ភ្នំពេញ ៖ ក្នុងរយៈពេលខ្លីចុងក្រោយនេះ មានការផ្សព្វផ្សាយព័ត៌មានបែបអវិជ្ជមានពីកម្ពុជាពាក់ព័ន្ធនឹងការឆបោកតាមអនឡាញបង្កឡើងដោយជនបរទេសលួចជ្រកកោនខុសច្បាប់មួយចំនួនតូច ដែលធ្វើឱ្យប៉ះពាល់ដល់វិស័យទេសចរណ៍ ប៉ុន្តែបើតាមមន្ត្រីជាន់ខ្ពស់ក្រសួងទេសចរណ៍កម្ពុជា បានបញ្ជាក់ថា កម្ពុជានៅតែជាគោលដៅដែលមានសុវត្ថិភាព ប្រកបដោយបដិសណ្ឋារកិច្ចកម្រិតខ្ពស់សម្រាប់ភ្ញៀវទេសចរបរទេសគ្រប់រូប ។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានមានប្រសាសន៍ថា ក្នុងរយៈពេលថ្មីៗនេះមានបណ្ដាញសារព័ត៌មានបរទេសមួយចំនួនតូចផ្សព្វផ្សាយពាក់ព័ន្ធនឹងសកម្មភាពឆបោកតាមអនឡាញ និងការចាប់ជំរិត កំពុងកើតឡើងនៅក្នុងប្រទេសកម្ពុជា ។ ត្រង់ចំណុចនេះ រាជរដ្ឋាភិបាលកម្ពុជាកំពុងតែយកចិត្តទុកដាក់ខ្ពស់ក្នុងការតាមដាន និងចាត់វិធានការបន្ទាន់ដើម្បីទប់ស្កាត់ និងឃាត់ខ្លួនជនដែលពាក់ព័ន្ធ ។

ឯកឧត្តមរដ្ឋមន្ត្រីបានបញ្ជាក់ថា ៖

«យើងទទួលស្គាល់នូវកង្វល់ដែលបានលើកឡើងពីសំណាក់សាធារណជន និងប្រព័ន្ធផ្សព្វផ្សាយមួយចំនួន ក៏ប៉ុន្តែជាមួយគ្នានេះ យើងចាំបាច់ត្រូវបញ្ជាក់ឱ្យបានច្បាស់ថា ទាំងនេះគឺជាហេតុការណ៍ដាច់ដោយឡែក ដែលភាគច្រើនបានប្រព្រឹត្តដោយជនបរទេសខុសច្បាប់លួចច្រកកោននៅកម្ពុជា ហើយពិតណាស់ថាទង្វើទាំងអស់នេះមិនបានឆ្លុះបញ្ចាំងអំពីចរិតពិតរបស់ប្រជាជនកម្ពុជា ឬស្មារតីពិតប្រាកដរបស់ប្រទេសជាតិយើងនោះទេ»។

ឯកឧត្តមរដ្ឋមន្ត្រីបានបន្តឱ្យដឹងទៀតថា ប្រទេសកម្ពុជាតាំងពីដើមរហូតមកដល់បច្ចុប្បន្ន នៅតែធានាបាននូវកត្តាសុខសន្តិភាព និងជាគោលដៅទេសចរណ៍ដែលមានសុវត្ថិភាព ប្រកបដោយបដិសណ្ឋារកិច្ចក្នុងកម្រិតខ្ពស់មួយដែលភ្ញៀវទេសចរគ្រប់រូបត្រូវបានស្វាគមន៍យ៉ាងកក់ក្តៅប្រកបដោយទំនុកចិត្ត និងសេចក្ដីថ្លៃថ្នូរ ។

ឯកឧត្តមបញញជាក់ថា ៖

«ទោះជាយ៉ាងនេះក្ដី យើងក៏ទទួលស្គាល់ថា ការផ្សព្វផ្សាយព័ត៌មានដែលគួរឱ្យព្រួយបារម្ភបែបនេះ គឺពិតជាអាចបង្កើតអារម្មណ៍ភ័យខ្លាច និងភាពស្ទាក់ស្ទើរក្នុងចំណោមភ្ញៀវទេសចរ និងអ្នកវិនិយោគក្នុងការធ្វើដំណើរមកកាន់ប្រទេសកម្ពុជា ។ ប្រសិនបើយើងមិនបានយល់ច្បាស់ និងមិនមានការបកស្រាយពីសភាពការណ៍ពិតជាក់ស្ដែងពីព័ត៌មានទាំងនេះ នឹងធ្វើឱ្យខូចវឌ្ឍនភាពជាវិជ្ជមាន គួរឱ្យកត់សម្គាល់ ដែលកម្ពុជាសម្រេចបានក្នុងការកសាងវិស័យទេសចរណ៍របស់ខ្លួនឡើងវិញ ជាពិសេសបន្ទាប់ពីដំណាក់កាលដ៏លំបាកនៃជំងឺរាតត្បាតកូវីដ-១៩ ។ ក្នុងន័យនេះរាជរដ្ឋាភិបាល ពិតជាបានប្ដេជ្ញាចិត្តយ៉ាងពេញលេញក្នុងការថែរក្សា និងពង្រឹងមុខមាត់ប្រទេសកម្ពុជា ដែលជាគោលដៅប្រកបដោយទំនុកចិត្ត និងការទទួលខុសត្រូវ»។

