ភ្នំពេញ៖ រាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធអាល្លឺម៉ង់ បានឯកភាពគ្នាក្នុងការបន្តកិច្ចសហប្រតិបត្តិការអភិវឌ្ឍន៍លើវិស័យអាទិភាពចំនួន៣ គឺ៖១) ការអភិវឌ្ឍសេដ្ឋកិច្ចប្រកបដោយចីរភាព, ២) សុខាភិបាល និងគាំពារសង្គម, ៣) ថាមពល និងអន្តរកាលថាមពលប្រកបដោយយុត្តិធម៌ ព្រមទាំងវិស័យផ្សេងៗទៀតដូចជា អភិបាលកិច្ច​(វិមជ្ឈការ) និងឌីជីថលូបនីយកម្ម ។ ការឯកភាពនេះ បានកើតឡើងបន្ទាប់ពីការចរចារយៈពេល២ថ្ងៃ គឺថ្ងៃទី១៨-១៩ ខែវិច្ឆិកា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា

សូមជម្រាបថា ភាគីទាំងពីរបានបើកកិច្ចចរចាស្តីពីកិច្ចសហប្រតិបត្តិ​ការអភិវឌ្ឍន៍ឆ្នាំ២០២៥ ដើម្បីពិភាក្សាលើវឌ្ឍនភាពកិច្ចសហប្រតិបត្តិការអភិវឌ្ឍន៍ទ្វេភាគី ទាំងទិដ្ឋភាពបច្ចេកទេស និងទិដ្ឋភាពនយោបាយ ព្រមទាំងពិនិត្យ-តម្រង់ទិសវិស័យអាទិភាពនៃកិច្ចសហប្រតិបត្តិការអភិវឌ្ឍន៍រវាងប្រទេសទាំងពីរនាពេលអនាគត ។ កិច្ចប្រជុំនេះមានការចូលរួមពីឯកឧត្តម Stefan Anton Masserer ឯកអគ្គរដ្ឋទូតសាធារណរដ្ឋសហព័ន្ធអាល្លឺ​ម៉ង់ប្រចាំកម្ពុជា,តំណា​ងទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិប្រចាំកម្ពុជា(GIZ),​តំណាងធនាគារអភិ​វឌ្ឍន៍អាល្លឺម៉ង់ប្រចាំកម្ពុជា(KFW) និងតំណាងជាន់ខ្ពស់ក្រសួង ស្ថាប័នពាក់ព័ន្ធរបស់រាជរដ្ឋាភិបាល។

លោកជំទាវ Christina Laun ប្រធានតំបន់អាស៊ីអាគ្នេយ៍នៃក្រសួងសហប្រតិបត្តិការសេដ្ឋកិច្ច និងការអភិវឌ្ឍ អាល្លឺម៉ង់បានកោតសរសើរចំពោះវឌ្ឍនភាពដែលរាជរដ្ឋាភិបាលកម្ពុជាសម្រេចបានក្នុងកិច្ចអភិវឌ្ឍន៍សង្គម សេដ្ឋកិច្ច ជាពិសេសស្របតាមយុទ្ធសាស្ត្របញ្ចកោណដំណាក់កាលទី ១ ជាពិសេស ការខិតខំប្រឹងប្រែងក្នុងការកាត់បន្ថយភាពក្រីក្រ និងការធ្វើឱ្យប្រសើរឡើងនូវអភិបាលកិច្ច, ប្រព័ន្ធគាំពារសង្គម និងការគ្រប់គ្រងហិរញ្ញវត្ថុសាធារណៈ ។

លោកជំទាវ Christina Laun បានលើកឡើងថា៖

«អាល្លឺម៉ង់​ បានវាយតម្លៃខ្ពស់ និងចាត់ទុកកម្ពុជាជាដៃគូសំខាន់ក្នុងកិច្ចសហប្រតិបត្តិការអភិវឌ្ឍន៍អាល្លឺម៉ង់ ហើយបន្តកិច្ច​សហ​​ប្រតិ​បត្តិការអភិវឌ្ឍន៍លើវិស័យអាទិភាពចំនួន៣រួមមាន១)ការអភិវឌ្ឍសេដ្ឋកិច្ចប្រកបដោយចីរភាព,២) សុខា​ភិ​បា​ល និងគាំពារសង្គមនិង៣)ថាមពលនិងអន្តរកាលថាមពលប្រកបដោយយុត្តិធម៌ព្រមទាំងវិស័យផ្សេងៗទៀតដូចជាអភិ​បា​ល​កិច្ច(វិមជ្ឈការ) និងឌីជីថលូបនីយកម្ម »។

ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី ២ ក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ថា៖

«កិច្ចចរចាឆ្នាំ២០២៥នេះ ឆ្លុះបញ្ចាំងពីការប្តេជ្ញាចិត្តរួមគ្នាក្នុងការអភិវឌ្ឍសង្គម-សេដ្ឋកិច្ចកម្ពុជាប្រកបដោយភាពធន់ បរិយាបន្ន និងចីរភាព»។

ជាមួយគ្នានេះ ឯកឧត្តមទេសរដ្ឋមន្ត្រីក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនអាល្លឺម៉ង់ដែលបានបន្តរួមចំណែកក្នុងកិច្ចអភិវឌ្ឍព្រះរាជាណាចក្រកម្ពុជា។ ក្នុងភាពជាប្រទេសដៃគូអភិវឌ្ឍន៍ កម្ពុជានឹងបន្តកិច្ចខិតខំបន្ថែមទៀតទាំងការអភិវឌ្ឍន៍សង្គមកិច្ច សេដ្ឋកិច្ច និងពង្រឹងវិស័យអប់រំឱ្យកាន់តែរឹងមាំដូចបណ្តាប្រទេសជឿនលឿននានានៅលើសកលលោក៕