំងឺ ពន្លឺតការលេចឡើងជំងឺ កាត់បន្ថយផលវិបាក ឧទាហរណ៍ តាមរយៈការពិនិត្យស្រាវជ្រាវរកជំងឺបានទាន់ពេលជាមុន។ការបង្ការត្រូវធ្វើឡើង តាំងពីនៅក្មេង ដើម្បីផ្តល់ឱ្យកុមារ និងក្មេងជំទង់ នូវការយល់ដឹង និងទម្លាប់ល្អ ហើយតាមរយៈ ការធ្វើឱ្យកុមារមានសុខភាពល្អ យើងរៀបចំមនុស្សពេញវ័យឱ្យមានសុខភាពល្អដែរ ហើយរាងកាយរបស់ពួកគេក៏អាច ទប់ទល់នឹងផលប៉ះពាល់នៃភាពចាស់បានកាន់តែប្រសើរ។

ឯកឧត្តមសាស្ត្រាចារ្យបានបញ្ជាក់ថា៖

«ការណ៍នេះត្រូវសម្រេចឱ្យបាន បើមិនដូច្នេះទេ បន្ទុកហិរញ្ញវត្ថុលើប្រព័ន្ធសុខាភិបាល និងសង្គម នឹងកាន់តែធ្ងន់ធ្ងរ នាពេលអនាគត។ តាមការសិក្សារបស់អង្គការសុខភាពពិភពលោក ជំងឺមិនឆ្លងមានតម្លៃស្មើនឹង ៦,៦% នៃផលិតផល ក្នុងស្រុកសរុបរបស់កម្ពុជា និងបណ្តាលឱ្យខាតបង់ ១,៥ ពាន់លានដុល្លារអាមេរិក ក្នុងមួយឆ្នាំ។ ដូច្នេះ យើងអាច ស្រមៃឃើញការកើនឡើងនៃបន្ទុកហិរញ្ញវត្ថុបណ្តាលមកពីការវិវត្តប្រជាសាស្ត្រ នៅបណ្តាឆ្នាំខាងមុខ»។

ប្រទេសអភិវឌ្ឍន៍បានជួបប្រទះនឹងនិន្នាការនេះរួចហើយ។ ក្នុងរយៈពេល ៣០ឆ្នាំចុងក្រោយនេះ ពួកគេត្រូវចំណាយ ៣០% នៃផលកំណើនដើម្បីប្រយុទ្ធប្រឆាំងនឹងជំងឺទាំងនេះ និងផលប៉ះពាល់នៃភាពចាស់ក្នុងសង្គម។ នេះគឺជាហេតុ ផលមួយដែលសហគមន៍អន្តរជាតិបានកំណត់ជាគោលដៅសុខភាពមួយ ក្នុងចំណោមគោលដៅអភិវឌ្ឍន៍ប្រកបដោយ ចីរភាព គឺកាត់បន្ថយការស្លាប់មុនអាយុបណ្តាលមកពីជំងឺមិនឆ្លងចំនួន ៣០% នៅឆ្នាំ២០៣០។

ឯកឧត្តមសាស្ត្រាចារ្យ  ឈាង រ៉ា រដ្ឋមន្ត្រីក្រសួងសុខាភិបាល បានឱ្យដឹងថា៖ក្នុងប៉ុន្មានឆ្នាំខាងមុខនេះ ប្រទេសកម្ពុជានឹងប្រឈមមុខនឹងបញ្ហាសុខភាព-សង្គមពីរ។ ម៉្យាង ការចំណាយលើការ ព្យាបាលនឹងកើនឡើង ពីព្រោះមនុស្សចាស់កាន់តែច្រើននឹងកើតជំងឺចម្រុះច្រើនមុខ និងជំងឺរ៉ាំរ៉ៃ ដែលការថែទាំមាន រយៈពេលវែង និងចំណាយច្រើន។ ម៉្យាងទៀត មូលដ្ឋានធនធានសម្រាប់ការផ្តល់ហិរញ្ញប្បទាននឹងកើនឡើងតិចតួច ដោយសារនឹងមានអត្រាយុវជនសកម្មតិចជាងមុន ដែលអាចចូលរួមចំណែកក្នុងការផ្តល់ហិរញ្ញប្បទានដល់ការចំណាយ លើសុខភាព តាមរយៈពន្ធ និងវិភាគទានសន្តិសុខសង្គម៕