បរទេស ៖ ថ្វីត្បិតទំនាក់ទំនងអាមេរិក និងអារ៉ាប់ ដែលផ្តោតសំខាន់ទៅលើវិស័យសេដ្ឋកិច្ចកន្លងមកមានភាពរឹងម៉ាំខ្លាំងក៏ពិតមែន ពោលគឺចាប់តាំងតែពីការបញ្ចប់ទៅនៃសង្គ្រាមលោកទី២ ប៉ុន្តែបញ្ហារកំាំរកូស និងតានតឹងដាក់គ្នាក៏តែងតែមានសកម្មភាពរំខានមកជាបន្តបន្ទាប់់ដែរ ដូចជាបញ្ហាសង្គ្រាមអារ៉ាប់-អ៊ីស្រាអែល, សង្គ្រាម Persian Gulf លើកទី១ និងលើកទី២ , ព្រឹត្តិការណ៍វាយប្រហារដោយភេវរកម្មថ្ងៃទី១១ ខែកញ្ញា ក៏ដូចជាបញ្ហាសង្គ្រាមនៅអ៊ីរ៉ាក់ និងស៊ីរីជាដើម។

នៅក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងរដ្ឋាភិបាលវ៉ាស៊ិនតោន និងបណ្តាប្រទេសអារ៉ាប់បានត្រឡប់មកល្អប្រសើរ ស្អិតល្មួតយ៉ាងខ្លាំង ជាពិសេសការធ្វើពាណិជ្ជកម្មប្រេង និងអាជីវកម្មផ្សេងៗទៀត ពោលគឺមកទល់នឹងពេលដែលព្រឹត្តិការណ៍ជម្លោះដោយយោធារវាងរុស្ស៊ី និងអ៊ុយក្រែនបានផ្ទុះឡើងកាលពីឆ្នាំ២០២២។

ទំនាក់ទំនងដែលតែងតែមានភ្ជាប់មកជាមួយនឹងបញ្ហានយោបាយផ្សារភ្ជាប់ផងដែរនោះ បានចាប់ផ្តើមល្អក់កករឡើងវិញ ជាពិសេសពេលដែលអាមេរិកបានព្យាយាមទាមទារឲ្យប្រទេសក្នុងតំបន៉អារ៉ាប់ដើម្បីដាក់ខ្លួនឲ្យដាច់ឆ្ងាយពីរុស្ស៊ីដែលផ្ទុយពីការចង់បានរបស់ប្រទេសអារ៉ាប់នៅពេលបច្ចុប្បន្ន ហើយបានបង្ហាញពិភពលោកថា អ្វីដែលជាប្រយោជន៍សម្រាប់ប្រទេសជាតិគឺជារឿងអាទិភាពបំផុត។

ដោយឡែក សម្រាប់អាមេរិកហាក់ដូចជាមិនសូវហ៊ានបញ្ចេញប្រតិកម្មឡើយចំពោះបំណងប្រាថ្នារបស់អារ៉ាប់ត្បិតអីប្រទេសទាំងពីរគឺជាដៃគូនាំចេញនាំចូលធំបំផុតជាងគេដូចគ្នាគិតជាទំហំទឹកប្រាក់ជារៀងរាល់ឆ្នាំមានទំហំមហាសាល។

តើមូលហេតុអ្វីខ្លះដែលធ្វើឲ្យអាមេរិកហាក់មានភាពស្ទាក់ស្ទើរក្នុងការបង្ហាញភាពមិនសប្បាយចិត្តចំពោះទំនាក់ទំនងរវាងអារ៉ាប់ និងរុស្ស៊ី ?

ទោះបីជាមិនទាន់មានកិច្ចព្រមព្រៀងណាគួរឲ្យកត់សំគាល់រវាងរុស្ស៊ី និងអារ៉ាប់ ប៉ុន្តែគេជឿជាក់ថា អារ៉ាប់ចង់បញ្ជាក់ប្រាប់អាមេរិកយ៉ាងច្បាស់ថាអ្វីដែលជាផលប្រយោជន៍សម្រាប់ខ្លួននោះវាគឺជាកិច្ចការងារដែលត្រូវតែធ្វើទោះបីជាមានការទាមទារយ៉ាងណាក្តីពីអាមេរិកនាពេលកន្លងមក។

កាលពីដើមខែធ្នូនេះ មេដឹកនាំរុស្ស៊ី លោក Vladimir Putin បានបំពេញទស្សនកិច្ចជាផ្លូវការទៅកាន់ប្រទេសក្នុងតំបន់អារ៉ាប់ ដូចជាសហភាពអារ៉ាប់រួម និងអារ៉ាប៊ីសាអូឌីតទាំងគួរឲ្យភ្ញាក់ផ្អើល។ ដំណើរស្វាគមន៍ប្រកបដោយក្តីរីករាយ និងការរៀបចំយ៉ាងសមរម្យបំផុតក្នុងនាមជាមេដឹកនាំដូចទៅនឹងបណ្តាប្រទេសដទៃទៀតទោះបីជាបញ្ហាជម្លោះនៅអ៊ុយក្រែន និងរុស្ស៊ីកំពុងបន្តនៅឡើយក្តី។

