សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ចាម ៖ កំពង់ចាមជាខេត្តមួយស្ថិតនៅមិនឆ្ងាយប៉ុន្មានពីរាជធានីភ្នំពេញ ប៉ុន្តែការអភិវឌ្ឍអចលនទ្រព្យនៅខេត្តកំពង់ចាមហាក់នៅមានកម្រិតនៅឡើយ ដោយបច្ចុប្បន្ននេះ កំពង់ចាមទទួលបានតែគម្រោងវិនិយោគតូចៗ ស្របពេលគម្រោងធំមួយនៅប៉ែកខាងលិចក្រុងកំពង់ចាម ដែលចាប់ផ្ដើមកាលពីអំឡុងបីបួនឆ្នាំកន្លងទៅនៅបន្តពន្យារពេល។
អ្នកស្រី ក្រី ម៉ាយ៉ាន ប្រធានសាខានៃក្រុមហ៊ុនអចលនទ្រព្យ KW Cambodia ប្រចាំខេត្តកំពង់ចាមបានមានប្រសាសន៍ថា ដោយសារតែសេដ្ឋកិច្ចប្រទេសកម្ពុជា មិនទាន់ងើបល្អប្រសើរពីវិបត្តិកូវីដ-១៩ ធ្វើឱ្យការវិនិយោគគម្រោងថ្មីៗក្នុងខេត្តកំពង់ចាមនៅបន្តភាពស្ងប់ស្ងាត់ ហើយគម្រោងភាគច្រើនដែលវិនិយោគនៅក្នុងខេត្តកំពង់ចាមគឺជាគម្រោងឯកជន និងខ្នាតតូចៗប៉ុណ្ណោះ ។
អ្នកស្រីបន្តថា គម្រោងវិនិយោគក្នុងពេលបច្ចុប្បន្ននេះ ដូចជាផ្ទះល្វែងជាដើម គឺមានទំហំត្រឹមតែ ១០ ឬ ២០ល្វែង សម្រាប់ផ្គត់ផ្គង់ដល់អ្នកមានតម្រូវការនៅជិតៗក្រុង ពោលគឺនៅមិនទាន់មានគម្រោងធំៗណាមួយបង្ហាញវត្តមាននោះឡើយ។ យ៉ាងណាក៏ដោយ នៅក្នុងខេត្តមួយនេះ បច្ចុប្បន្ន អ្នកវិនិយោគមួយចំនួនបានចាប់អារម្មណ៍ទៅលើការពុះដីឡូត៍សម្រាប់សាងសង់ផ្ទះបែបលំហែរ ដោយអតិថិជនភាគច្រើនជាអ្នករស់នៅភ្នំពេញ ទិញទុកសម្រាប់ជាការលំហែរនៅពេលចុងសប្ដាហ៍ ឬក៏ពេលឈប់សម្រាកពេលមានបុណ្យទានធំៗ ។
ជាមួយគ្នានេះ អ្នកស្រីក៏បានលើកឡើងពីសក្ដានុពលនៃខេត្តផងដែរថា កំពង់ចាម ជាខេត្តដែលមានមនុស្សឆ្លងកាត់ច្រើនជាងគេ ជាក់ស្ដែងអ្នកចេញពីភ្នំពេញទៅខេត្តស្ទឹងត្រែង រតនគីរី មណ្ឌលគីរី សៀមរាប កំពង់ធំ សុទ្ធតែត្រូវឆ្លងកាត់ខេត្តកំពង់ចាម ដូច្នេះនៅពេលអនាគតខេត្តមួយនេះនឹងក្លាយជាចំណាប់អារម្មណ៍មួយសម្រាប់អ្នកអភិវឌ្ឍន៍។ យ៉ាងណាមិញ កំពង់ចាមក៏ជាខេត្តដែលទាក់ទាញលើវិស័យឧស្សាហកម្មដ៏មានសក្ដានុពលមួយផងដែរ ដោយវិនិយោគិនជាច្រើនបន្តសម្លឹងរកទីតាំងសម្រាប់បណ្ដាក់ទុនលើវិស័យឧស្សាហកម្ម ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងកន្លងមកថា កំពង់ចាម ជាខេត្តមិនឆ្ងាយពីភ្នំពេញ ហើយក៏មានផ្លូវស្រួលធ្វើដំណើរ ដូច្នេះវាក៏ជាខេត្តមួយដែលអាចនឹងមានសក្ដានុពល និងទាក់ទាញទៅលើវិស័យឧស្សាហកម្ម ។ ជាមួយគ្នានេះ រាជរដ្ឋាភិបាលកម្ពុជាក៏បាន និងកំពុងរៀបចំការអភិវឌ្ឍហេដ្ឋារចនាសម្ព័ន្ធបន្ថែម ដូចជាគម្រោងអភិវឌ្ឍផ្លូវជាតិលេខ៧ពីស្គន់ទៅក្រុងកំពង់ចាមដែលគ្រោងនឹងបើកការដ្ឋានសាងសង់នៅឆ្នាំបន្ទាប់ដែលជាកត្តាទាក់ទាញបន្ថែមទៀតដល់ការវិនិយោគនៅក្នុងខេត្តមួយនេះ៕
ជីវប្រវត្តិ: លោកមានបទពិសោធន៍ជាង ១០ឆ្នាំក្នុងប្រព័ន្ធផ្សព្វផ្សាយផ្នែកសេដ្ឋកិច្ច អប់រំ សង្គម និងកម្សាន្ត។ បច្ចុប្បន្នលោកជាការីនិពន្ធនៃសារព័ត៌មាន AMS Economy។
របាយការណ៍ថ្មីៗ
មើលទាំងអស់ ➧
អ្នកជំនាញ ៖ ចង់មានសុវត្ថិភាពគណនីហិរញ្ញវត្ថុគប្បីបង្កើនប្រសិទ្ធភាពលេខសម្ងាត់ឱ្យបានរឹងមាំ
• 09/04/2026
ព័ត៌មានទូទៅ
មើលទាំងអស់ ➧
កម្មវិធីពិសេសរបស់ AMS ECONOMY
ព័ត៌មានសង្ខេប
Account
Security
Favourite Content