សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សម្រាប់វិស័យកសិកម្មរបស់កម្ពុជា គឺមានការផ្លាស់ប្ដូរពីការអភិវឌ្ឍតាមបែបទូលាយឲ្យទៅជាការអភិវឌ្ឍតាមបែបស៊ីជម្រៅវិញ ប៉ុន្តែអាចផ្គត់ផ្គង់ប្រជាជនបានច្រើនជាងមុន។ នេះបើតាមប្រសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសការអញ្ជើញផ្ដល់សញ្ញាបត្រដល់និស្សិតកសិកម្មនាព្រឹកថ្ងៃទី១៥ ខែឧសភា ឆ្នាំ២០២៣នេះ។
ការផ្លាស់ប្ដូរគោលដៅក្នុងការអភិវឌ្ឍវិស័យកសិកម្ម ដែលសម្ដេចនាយករដ្ឋមន្ត្រីបានលើកឡើងនេះគឺធ្វើឡើងស្របទៅនឹងការវិវត្តិនៃសេដ្ឋកិច្ច និងកំណើននៃប្រជាជនកម្ពុជា។ កំណើននៃប្រជាជននេះហើយដែលជាកត្តាចម្បងមួយតម្រូវឲ្យរាជរដ្ឋាភិបាលត្រូវផ្ដោតលើការផ្គត់ផ្គង់ស្បៀងដល់ប្រជាជនឲ្យបានគ្រប់គ្រាន់។
បើតាមប្រសាសន៍របស់សម្ដេច ក្រោយពីការបិទបញ្ចប់នូវរបបប្រល័យពូជសាសន៍ទៅ ប្រជាជនកម្ពុជាមានប្រមាណជា ៥លាននាក់ប៉ុណ្ណោះ ខណៈដែលផ្ទៃដីនៅទំនេរច្រើន។ ដោយមូលហេតុនេះ និងដើម្បីកសាងសេដ្ឋកិច្ចប្រជាជននៅក្រោយសង្រ្គាមផង កាលនោះរាជរដ្ឋាភិបាលក៏បានចេញនូវគោលការផ្ដល់កម្មសិទ្ធិដីធ្លី ដោយកំណត់ថាក្នុងមួយគ្រួសារដែលមានសមាជិក ៥នាក់ គឺស្មើនឹងដីមួយហិកតា។ ប៉ុន្តែសម្រាប់របត់សង្គមបច្ចុប្បន្ន ដែលប្រជាជនកម្ពុជាបានកើនឡើងដល់ក្នុងរង្វង់ ១៧លាននាក់ គោលការណ៍នេះមិនគួរនឹងត្រូវបានអនុវត្តទៀតទេ។ ត្រង់ចំណុចនេះហើយ ដែលសម្ដេចនាយករដ្ឋមន្ត្រីហៅថា ជាកំណែទម្រង់ដីធ្លីទៅជាការធ្វើកសិកម្មបែបស៊ីជម្រៅ។
សម្ដេចតេជោបន្តថា ៖
“ពេលនោះដីធ្លីដែលយើងមានស្រាប់ គឺគ្រប់គ្រាន់សម្រាប់ប្រជាជននៅពេលនោះ ប៉ុន្តែពេលនេះប្រជាជនរបស់យើង បើទោះបីជាមិនទាន់ធ្វើការអង្កេតឡើងវិញក៏ដោយ តែចំនួនប្រជាជនយើងឡើងជុំវិញ ១៧លាននាក់…ដូច្នេះការកើនឡើងនៃចំនួនប្រជាជននេះហើយដែលតម្រូវឲ្យយើងត្រូវដោះស្រាយដីធ្លីជូនពួកគាត់ដើម្បីឲ្យពួកគាត់បានបង្កបង្កើនផល។”
សម្ដេចមានប្រសាសន៍បន្តទៀតថា៖
“ដូចដែលខ្ញុំបានលើកឡើងខាងលើ កសិករយើង ប្រជាជនយើងបើមាន៥នាក់ត្រូវមានមួយហិកតា ឥឡូវនេះយើងប្ដូរទស្សនៈនេះបានហើយ! ពិតមែនហើយ វាមិនអស់ទាំងស្រុងទេ នៅមានប្រជាជនយើងដែលត្រូវការដីធ្លីបន្ថែម ប៉ុន្តែយើងត្រូវដោះស្រាយបញ្ហានេះតាមរយៈការបន្តដោះស្រាយទឹក និងបង្កើនរដូវដាំដុះ…ដីមួយហិកតាដដែល ដែលធ្លាប់ចិញ្ចឹមបានមនុស្ស៥នាក់ត្រូវធ្វើដីមួយហិកតាដដែលឲ្យចិញ្ចឹមមនុស្សបាន ២០នាក់ ឬលើសពីនេះតាមរយៈការដោះស្រាយទឹក ដើម្បីឲ្យពួកគាត់ដែលធ្លាប់ធ្វើបានតែម្ដងអាចធ្វើបាន២ដង ឬ៣ដង។”
ក្នុងនោះផងដែរ សម្ដេចក៏បានលើកឡើងអំពីពូជស្រូវថ្មីៗ ដែលក្រសួងកសិកម្មទើបបានប្រកាស ជាពូជដែលឆាប់ទទួលបានទិន្នផល ដោយប្រើប្រាស់រយៈពេលបង្កបង្កើនផលត្រឹមតែ ៧៨ថ្ងៃ។ តាមរយៈពូជស្រូវថ្មីនេះ ប្រជាកសិករនឹងអាចមានលទ្ធភាពដាំដុះបាន ២ ទៅ៣ដងក្នុងមួយឆ្នាំ ហើយដែលមានន័យថា កម្ពុជាកំពុងតែប្រើប្រាស់ដីកសិកម្មឲ្យអស់ពីលទ្ធភាព៕
Account
Security
Favourite Content