សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឯកឧត្តម សាយ សំអាល់ ឧបនាយករដ្ឋមន្ត្រី បានមានប្រសាសន៍បញ្ជាក់ពីការប្ដេជ្ញាក្នុងការបញ្ចប់បញ្ហានៅតំបន់បេតិកភណ្ឌអង្គរ ដើម្បីលើកកម្ពស់ជីវភាពប្រជាពលរដ្ឋនៅក្នុងតំបន់ ក៏ដូចជានៅក្នុងខេត្តសៀមរាបឱ្យកាន់តែប្រសើរ ។
ឯកឧត្តម សាយ សំអាល់ ឧបនាយករដ្ឋមន្ត្រី បានប្រសាសន៍កាលពីពេលថ្មីៗនេះថា ក្នុងចំណោមភូមិ១១៤ ដែលស្ថិតនៅក្នុងតំបន់បេតិកភណ្ឌអង្គរ គឺសិក្សា និងកំណត់ទៅថា ភូមិណាគួរៀបចំបែបណាអាចធ្វើអ្វីបានខ្លះ និងកំណត់ភូមិណាដែលជាទួលបុរាណ សម្រាប់ការអភិរក្ស និងត្រូវចុះបញ្ជីឱ្យបានច្បាស់លាស់ ។
ឯកឧត្តមបានបន្តថា ៖
«ចាប់ពីពេលនេះ យើងត្រូវគិតថា ធ្វើម៉េចដើម្បីឱ្យអ្នកសៀមរាបមានជីវភាពល្អប្រសើរ ។ ម៉ោងនេះ បើសិនជាយើងមិនបាននាំគ្នាប្ដេជ្ញាចិត្ត ឬដាក់លក្ខខណ្ឌឱ្យបានល្អទេ យើងនឹងបាត់បង់ឱកាសសេដ្ឋកិច្ច។ ប្រជាពលរដ្ឋនៅលើពិភពលោកបានស្គាល់អង្គរវត្តយើងបានច្រើនក្នុងរយៈពេល៣០ឆ្នាំចុងក្រោយនេះ ដូច្នេះយើងត្រូវធ្វើម៉េចដើម្បីទាក់ទាញប្រជាពលរដ្ឋលើពិភពលោក ភ្ញៀវទេសចរអន្តរជាតិឱ្យមកលេងអង្គរបន្តទៀតនៅពេលអនាគត»។
គួររម្លឹកថា កាលពីចុងខែឧសភា ឆ្នាំ២០២៥កន្លងទៅនេះ ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំពិភាក្សាជាមួយក្រសួងវប្បធម៌ និងវិចិត្រសិល្បៈ ដើម្បីទទួលបានការឯកភាពលើការរៀបចំបទបញ្ញត្តិ លក្ខខណ្ឌនៃការប្រើប្រាស់ដី និងការគ្រងនគរូបនីយកម្ម និងសំណង់ក្នុងតំបន់រមណីយដ្ឋានបេតិកភណ្ឌពិភពលោកអង្គរ ។
នៅក្នុងកិច្ចប្រជុំនោះដែរ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ យល់ឃើញថា ប្រសិនបើការដោះស្រាយបញ្ហានៅតំបន់អង្គរនេះបានចប់សព្វគ្រប់នោះ ក្រសួងនឹងអាចឈានទៅបញ្ចប់ការចុះបញ្ជីដីធ្លីនៅទូទាំងប្រទេស ជាពិសេសនៅតំបន់បឹងទន្លេសាប និងខេត្តព្រះវិហារ ដែលជាខេត្តមានប្រាង្គប្រាសាទច្រើនបន្ទាប់ពីខេត្តសៀមរាប ហើយនឹងយកលំនាំនេះទៅដោះស្រាយផងដែរ។
ចំពោះការរៀបចំលក្ខខណ្ឌនៃការប្រើប្រាស់ដីនៅខេត្តសៀមរាប គឺត្រូវពិនិត្យមើលបទបញ្ញត្តិទាំងឡាយដែលបានកំណត់ពីមុនមក ជាពិសេសព្រះរាជក្រឹត្យលេខ ០១ ច្បាប់បេតិកភណ្ឌ ច្បាប់អង្គការដែលអនុវត្តដោយក្រសួងមហាផ្ទៃ ច្បាប់រៀបចំដែនដីដែលក្រសួងកំពុងតែព្រាង និងច្បាប់ភូមិបាលដែលមានស្រាប់ ប៉ុន្តែដោយសារស្ថានភាពបច្ចុប្បន្នមានការប្រែប្រួល ដូច្នេះច្បាប់នេះនឹងត្រូវកែសម្រួលដោយឆ្លុះបញ្ចាំងពីការគិតគូរបែបជាក់ស្តែងនិយមនៅពេលនេះ ហើយនឹងទៅឆ្នាំខាងមុខបន្តទៀត។
ទន្ទឹមនេះ ឯកឧត្តមឧបនាយករដ្ឋមន្ត្រី សាយ សំអាល់ ក៏បានបញ្ជាក់ថា ការដែលក្រសួងរៀបចំដែនដី នគរូបនីយកម្ម និងសំណង់ រៀបចំកិច្ចពិភាក្សាទូលាយជាមួយថ្នាក់ដឹកនាំ និងអ្នកជំនាញបេតិកភណ្ឌនៃក្រសួងវប្បធម៌ និងវិចិត្រសិល្បៈនាពេលនោះ ដោយផ្អែកលើវឌ្ឍនភាពនៃការរៀបចំលក្ខខណ្ឌនៃការប្រើប្រាស់ដីនៅតំបន់រមណីយដ្ឋានបេតិកភណ្ឌពិភពលោកអង្គរ សំដៅស្វែងរកការឯកភាពគ្នា លើការរៀបចំបទប្បញ្ញត្តិ លក្ខខណ្ឌនៃការប្រើប្រាស់ដី និងការគ្រប់គ្រងនគរូបនីយកម្ម និងសំណង់ ក្នុងតំបន់រមណីយដ្ឋានបេតិកភណ្ឌពិភពលោកអង្គរ ដើម្បីការពារឧត្តមប្រយោជន៍នៃការអភិរក្ស និងលើកស្ទួយជីវភាពរបស់អ្នកស្រុកអង្គរ និងបង្កលក្ខណៈងាយស្រួលឱ្យភ្ញៀវទេសចរមកកំសាន្ត និងបង្កើនឱកាសសេដ្ឋកិច្ចសំរាប់កម្ពុជា៕
Account
Security
Favourite Content