បច្ចេកវិទ្យាកាន់តែទំនើប ខណៈដែលនៅស្ទើរគ្រប់វិស័យត្រូវបានប្រើប្រាស់យ៉ាងទូលំទូលាយ និងនៅគ្រប់ទីកន្លែងបានក្លាយទៅជាប្រធានបទដែលចម្រូងចម្រាសបំផុតសម្រាប់អនាគតនៃមនុស្សជាតិ។ បច្ចេកវិទ្យានេះមានផលល្អ និងផលអាក្រក់ក្នុងពេលតំណាលគ្នាប្រសិនបើការប្រើប្រាស់មិនបានត្រឹមត្រូវនិងផ្តល់ផលប្រយោជន៍សំដៅតែមនុស្សមួយក្រុម ឬតំបន់ដែលបានកំណត់ណាមួយ។

ទោះបីជាយ៉ាងណាក្តី អ្វីដែលគួរឲ្យចាប់អារម្មណ៍បំផុតនាពេលចុងក្រោយនេះចំពោះផលអាក្រក់នៃបច្ចេកវិទ្យានោះគឺថាអ៊ីស្រាអ៊ែលទើបតែបានអនុវត្តកម្មវិធីយោធាថ្មីមួយដែលអាចប្រើប្រាស់បច្ចេកវិទ្យា AI នៅក្នុងប្រតិបត្តិការវាយប្រហារតាមអាកាសរបស់ខ្លួន។ វាត្រូវបានអនុវត្តក្នុងបេសកកម្មជាច្រើនរួចមកហើយដោយលើកឡើងថា វាសុទ្ធតែជាបេសកកម្មប្រឆាំងទៅនឹងក្រុមភេវរកម្មទាំងដែលជាក់ស្តែងមានពលរដ្ឋស៊ីវិលជាច្រើនដែលបានបាត់បង់ជីវិត។

ថ្មីៗនេះកងកម្លាំងយោធារបស់អ៊ីស្រាអែលបានចេញសេចក្តីរាយការណ៍ថាកំពុងប្រើប្រាស់បច្ចេកវិទ្យាបញ្ញាសិប្បនិមិត្ត ឬហៅកាត់ថា AI ដើម្បីពន្លឿនការកំណត់គោលដៅវាយប្រហារតាមអាកាសរបស់ខ្លួន និងដោះស្រាយផែនការដឹកជញ្ជូនសម្រាប់ប្រតិបត្តិការវាយឆ្មក់ជាបន្តបន្ទាប់ ពោលគឺនៅចំពេលមានភាពតានតឹងកើនឡើងនៅក្នុងទឹកដីប៉ាឡេស្ទីនដែលអ៊ីស្រាអ៊ែលកំពុងកាន់កាប់។

សេចក្តីប្រកាសដដែលនេះបានពន្យល់ទៀតថាប្រព័ន្ធកំណត់គោលដៅដែលមានមូលដ្ឋានលើប្រព័ន្ធគ្រប់គ្រងតាមបែប AI អាចដំណើរការជាមួយនឹងទិន្នន័យដ៏ច្រើន និងយ៉ាងឆាប់រហ័ស ដើម្បីផ្តល់អាទិភាព និងកំណត់គោលដៅរាប់ពាន់ដងទាំងប្រតិបត្តិការដោយយន្តហោះ ចម្បាំងដោយពីឡុត និងយន្តហោះគ្មានមនុស្សបើក។

គួរឲ្យដឹងដែរថា ការប្រកាសនេះបានធ្វើឡើងបន្ទាប់ពីរដ្ឋាភិបាលទីក្រុងយេរូសាឡឹមទើបតែបានបង្កើនការវាយប្រហារតាមអាកាសទៅលើតំបន់ West Bank ដែលខ្លួនកំពុងកាន់កាប់និងគោលដៅផ្សេងទៀតក្នុងប៉ុន្មានសប្តាហ៍ថ្មីៗនេះ ដោយអ៊ីស្រាអ៊ែលហៅវាថាជាប្រតិបត្តិការប្រឆាំងភេរវកម្មប៉ុណ្ណោះ។

ជាលទ្ធផល ពលរដ្ឋស៊ិវិលយ៉ាងហោចណាស់១៥ នាក់ត្រូវបានសម្លាប់ក្នុងការវាយប្រហារតាមអាកាសកាលត្រឹមតែមួយថ្ងៃកាលពីថ្ងៃទី៨ ខែឧសភា នៅក្បែរទៅនឹងឆ្នេរសមុទ្រក្នុងតំបន់ Gaza ហើយកងកម្លាំងយោធាអ៊ីស្រាអ៊ែលហៅកាត់ថា IDF ក៏​បាន​បន្ត​វាយប្រហារ​លើ​គោលដៅ​ច្រើនទៀតក្នុង​ប្រទេស​ស៊ីរីផង និង​អ៊ីរ៉ង់ផង។

បច្ចេកវិទ្យា AI ដែលប្រើប្រាស់ដោយ IDF ទោះបីជាយ៉ាងណាវាត្រូវពឹងផ្អែកលើប្រតិបត្តិកររបស់មនុស្សទាំងស្រុងដើម្បីផ្ទៀងផ្ទាត់ និងអនុម័តផែនការវាយប្រហារតាមអាកាស និងការវាយឆ្មក់នីមួយៗ។

កាសែត ​The Bloomberg ដែលទទួលបានបទសំភាសផ្ទាល់ជាមួយនឹងក្រុមការងារជំនាញយោធាអ៊ីស្រាអ៊ែរបានសរសេរថា៖ជាធម្មតាប្រតិបត្តិការដោយយោធាដែល​ត្រូវ​ចំណាយ​ពេល​រាប់​ម៉ោង​ប៉ុន្តែពេលនេះវាការ​ពេលតែ​ប៉ុន្មាន​នាទីប៉ុណ្ណោះដើម្បីកំណត់គោលដៅ និងត្រឹមតែ​ប៉ុន្មាន​នាទីផ្សេង​ទៀត​សម្រាប់​ការ​ផ្ទៀងផ្ទាត់ដោយ​មនុស្ស។

ទោះបីជាយ៉ាងណាក្តី មានក្រុមអ្នកជំនាញជាច្រើនបានលើកឡើងអំពីការព្រួយបារម្ភរបស់ពួកគេជាពិសេសទៅលើផលអាក្រក់ដែលអាចកើតមានចេញពីការគណនានិងវាស់វែងមិនត្រឹមត្រូវដោយបច្ចេកវិទ្យា AI ក៏ដូចជាការសម្រេចចិត្តកាត់បន្ថយកម្លាំងមនុស្សក្នុងផ្នែកគ្រប់គ្រងបច្ចេកវិទ្យានៅពេលដែលបច្ចេកវិទ្យាមួយនេះកាន់តែរីកចម្រើននាពេលអនាគត៕