រាជរដ្ឋាភិបាលបានចាត់វិធានការយ៉ាងម៉ឺងម៉ាត់ និងជាបន្ទាន់ដើម្បីទប់ស្កាត់រាល់សកម្មភាពឧក្រិដ្ឋកម្មទាំងឡាយណាដែលអាចបង្កគ្រោះថ្នាក់ដល់សុវត្ថិភាពប្រជាពលរដ្ឋ បូករួមទាំងសុវត្ថិភាពរបស់ភ្ញៀវទេសចរ ក៏ដូចជាអ្នកវិនិយោគគ្រប់រូបនៅក្នុងប្រទេសកម្ពុជា ។ ក្រសួង ស្ថាប័នមានសមត្ថកិច្ច ក៏ដូចជាក្រសួងមហាផ្ទៃ រួមនឹងស្ថាប័នអនុវត្តច្បាប់ ក៏បាន និងកំពុងចាត់វិធានការបង្ក្រាបយ៉ាងសកម្មលើប្រតិបត្តិការខុសច្បាប់ ជាពិសេសគឺបណ្ដាញឧក្រិដ្ឋកម្មឆ្លងដែនគ្រប់រូបភាព ដែលប្រតិបត្តិការទាំងនេះ គឺពិតជាបានឈានទៅដល់ការចាប់ខ្លួន និងនិរទេសជនល្មើសទាំងនោះ ព្រមទាំងមានការរុះរើគ្រឹះស្ថានមិនស្របច្បាប់ទាំងអស់នោះចេញជាបន្តបន្ទាប់ ។

ឯកឧត្តមរដ្ឋមន្ត្រី ហួត ហាក់ បានបញ្ជាក់ទៀតថា ក្រសួងទេសចរណ៍បានបន្តធ្វើការយ៉ាងជិតស្និទ្ធជាមួយក្រសួងស្ថាប័នពាក់ព័ន្ធ រដ្ឋបាលរាជធានី ខេត្ត រួមនឹងវិស័យឯកជននានា ដើម្បីធានាថា ភ្ញៀវទេសចរទាំងអស់ដែលអញ្ជើញមកកម្ពុជា គឺពិតជាទទួលបានអារម្មណ៍សុវត្ថិភាព សន្តិសុខ និងសេវាកម្មប្រកបដោយគុណភាពខ្ពស់ ។ ក្រសួងទេសចរណ៍ក៏បាន និងកំពុងពង្រឹងការអនុវត្តការងាររបស់អង្គភាពនគរបាលទេសចរណ៍ និងបានធ្វើឱ្យមានភាពប្រសើរឡើងនូវការសម្របសម្រួលជាមួយស្ថានទូតបរទេស និងពង្រឹងប្រព័ន្ធឆ្លើយតបរបស់យើង ដើម្បីធ្វើយ៉ាងណាជួយឱ្យអ្នកធ្វើដំណើរទៅមកបានឆាប់រហ័ស និងទានពេលវេលា ។ ទន្ទឹមនោះ ក្រសួងទេសចរណ៍ក៏បានបង្កើតបណ្ដាញទូរសព្ទទាន់ហេតុការណ៍ និងសេវាព័ត៌មានទេសចរណ៍ ២៤ម៉ោង ដើម្បីជាជំនួយទាន់ពេលវេលាសម្រាប់ភ្ញៀវទេសចរ ជាជំនួយដែលអាចទុកចិត្តបាន ។ លើសពីនោះ ក្រសួងទេសចរណ៍ក៏បាន និងកំពុងរៀបចំកម្មវិធីលើកកម្ពស់ការយល់ដឹង និងពង្រឹងសមត្ថភាពដល់ប្រតិបត្តិករទេសចរណ៍ ដើម្បីធានាថា សុវត្ថិភាព សុចរិតភាព និងវិជ្ជាជីវៈ នូវតែជាស្នូលនៃឧស្សាហកម្មទេសចរណ៍របស់កម្ពុជា ៕