សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជា និងចិន បានឯកភាពគ្នាសហការលើវិស័យវិទ្យាសាស្ត្រ និងបច្ចេកវិទ្យាដើម្បីពន្លឿនបរិវត្តកម្មឆ្ពោះទៅរកសេដ្ឋកិច្ចឌីជីថល និងវិនិយោគលើសួន និងការស្រាវជ្រាវវិទ្យាសាស្ត្រ។
ទាក់ទងនឹងកិច្ចសហការនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាពេលថ្មីៗនេះ បានទទួលជួបក្រុមប្រឹក្សាក្រុង Hefei នៃសន្និសីទប្រឹក្សានយោបាយប្រជាជនចិន ដឹកនាំដោយលោក Han Bing ។
នៅក្នុងជំនួបនោះ លោក Han បានលើកឡើងពីភាពខ្លាំងផ្នែកសេដ្ឋកិច្ច និងនវានុវត្តន៍របស់ទីក្រុង Hefei ដែលមានផលិតផលក្នុងស្រុកសរុបចំនួន ១,៣៥ទ្រីលានយ័ន (ប្រមាណ១៩៣ ពាន់លានដុល្លារ)នាឆ្នាំ២០២៤ និងមានភាពឈានមុខក្នុងការផលិតយានយន្តប្រើថាមពលថ្មី និងជាក្រុងដែលស្ថិតក្នុងចំណោមមជ្ឈមណ្ឌលនវានុវត្តន៍កំពូលទាំង៧របស់ប្រទេសចិន។
លោកបានរំលេចពីតួនាទីរបស់ទីក្រុងនេះថាជា មជ្ឈមណ្ឌលផលិតប្រព័ន្ធកុំព្យូទ័រ Quantum របស់ចិន និងមានសាកលវិទ្យាល័យវិទ្យាសាស្ត្រ និងបច្ចេកវិទ្យាដ៏ល្បីល្បាញរបស់ចិនផងដែរ។
ក្នុងឱកាសនោះ ឯកឧត្តម ហែម វណ្ណឌី បានលើកឡើងអំពីភាគលាភប្រជាសាស្ត្ររបស់កម្ពុជា និងភាពចាំបាច់ក្នុងការចាប់យកបច្ចេកវិទ្យា ដើម្បីពន្លឿនបរិវត្តកម្មឆ្ពោះទៅរកសេដ្ឋកិច្ចឌីជីថល។ ជាមួយគ្នានេះ ឯកឧត្តមក៏បានស្នើឱ្យទីក្រុង Hefei ផ្តល់ការគាំទ្រដល់អ្នកស្រាវជ្រាវ និងអ្នកវិទ្យាសាស្ត្រកម្ពុជា តាមរយៈការផ្តល់អាហារូបករណ៍នៅសាកលវិទ្យាល័យដែលផ្តោតលើជំនាញ STEM របស់ក្រុង Hefei និងគាំទ្រដល់មន្ទីរពិសោធន៍របស់ក្រសួង។
ឯកឧត្តមរដ្ឋមន្ត្រីក៏បានអញ្ជើញអ្នកវិនិយោគពីទីក្រុង Hefei ឱ្យមកវិនិយោគលើសួនវិទ្យាសាស្ត្ររបស់កម្ពុជា និងបានគូសបញ្ជាក់អំពីឱកាសដែលអាចសហការក្រោមអនុស្សរណៈនៃការយោគយល់ដ៏ទូលំទូលាយនាពេលថ្មីៗនេះរវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងវិទ្យាសាស្ត្រ និងបច្ចេកវិទ្យារបស់ប្រទេសចិន ដែលកំណត់ក្របខ័ណ្ឌសម្រាប់កិច្ចសហប្រតិបត្តិការរយៈពេលវែង៕
Account
Security
Favourite Content