អារ៉ាប់មើលឃើញថា អាមេរិកសម្លឹងតែប្រយោជន៍ផ្ទាល់ខ្លួនធំជាង ហើយមិនមានតម្លាភាព ជាពិសេសនៅក្នុងអាណត្តិរបស់មេដឹកនាំអាមេរិក លោកប្រធានាធិបតី Joe Biden ដែលតែងតែប្រើប្រាស់មូលហេតុសិទ្ធិមនុស្ស និងប្រជាធិបតេយ្យដើម្បីទប់ស្កាត់ភាពរីកចម្រើនរបស់ពួកគេ ជាក់ស្តែងដូចជាការរារាំងកិច្ចព្រមព្រៀងលក់អាវុធជាដើម។ ដូច្នេះអាមេរិកក្នុងពេលនេះគឺបានត្រឹមតែធ្វើគធ្វើថ្លង់សិនប៉ុណ្ណោះដើម្បីស្វែងរកឳកាសថ្មីពិភាក្សាគ្នាឡើងវិញ។

ជាលទ្ធផលមហាអំណាចធំៗទាំង៦នៅក្នុងតំបន់អារ៉ាប់ដែលមានដូចជា អារ៉ាប៊ីសាអូឌីត, សហភាពអារ៉ាប់រួម, កាតា, គុយវ៉ែត, បារ៉ែន និងអូម៉ង់ បានចូលរួមគ្នាបង្កើតជាក្រុមប្រទេសថ្មីមួយដែលមានសិទ្ធិក្នុងការសម្រេចចិត្តរួមទៅលើការអភិវឌ្ឍ និងកិច្ចខិតខំការពារអត្ថប្រយោជន៍រួមគ្នាជំនួសឲ្យរបៀបធ្វើការពីមុនដែលពឹងផ្អែកលើអាមេរិកជាអ្នកជួយនាំផ្លូវ។ ទាំងនេះរឹតតែបានធ្វើឲ្យអាមេរិកមានក្តីព្រួយបារម្ភថា អារ៉ាប់នឹងលែងស្ថិតនៅក្រោមឥទ្ធិពលសេដ្ឋកិច្ច និងនយោបាយរបស់ខ្លួនតទៅទៀតដោយមិនទាន់គិតចូលនូវមូលហេតុផ្សេងទៀតដែលអាមេរិកដាច់ខាតមិនហ៊ានបញ្ចេញមតិអ្វីឡើយចំពោះការចង់បានរបស់អារ៉ាប់ជាមួយនឹងទំនាក់ទំនងនឹងរុស្ស៊ី។

មូលហេតុផ្សេងទៀតនោះមានដូចជាការផ្លាស់ប្តូររបថនៃសណ្តាប់ធ្នាប់ពិភពលោកថ្មីក្រោយព្រឹត្តិការណ៍នៃប្រតិបត្តិការពិសេសរបស់រុស្ស៊ីទៅលើប្រទេសអ៊ុយក្រែនដែលមានន័យថាពិភពលោកលែងដំណើរការជាមួយនឹងប៉ូលអំណាចតែមួយជាមួយអាមេរិកទៀតឡើយ។ មួយវិញទៀត អាមេរិកបច្ចុប្បន្នកំពុងរវល់ និងឈឺក្បាលបញ្ហានៅហ្គាហ្សាជាងបញ្ហានៅអ៊ុយក្រែន ជាក់ស្តែងកញ្ចប់ថវិកាជាង ១០០ពាន់លានដុល្លារដែលក្នុងនោះជាង៦០ពាន់លានដុល្លារដើម្បីជួយដល់អ៊ុយក្រែនត្រូវបានរារាំងដោយសភារង់ចាំការសម្រេចចិត្តជាថ្មីផងដែរ។

ដូច្នេះ គេអាចមើលឃើញហើយថា ទំនាក់ទំនងរវាងអារ៉ាប់ និងរុស្ស៊ី លែងជាអ្វីដែលអាមេរិកហ៊ានប្រើប្រាស់ឥទ្ធិពលរបស់ខ្លួនក្នុងការជ្រៀតជ្រែក ឬលូកដៃទៀតឡើយទោះបីជាវាអាចក្លាយទៅជាសម្ព័ន្ធមិត្តជាមួយគ្នានៅពេលខាងមុខក្តី រាប់ទាំងនយោបាយ សេដ្ឋកិច្ច ឬសូម្បីតែយោធា៕