បរទេស ៖ យោងតាមប្រភពពី CNBC រាយការណ៍ថា គោលនយោបាយ EV របស់ឥណ្ឌូនេស៊ីបានទាក់ទាញអ្នកវិនិយោគទូទាំងពិភពលោកមកលើប្រទេសនេះ ប៉ុន្តែអ្នកជំនាញនិយាយថា វាក៏​ជួយជំរុញការវិនិយោគលើឧស្សាហកម្មរថយន្តនៅអាស៊ីអាគ្នេយ៍ឲ្យកាន់តែទូលំទូលាយផងដែរ។

បណ្តាប្រទេសនៅអាស៊ីអាគ្នេយ៍សម្បូរទៅដោយធនាធានធម្មជាតិដូចជា ទង់ដែង នីកែល កូបាល់ និង បុកស៊ីត ដែលសុទ្ធតែជាវត្ថុធាតុដើមចាំបាច់សម្រាប់ផលិតអាគុយរថយន្តអគ្គិសនី។ លើសពីនេះ ឥណ្ឌូណេស៊ីមានទុនបម្រុង នីកែល ស្ទើរតែ ១ ភាគ ៤ នៃពិភពលោក និងជាអ្នកនាំចេញ នីកែល ដ៏ធំបំផុត ហើយប្រទេសនេះបានទាក់ទាញក្រុមហ៊ុន Tesla ក្នុងក្តីសង្ឃឹមថានឹងបង្វែរធនធានរបស់ខ្លួនឱ្យក្លាយជាមជ្ឈមណ្ឌលផ្គត់ផ្គង់ដ៏សំខាន់របស់ពិភពលោកសម្រាប់រថយន្តអគ្គិសនី។

Koketso Tsoai អ្នកវិភាគរថយន្តនៅ BMI Fitch Solutions បានលើកឡើងថា ភាពសំបូរបែបនៃធនធានធម្មជាតិរបស់ឥណ្ឌូនេស៊ីផ្តល់ភាពអំណោយទាន ដោយវាក្លាយជាតម្រូវការចាំបាច់សម្រាប់ការផលិតរថយន្តអគ្គិសនី EV និងទាក់ទាញការវិនិយោគ។ បន្ទាប់ពីមានការហាមឃាត់ រ៉ែនីកែល រដ្ឋាភិបាលឥណ្ឌូណេស៊ីបានលើកឡើងពីការទទួលបានអត្ថប្រយោជន៍ពីធនធានធម្មជាតិរបស់ខ្លួន ដើម្បីជំរុញកំណើនសេដ្ឋកិច្ច។ កាលពីឆ្នាំកន្លងទៅនេះ ឥណ្ឌូណេស៊ីបានហាមឃាត់ការនាំចេញលោហៈ និងរ៉ែមួយចំនួនក្នុងគោលបំណងទាក់ទាញវិនិយោគិន និងអ្នកផលិតដែលត្រូវការសម្ភារៈទាំងនោះ។

ក្នុងប៉ុន្មានឆ្នាំចុងក្រោយថ្មីៗនេះ គោលដៅរបស់ប្រទេសនេះចង់ក្លាយជាមជ្ឈមណ្ឌលថាមពលថ្ម EV របស់ពិភពលោកបានទទួលការគាំទ្រយ៉ាងខ្លាំងពីក្រុមហ៊ុនផលិតរថយន្តនៅអាស៊ី ដូចជា Toyota និង Hyundai បាន​វិនិយោគ​រាប់​ពាន់​លាន​ដុល្លារ​ដើម្បី​ពង្រីក​កន្លែង​ផលិត​រថយន្ត EV នៅ​ឥណ្ឌូនេស៊ី។ មិនត្រឹមតែប៉ុណ្ណោះ ការផលិតអាគុយ EV បានបង្កើតចំណែកដ៏សំខាន់សម្រាប់ការវិនិយោគផ្ទាល់ពីបរទេសនៅក្នុងតំបន់អាស៊ីអាគ្នេយ៍ចន្លោះឆ្នាំ ២០១៩ និង ២០២១ ជាពិសេសនៅក្នុងប្រទេសឥណ្ឌូនេស៊ី ម៉ាឡេស៊ី និងប្រទេសថៃ។ ទោះបីជាយ៉ាងណាក្តី ឥណ្ឌូនេស៊ីនៅតែប្រឈមមុខនឹងឧបសគ្គក្នុងការជំរុញការផលិតរថយន្ត ដោយសារវានឹងពិបាកក្នុងការជំនួសប្រទេសថៃជាមជ្ឈមណ្ឌលផលិតរថយន្តក្នុងតំបន់ និងមានឧស្សាហកម្មរថយន្តដែលផ្តោតលើការនាំចេញជាយូរមកហើយ។ លើសពីនេះ ឥណ្ឌូនេស៊ីក៏នឹងប្រឈមមុខនឹងការប្រកួតប្រជែងពីអ្នកផលិតដែលមានតម្លៃទាបដូចជាវៀតណាម និងហ្វីលីពីនផងដែរ។

