បរទេស ៖ ធនាគារអាមេរិក Goldman Sachs ដែលជំនាញខាងវិនិយោគដ៏ធំបំផុតរបស់ពិភពលោកនៅសប្តាហ៍នេះបានធ្វើការព្យាករណ៍គួរឲ្យភ្ញាក់ផ្អើល និងព្រួយបារម្ភមួយអំពីអត្រាដែលអាចធ្លាក់ចូលក្នុងឱនភាពសេដ្ឋកិច្ចរបស់សហរដ្ឋអាមេរិក (US Recession) ក្នុងកម្រិតខ្ពស់។

Goldman Sachs បានបញ្ជាក់បន្ថែមថា ការសម្រេចចិត្តក្នុងការបង្កើនតម្លៃពន្ធគយថ្មី និងចុងក្រោយរបស់ប្រធានាធិបតីលោក Donald Trump គឺជាកត្តាជំរុញសំខាន៉ជាងគេដោយក្នុងនោះវានឹងរុញច្រានឲ្យសកម្មភាពហិរញ្ញវត្ថុមានភាពលំបាកជាងមុន ហើយសកម្មភាពវិនិយោគទៀតសោតក៏កាន់តែតានតឹងឡើង។

នៅក្នុងរបាយការណ៍ស្រាវជ្រាវមួយដែលមានចំណងជើងថា៖ US Daily: Countdown to Recession និងត្រូវបានយកមកបង្ហាញកាលពីថ្ងៃចន្ទដោយធនាគារ Goldman Sachs បានរៀបរាប់ថា លទ្ធភាពនៃការធ្លាក់ចូលទៅក្នុងឱនភាពសេដ្ឋកិច្ចរបស់ទីក្រុងវ៉ាស៊ិនតោនបានកើនឡើងទៅដល់៤៥ភាគរយ ពោលគឺច្រើនជាងធៀបទៅនឹងលទ្ធភាពកាលពីមួយសប្តាហ៍មុនដែលមានត្រឹមតែ៣៥ភាគរយប៉ុណ្ណោះ ហើយ Goldman Sachs ក៏បានព្យាករណ៍ដែរថា កំណើនសេដ្ឋកិច្ចអាមេរិកនឹងដាំក្បាលចុះពី ១ភាគរយ មកត្រឹមតែ ០,៥ភាគរយប៉ុណ្ណោះនៅក្នុងឆ្នាំ២០២៥នេះ។

ការកែសម្រួលថ្មីលើកនេះធ្វើឡើងបន្ទាប់ពីមានការប្រកាសដ៏គួរឲ្យភ្ញាក់ផ្អើលដោយរដ្ឋបាលលោក Trump កាលពីថ្ងៃទី២ ខែមេសា ជាមួយនឹងការដំឡើងពន្ធគយ១០ភាគរយទៅលើប្រទេសជាច្រើន និងប្រមាណជា១១ភាគរយ ទៅ ៥០ភាគរយ ទៅលើបណ្តាប្រទេសមួយចំនួនទៀតដែលលោក Trump លើកឡើងថា ដោយសារតែបញ្ហាមិនស្មើភាពគ្នានៃជញ្ជីងពាណិជ្ជកម្មជាមួយនឹងអាមេរិក។ ក្នុងនោះសហភាពអឺរ៉ុបទទួលរ៉ាប់រងពន្ធគយថ្មី២០ភាគរយពីអាមេរិក ហើយចិនប្រមាណជា៣៤ភាគរយដែលវាចូលជាធរមាននៅថ្ងៃទី៩ខែមេសានេះ។

អ្នកវិភាគនៅ Goldman Sachs បានធ្វើការពន្យល់នៅក្នុងរបាយការណ៍កែសម្រួលថ្មីនេះថា ៖លក្ខខណ្ឌហិរញ្ញវត្ថុទាំងឡាយបានរឹតបន្តឹងខ្លាំងជាងអ្វីដែលយើងរំពឹងទុកក្នុងការឆ្លើយតបទៅនឹងការប្រកាសរបស់សេតវិមានអំពីពន្ធគយទាំងនោះ។ ការរឹតបន្តឹងយ៉ាងខ្លាំងនៅក្នុងលក្ខខណ្ឌហិរញ្ញវត្ថុ ការធ្វើពហិការវិនិយោគិនបរទេស និងការបន្តកើនឡើងនូវភាពមិនច្បាស់លាស់នៃគោលនយោបាយ ទំនងជានឹងធ្វើឱ្យបញ្ហាបញ្ចេញទុនកាន់តែយ៉ាប់យ៉ឺនជាងអ្វីដែលបានរំពឹងទុកពីមុន។

បន្ថែមពីនេះដែរ មហាសេដ្ឋី និងជាអ្នកវិនិយោគអាមេរិក លោក Bill Ackman ក៏បានបង្ហាញពីការព្រួយបារម្ភ ហើយថែមទាំងបានព្រមានតាមរយៈការបង្ហោះសារនៅលើបណ្តាញសង្គម X កាលពីថ្ងៃអាទិត្យដោយហៅពន្ធគយទាំងនេះថាជា “សង្គ្រាមនុយក្លេអ៊ែរនៅក្នុងវិស័យសេដ្ឋកិច្ច (Economic Nuclear War) ដែលវានឹងអាចបំផ្លាញទំនុកចិត្តជាមួយនឹងសហរដ្ឋអាមេរិកក្នុងនាមជាដៃគូពាណិជ្ជកម្ម ដែលជាកន្លែងធ្វើអាជីវកម្ម និងជាទីផ្សារដើម្បីវិនិយោគ។

គួរឲ្យដឹងដែរថា ឱនភាពសេដ្ឋកិច្ច ( Recession )គឺជាស្ថានភាពមួយដែលមានការធ្លាក់ចុះនៃគ្រប់សកម្មភាពពាក់ព័ន្ធសេដ្ឋកិច្ចក្នុងរយៈពេលជាប់គ្នាយ៉ាងហោចណាស់២ត្រីមាស ឬ ៦ខែ ខណៈដែលវិបត្តិសេដ្ឋកិច្ច (Depression )គឺជាស្ថានភាពដែលធ្ងន់ធ្ងរខ្លាំងជាង Recession ក្នុងរយៈពេលដល់ទៅរាប់សិបឆ្នាំ ហើយពេលខ្លះទៅដល់សតវត្សរ៍ទៀតផង៕