យ៉ាងណាមិញ ការរីកចម្រើននៃវិស័យ EV របស់ឥណ្ឌូនេស៊ីអាចផ្តល់ឥទ្ធិពលដល់ប្រទេសជិតខាងរបស់ខ្លួន។ យោងតាមរបាយការណ៍របស់ធនាគារ Maybank បានឱ្យដឹងថា តាមរយៈការផ្តល់លទ្ធភាពប្រើប្រាស់សម្ភារៈសំខាន់ៗសម្រាប់អាគុយ EV ឥណ្ឌូនេស៊ីអាចទាក់ទាញការវិនិយោគកាន់តែច្រើន និងជួយជំរុញឲ្យការប្រើប្រាស់រថយន្តអគ្គិសនីនៅអាស៊ីអាគ្នេយ៍យ៉ាងឆាប់រហ័ស។

Anindya Novyan Bakrie នាយកប្រតិបត្តិក្រុមហ៊ុន Bakrie & Brothers លើកឡើងថា ទោះបីជាធនធាធម្មជាតិរបស់ឥណ្ឌូនេស៊ីដើរតួនាទីយ៉ាងសំខាន់ក្នុងការកសាងប្រព័ន្ធអេកូឡូស៊ីសម្រាប់ EV ដែលមានការប្រកួតប្រជែងនៅក្នុងអាស៊ានក៏ដោយ ប៉ុន្តែអ្នកវិនិយោគទំនងជាសម្លឹងមើលតំបន់ទាំងមូល។ បណ្តាប្រទេសនានានៅអាស៊ីអាគ្នេយ៍អាចរួមបញ្ចូលគ្នានូវកម្លាំងមួយដែលនាំមកនូវភាពខ្លាំង និងជំនាញផ្សេងៗគ្នា ដើម្បីផ្តល់ផលប្រយោជន៍ដល់ប្រព័ន្ធអេកូឡូស៊ី EV ក្នុងតំបន់។ ឧទាហរណ៍ ប្រទេសម៉ាឡេស៊ីផ្តល់នូវការលាយផលិតផលពិសេសបន្ថែមទៀតនៃទំនិញបច្ចេកវិទ្យាខ្ពស់ ដើម្បីជំរុញឌីជីថលនីយកម្មនៅក្នុងឧស្សាហកម្មរថយន្ត។ ក្នុង​តំបន់​អាស៊ាន ឥណ្ឌូណេស៊ី​នឹង​ដើរ​តួនាទី​ដ៏​ធំ​មួយ​ក្នុង​​ខ្សែ​សង្វាក់​ផ្គត់ផ្គង់ EV ហើយឥទ្ធិពលរបស់ឥណ្ឌូនេស៊ីនៅក្នុងតំបន់នេះអាចបំពេញបន្ថែមជំនាញនៃបណ្តាប្រទេសអាស៊ីអាគ្នេយ៍ផ្សេងទៀត និងជំរុញប្រព័ន្ធអេកូឡូស៊ីនៃតំបន់ទាំងមូល៕